Dôm năr hơtuch sơnăm, kon pơlei Bahnar tơ̆ pơlei Mơ Hra, xah Kông Lơng Khơng, apŭng Kbang, dêh char Gia Lai ƀrŭng ƀreo ƀơ̆r hơhiĕk sơng khul tơmoi đơ̆ng Hà Nội. Tơmoi noh chơt hơ-iă chă akŏm xa por prung đing kram ƀâu phu, iĕr pơhang 'lơ̆ng păng tơdrô ge pai đơ̆ng ƀuih hla 'long ƀăt 'lơ̆ng; hăt hot hăm tơdra chĭng chêng. Pơmai Lê Thị Phương, tơmoi truh đơ̆ng Hà Nội ăn tơbăt: “ 'Nâu jĭ 'măng mă blŭng inh năm truh Gia Lai, adoi jing 'măng mă blŭng inh đei akŏm lăng đang măt akŏm pơdreh chĭng chêng Tây Nguyên. Păng mă hăt noh đe boăl mơlôh vang akŏm pơdah, vơch kơ jơhngơ̆m tơpă, pơm ăn đon bơnôh suơng rơnguơ̆ sơđơ̆ng”.

Hadoi hăm pơlei Mơ Hra, xah Kông Lơng Khơng, apŭng Kbang, dêh char Gia Lai hlôi pơjing dôm pơlei jang tơmang pơhiơ̆ kơ bơngai Bahnar đei Kdang (xah Kông Lơng Khơng), Stơr (xah Tơ Tung), Kon Bông (xah Đak Rong) păng pơlei Chiêng (thĭ trâ̆n Kbang). Kră pơlei Đinh Mưnh – tơ̆ pơlei Mơ Hra, xah Kông Lơng Khơng ăn tơbăt: “Nhôn hơmet homestay 'noh đei hnam kơjung ăn tơmoi ƀĭch tep, unh hnam noh pai por kiơ̆ khôi so pai phe đơ̆ng mir, yâu ka tơ̆ đak, tơkang tơdrô ge ăn tơmoi et, hơri pơchơt hăm tơmoi. Đe lăp tơpă. Tơmoi truh noh tep tơ̆ hnam mă yơ duh bưh. Inh noh kră pơlei, inh athei hơlêm kon pơlei athei hơdrin pơm jang”.

Pơmai Trần Thị Bích Ngọc – jang lơ̆m Anih jang vei lăng kon pơlei xah Kông Lơng Khơng, apŭng Kbang ăn tơbăt, tơdrong jang vei răk tơƀăk mong joh ayŏ juăt jue đơ̆ng khôi juăt kră sơ̆ vă tơgŭm kon pơlei jang tơmang pơhiơ̆ kơjăp sơđơ̆ng: “Đơ̆ng tơdrong jang tơmang pơhiơ̆ pơlei pơla noh dôm tơdrong joh ayŏ kră sơ̆ adoi đei kon pơlei hơmet dơ̆ng nhen chĭng chêng, tanh brong jak, tanh brai. Kon pơlei hơdrin vei răk tơƀăk mong kơjă joh ayŏ păng hơtŏk rah tơdrong jang tơmang pơhiơ̆ vă hơvơn tơmoi truh tơmang lăng. Kiơ̆ đơ̆ng noh gô tơgop jang hơtŏk mŭk drăm ăn kon pơlei tơ̆ pơlei pơla”.

Ưh hơdrô̆ dôm pơlei jang tơmang pơhiơ̆, mă tơ̆ dôm xah đei lơ kon pơlei kon kông hơrih jang xa, tơdrong jang vei răk tơƀăk mong joh ayŏ vă hơtŏk jang tơmang pơhiơ̆ kơjăp sơđơ̆ng adoi đei tơlĕch jang. Ƀok Trần Xuân Nam, Kơdră Anih jang vei lăng kon pơlei xah Lơ Ku, apŭng Kbang ăn tơbăt: “Dôm pơlei pơla kơchăng kơdih vei răk tơƀăk mong joh ayŏ kơ kon pơlei Bahnar. Atŭm hăm noh, nhôn pơih să minh ƀar um ai joh ayŏ kơ kon pơlei tơring gah Tu nhen bơngai Mông, bơngai Tày vă pơ-'lơ̆ng hloh joh ayŏ lơ̆m tơring. Mă kăl lơ̆m 'măng Têt, chă pơgơ̆r akŏm Puih mak, hơvơn rim pơlei Bahnar vang akŏm tôn chĭng chêng. Kơyuơ noh, minh ƀar pơlei lơ̆m tơring hlôi băt chă vei răk tơƀăk mong joh ayŏ kăp gĭt”.

Đơ̆ng sơnăm 2022, apŭng Kbang asong jê̆ 4 tih hlj pơtơm Tơdrong jang vei răk tơƀăk mong kơjă joh ayŏ juăt jue kơ kon pơlei kon kông tơguăt hăm hơtŏk jang tơmang pơhiơ̆ jăl sơnăm  2021-2025. Ƀok Đinh Đình Chi, Kơdră Anih jang Joh ayŏ Tơroi tơbăt apŭng Kbang ăn tơbăt, tơring adoi jang hadoi lơ tơdrong vă tơgŭm kon pơlei vei răk tơƀăk mong joh ayŏ, pơm trong pơsơđơ̆ng tơdrong hơrih: “Mă mônh noh asong ming man anih pơm jang, tơdrong kăl, mă 2 noh vei răk tơƀăk mong dôm mŭk drăm joh ayŏ kơ kon pơlei tơ̆ tơring vă tơroh hăm dôm tơring dih băl pơjing minh jăl trong jang 'nhăk tơmoi truh tơmang lăng. Păng ah mă tơmoi truh noh pơhrăm ăn kon pơlei mă blŭng athei tơchơ̆t tơdrong pơm jang; hơgơ̆l đĭ đăng noh iŏk mŭk drăm joh ayŏ vă pơtơm ăn hơtŏk jang tơmang pơhiơ̆ păng adoi iŏk mă noh vă rong răk mŭk drăm păng asong tơdrong jang xa ăn kon pơlei”.