Hla hiong (đe oei krao hla hrŭm kông) jĭ 'nhot bri ƀônh chă đei, hơnơ̆ng hon ah tơter hơbong đak, tơ̆ hơla teh bri hơ-iuch. Kon pơlei Bahnar pĕ xa hla hiong prăt sơnăm hloi. 'Nhot đei pĕ ah pơgê hrôih ah oei đei đak 'ngom noh 'lơ̆ng hloh. 'Nhot 'lơ̆ng hloh noh ah tơ-'mơ̆ng, hla jơk ƀlik. Hla hiong pĕ đang 'nhăk vih ôp rơgoh, lê̆ hrăng kơ đak. Yă Y Giang oei tơ̆ Plei Tơngia, phương Đak Cấm, dêh char Quảng Ngãi tơroi gah trong pai tơpŭng hla hiong thoi ou:  “Hla hiong athei pĕ đơ̆ng pơgê hrôih, kơplah oei gom đak ngom, noh hăp rơngơp iŭ ‘lơ̆ng; pŭk phe pai tơpŭng hơte noh bơ̆n peh hăm hơpuăl dah mă ot duh gơh, gô đak kơdơ̆k tah pŭk dar deh, vơ̆r hơnơ̆ng vă kơ pŭk lơ̆m gŏ đak hach hlăng ‘lơ̆ng, noh hơte pơtơm ‘lơ̆ng”

Pŭk 'măn pai tơpŭng hla hiong hơnơ̆ng noh pŭk phe đe peh hăm hơpuăl dah mă ot hăm kơmăi. Ah pai, gŏ đak ngach hơtŏk tơ kong tơnuh unh, gô đak kơdơ̆k noh tah pŭk phe, tah dar deh, tah rah pŭk vơ̆r rah vă kơ pŭk hoai kơtŏl. Đơ̆ng rŏng kơ noh pơtơm tah hla hiong, tah tŏ sĕt ƀoh ƀôk ngok ou to. Kiơ̆ kơ unh hnam chă pai xa, gơh chă pai hăm ka, hơbou dah mă 'nhĕm, mă lei tơpŭng hla hiong pai hơdrô̆ noh đei lơ.

Tơdrong kăp gĭt hăm tơpŭng hla hiong noh hăp ƀou phu 'lơ̆ng rơngơp. Yă Y Lat, oei tơ̆ Plei Tơngia,  phương Đak Cấm, dêh char Quảng Ngãi ăn tơbăt:  “Tơpŭng hla hiong jĭ ‘nhot xa juăt jue đơ̆ng kră sơ̆ kơ bơngai Bahnar. ‘Nhot xa ou đei hla hiong hăm tŏ sĕt pŭk phe noh unh hnam đei tơmam xa ‘lơ̆ng bơih. Tơ̆n đei ‘nhĕm dah mă ka pai atŭm noh ‘lơ̆ng hloh. Pai tơpŭng hla hiong ou athei sơ̆n, ưh gơh hăt hot ôh, vơ̆r mă hơnơ̆ng noh tơpŭng hơte gơh ‘lơ̆ng”

Lơ̆m tơdrong hơrih pơlei pơla hrei ou, tơpŭng hla hiong hơnơ̆ng đei lơ̆m 'măng sŏng xa kơ unh hnam đơ̆ng rŏng kơ minh năr jang mir hrat, dah mă lơ̆m 'măng akŏm kơ pơlei pơla. Gŏ tơpŭng hla hiong đei 'măn ah hơnê̆ hnam pơtăm, rim bơngai akŏm tăp dăr sŏng xa, atŭm pơma dơnuh. Tơpŭng hla hiong yuơ noh ưh kơ hơdrô̆ hiĕm 'me hơkou jăn, mă hăp oei tơguăt jơhngơ̆m đon kơ rim bơngai lơ̆m unh hnam păng tơpôl pơlei pơla.

Hrei ou, mă tơdrong hơrih kon pơlei Bahnar hlôi đei lơ tơplih, đei lơ tơmam xa 'nao, mă lei tơpŭng hla hiong adoi oei đei răk vei nhen minh tơdrong tơƀlŏk kơ joh ayŏ kră sơ̆.