Bơngai Jrai lui phe ƀa noh kơyuơ Yang asong ăn kơ kon bơngai. Yang jĭ grasia hloh, oei tơ̆ jơ̆p jang tơring. Bơngai Jrai ưh đei kăt ƀa, tôh ƀa mă broch ƀa hăm ti đĕch. Kơlih đe sư akhan kăt ƀa, tôh ƀa noh pơm ăn tơm ƀa jĭ, noh pơm jĭ Yang. Pơmai H’Uyên Niê, Phŏ Kơdră Jơnŭm jang gah đe drăkăn xah Ia Mơ Nông, apŭng Chư Păh, dêh char Gia Lai ăn tơbăt: "Kiơ̆ khôi kră sơ̆ kơ bơngai Jrai noh bơngai drăkăn athei băt peh ƀa, chă 'long unh, sŏ đak păng tanh brai. Athei đei dôm tơdrong mă noh bơngai drăkăn pơtơm gơh iŏk klo. Drăkăn pai por 'nhot oei đe drănglo noh glơng tôm tơdrong jang hrat nai".

Vă gơh đei găr phe, lơ̆m kơplah bơngai Kinh yua lơ tơmam drăm nhen: hơpăl ot, kơmăi tŭl, kơđum kơđŏng, hơtŏn, kơxêng tôm bơih. 'Nou jĭ dôm tơmam drăm juăt jue tơguăt kơjăp hăm đe drăkăn. Kơyuơ noh mă ah bơngai drăkăn Jrai iŏk klo, jur oei pha, hơdrei hơpăl adoi oei lơ̆m kơsô̆ tơmam drăm mĕ ƀă asong ăn đe drăkăn chĕp ba. Pơmai Rơ Châm H’Xuyết ăn tơbăt: "Peh ƀa noh đei đơ̆ng kră sơ̆ bơih, hơdrô̆ đe drăkăn 'lơ̆p 'lŏ adoi băt chă peh ƀa. 'Meh vă peh ƀa noh athei đei hơdrei hơpuăl. Đe drăkăn athei đei tơpang ti hơbĕch hơgei. Peh ƀa yua hơpăl tih iĕ tuơ kơ unh hnam đe sư pơm tơlĕch".

Hơpăl peh ƀa đei pơm đơ̆ng rơgăn dah mă tơkŭl 'long tih, bŏk jrŭ. Hơdrei 'noh pơm đơ̆ng rơgăn 'long tơpăt, ah hơnê̆ chrah iĕ mah ăn ti krôp, minh pah kơ̆l hơdrei noh tih păng kơ̆l gah tôch noh iĕ hloh. 'Meh peh ƀa gơh tenh, noh đe hơnơ̆ng peh hơdoi 2 'nu. Pơmai Siu Thỏi tơ̆ xah Ia Mơ Nông, apŭng Chư Păh, dêh char Gia Lai ăn tơbăt: "Vă peh ƀa tenh noh kăl đei 2 'nu peh hơdoi. Hơpăl peh noh athei rơih dôm tơkŭl 'long hơrăk, kơjăp, hơdrei thoi ăi mơ̆n. Peh 10 kĭ ƀa pơhlom lơ̆m 2 jơ. Drŏnglo adoi gơh chă peh ƀa mă lei ưh kơ băt chă hơ-um hơring phe pơlah ưh kơ đei hơbĕch nhen đe drăkăn".

Ah peh ƀa, bơngai Jrai tuh ƀa lơ̆m hơpăl, iŏk hơdrei peh ƀa jrơ̆p, đơ̆ng rŏng kơ noh peh ah kơ̆l hơdrei tih vă peh hroh. Đe peh mă hơnơ̆ng vă kơjeh hơnuh ƀa mă ưh đei pơm hĕch găr phe, păng phe jing kok. Pơmai Rơ Châm Hà tơ̆ xah Ia Mơ Nông, apŭng Chư Păh, dêh char Gia Lai ăn tơbăt: "Mă blŭng noh peh ƀa jrơ̆p, mă 2 noh kơjeh hơnuh ƀa, mă 3 noh peh hroh vă iŏk phe pai xa. Hơnơ̆ng đei 2 'nu peh ƀa vă kơ tenh đei phe. Rim bơngai yua minh pôm hơdrei, kiơ̆ kơ jơhngơ̆m pran kơ rim bơngai. Bơngai 'lŏ kră noh hơnơ̆ng peh hăm hơdrei iĕ oei đe mơlôh noh peh hăm hơdrei tih hloh. Minh 'măng peh tuh pơhlom 3 - 4 kĭ ƀa".

Peh ƀa đang noh tơpang ty hơbĕch hơbal kơ đe drăkăn Jrai pơtoi hăm tơdrong hơ-um hơring. Đe sư ưh đei yua kơxêng vă hơ-um ƀa mă yua kơđum vă hơ-um phe. Pơmai Rơ Châm H’Xuyên tơ̆ xah Ia Mơ Nông, apŭng Chư Păh, dêh char Gia Lai ăn tơbăt: "Drăkăn iung đơ̆ng 4 jơ pơgê vă peh ƀa. Peh đang noh hơ-um hơdrei păng peh hroh pă 'măng dơ̆ng. 'Măng mă 2 ou peh hroh noh pơtơm đei phe, hơ-um hơdrei adoi asong jing 2 'măng mơ̆n".

Hrei ou, đei kơmăi kơmŏk 'nao pơtăl ăn jơhngơ̆m kon bơngai bơih. Mă lei, hơnơ̆ng ah pơyan et xa, dah mă rim 'măng sơng tơmoi truh tơmang, rim pơlei pơla rơ-ông rơ-ang hăm jơva peh ƀa hrơ hrau atŭm hăm tơdra chĭng chêng. Dôm tơdra ou hlôi pơjing minh cham char joh ayŏ kăp gĭt ƀenh kơ um ai tơring Tây Nguyên.