Lơ̆m tơdrong ang jơva kơ tơdra hơri păng um ai joh ayŏ Lào, kon pơlei păng tơmoi đei tơmơ̆ng lăng tơdrong tôn pơdah chĭng chêng, tôn T’rưng, tap pơ̆t pơng păng hơsuang Lăm vông 'lơ̆ng hơ-iă, pơdah hrŭk hơbăn ao tanh hăm hơnăn Um rŭp tơring groi kông. Dôm ƀai hơsuang nhen Hoa đẹp Chăm pa, Sao Ken Fai, Sa La Vắn, I Kơng Đươn Đao… hơvơn lơ tơmoi vang hơsuang atŭm hăm đe hơdruh tơdăm Lào.

Atŭm hăm noh jing tơdrong săi đak kăp gĭt vă tơklah hăm pơyan phang, apinh đak 'mi ruih rơngơp rim tơmam drăm gơh chêk lar. 'Nou adoi jing minh khôi juăt vă thơ thou 'lơ̆ng hơ-iă kơ bơngai Lào, hơpơi 'meh kon bơngai ôp rơgoh dôm tơdrong ưh kơ pŭn ai păng sơng iŏk dôm tơdrong 'lơ̆ng rŏ, jơnap lơ̆m sơnăm.

Truh Đăk Lăk tơmang lăng lơ̆m 'măng pơdơh lêh ou, 'nhŏng Đỗ Hoàng Việt, tơ̆ dêh char Phú Yên tơroi: “ 'Năr ou inh ưh kơ ê đei hơlen băt minh khôi săi đak kơ bơngai Lào hơrih tơ̆ tơring Buôn Đôn kơ Đăk Lăk. Inh ƀôh tơring teh Đăk Lăk noh 'lơ̆ng, ou jĭ minh lơ̆m dôm hơnih hơvơn lơ tơmoi truh tơmang, mă kăl noh tơmoi đơ̆ng tơring tơjê̆ đak dơsĭ nhen Phú Yên, Bình Định”.

Khôi săi đak păng hơlen băt joh ayŏ Lào jĭ minh lơ̆m dôm tơdrong joh ayŏ đei pơgơ̆r tơ̆ Đăk Lăk ƀơ̆t tơbăt 50 sơnăm teh đak đei jơnei rơngei keh kong. Yă Nguyễn Lê Thanh Thảo, jang lơ̆m jơnŭm pơgơ̆r ăn tơbăt:  “Nhôn rơih dôm tơdrong pơchơt sô̆ hơ-iă, kăp gĭt hloh vă tơbang truh rim kon pơlei Đăk Lăk păng tơmoi truh tơmang. 'Nou adoi jĭ minh lơ̆m dôm tơdrong mă kon pơlei păng tơmoi gơh chă akŏm păng pơchơt hơdoi, ưh hơdrô̆ lăng đĕch mă oei gơh hrou dơh po lơ̆m tôm tơdrong akŏm thoi ăi, đơ̆ng noh pơjing đei tơdrong chơt 'nao 'lơ̆ng ăn tơdrong tơmang pơhiơ̆ Đăk Lăk”.

Lơ tơdrong hơlen băt gah joh ayŏ đei pơgơ̆r tơ̆ pơlei tơm Buôn Ma Thuột păng dôm apŭng tơ̆ Đăk Lăk. Joh ayŏ kon pơlei Thái, kon pơlei Lào đei kơdih po kon pơlei tơbang truh hăm tơmoi kiơ̆ đơ̆ng dôm tơmam xa, tơdra hơsuang, tơdrong hơri brông, păng tơdrong pơsuh pơchơt. Tơdrong akŏm pơdah dôm tơmam drăm OCOP; tour Rafting vơ̆r thŏng găn chơkơi đak; tour Gre kơdou lơ̆m bri kơdrơ̆ng găn chơkơi đak; Năr tơpăr Khinh khĭ kâu adoi đei dôm anih jang tơmang pơhiơ̆ pơgơ̆r kăp gĭt.  

Tơ̆ Đăk Lăk sơnăm ou oei đei tơplih 'nao kăp gĭt hăm tơdrong akŏm joh ayŏ kơdŏ suang hăm dêh char Mondulkiri (Campuchia) păng tơdrong akŏm joh ayŏ Đăk Lăk – Phú Yên atŭm hăm pơdah ka ngư đak dơsĭ, hơvơn lơ kon pơlei păng tơmoi truh lăng. Ƀok Đỗ Hoàng Việt, tơ̆ dêh char Phú Yên ăn tơbăt: “Truh ou kơnh 2 tơring đei tơmơ̆t hơdai noh inh adoi 'meh chă hơlen tơdrong 'nao hloh. Inh năm truh Buôn Ma Thuột lơ 'măng bơih mă lei 'măng mă ou inh năm hăm tơdrong mơn pha păng inh ƀôh đei minh tơdrong kiơ 'nao hloh mă lei adoi tơguăt tơjê̆ hloh”.