VOV4.Bahnar - Khei ‘năr tơ jê̆ âu, hăm lơ hơ yak tŏk pran lơ̆m tơ drong jang kơ măy kơ mŏk tơ roi tơ băt, chih tơ băt hăm kơ măy sô̆ vă chĕp răk, tơ băk vei tơ drong jŏh ayŏ kơ dŏ xoang ‘lơ̆ng hơ iă đơ̆ng ‘nŏh jĭ trong jang đei rim anih jang kơ tĕh đak păng dôm grŭp jang kơ dih hưch hanh kơ jă kăp gĭt đơ̆ng tơ drong jŏh ayŏ so oei jang kiơ̆. Pơ jing kơ măy ‘măn răk atŭm lơ̆m tơ drong jŏh ayŏ kơ dŏ xoang kŭm jing 1 lơ̆m dôm tơ drong tơm vă năm truh mưh tơ lĕch Tơ drong jang kơ sô̆ 6 “Vei lăng, tưk tơ iung kơ jă kăp gĭt đơ̆ng jŏh ayŏ kơ dŏ xoang ‘lơ̆ng hơ iă kơ dôm hơ drĕch kon kông tơ klep hăm atŏk tơ iung chă tơ mang lăng, găh Tơ drong jang tơm kơ tĕh đak vă atŏk tơ iung mŭk drăm tơ pôl tơ̆ tơ ring kon kông.

Dêh char Thái Nguyên đei băt truh jĭ ‘măng jang mât lĕch găh tơ drong jang mŭk drăm, tơ pôl đơ̆ng tơ ring groi kông hăm tơ ring Tơ măn Bắc Bộ, păng đei truh 46 hơ drĕch hơ drung arih xa hơ dai. Jing lei lăi hăm tơ drong, Thái Nguyên kŭm oei chĕp vei lơ tơ drong jŏh ayŏ kơ dŏ xoang ‘lơ̆ng hơ iă đơ̆ng sơ̆.

Tơ̆ anih ‘măn răk tơ mam dêh char Thái Nguyên, khei ‘năr âu, lơ trong jang hăm kơ măy kơ mŏk ‘nao pha ra băl nhen čhơ̆ rup 3D, kơ măy chih tơ băt kơ sô̆ tơ mam drăm oei tơ plih ăn trong vei lăng so, hăm hlŏh 32.000 tŏ tơ mam tŏk bŏk đei vei lăng tơ̆ anih ‘măn răk âu. Yă Lương Thị Duyên, Phŏ Kơ dră chĕp kơ̆l Anih ‘măn răk tơ mam ăn tơ băt: “Nhôn băt ‘nâu jĭ tơ drong jang tôch kăl, sư tơ gŭm ăn anih ‘măn răk đei tơ drong ‘lơ̆ng vă roi tơ băt ăn tơ moi chă tơ mang lăng dôm tơ mam mă dang ei anih ‘măn răk vei lăng. Păng oei tơ gŭm pơm hiôk hian ăn tơ drong iŏk yoa, chă hơ len năng, roi tơ băt truh tơ̆ kon pơ lei.”

 Kiơ̆ dôm bơ ngai juăt jang, tơ drong iŏk yoa kơ măy kơ mŏk ‘nao tôch lăp hăm tơ drong vei lăng, tưk tơ iung kơ jă kăp gĭt đơ̆ng tơ mam jŏh ayŏ so sơ̆. Mưh chih tơ băt hăm kơ măy sô̆, kơ măy kơ mŏk ‘nao bơ̆n tơ ƀôh rup, jơ va re hloi, mă loi jĭ jơ va re păng um rup 3D tôch hơ iă, sơng đei lơ bơ ngai truh lăng. Găh nŏh dơ̆ng dôm tơ mam jŏh ayŏ so âu đei hloi tơ mam drăm păng tơ drong jŏh hơ ri hơ xoang đei chih tơ băt hăm kơ măy sô̆ gơ̆h roi tơ băt hrĕnh kiơ̆ mang internet, ưh đei hơ găt găh jơ năr, anih, nơ̆r pơ ma. Hăm Thái Nguyên, chih tơ băt hăm kơ măy sô̆ dôm tơ mam jŏh ayŏ kŭm ‘nao đei jang kiơ̆ pran lơ̆m khei ‘năr tơ jê̆ âu đĕch. Mă loi iŏk đơ̆ng Khul kơ dră chĕp kơ̆l Đảng ƀô̆ dêh char tơ lĕch Tơ drong tơ chơ̆t kơ sô̆ 01 găh tơ plih hăm kơ măy kơ mŏk kơ sô̆. Kiơ̆ mŏ Nguyễn Thị Trang, Kơ dră Anih jŏh ayŏ kơ dŏ xoang - Tơ roi tơ băt apŭng Phú Bình, dêh char Thái Nguyên, hăm lơ tơ drong jŏh ayŏ kơ dŏ xoang ‘lơ̆ng hơ iă oei đei hrei ‘nâu, hơ tŏk tơ drong iŏk yoa kơ măy chih tơ băt kơ sô̆ tŏk bŏk đei dôm anih jang kơ pal, tơ ring tơ rang bơ̆ jang kiơ̆:

“Lơ̆m trong jang tơ plih kơ măy sô̆ ƀơm truh tơ drong jŏh ayŏ kơ dŏ xoang ‘nŏh Dơ nŏ anih vei lăng kon pơ lei apŭng kŭm chih hơ dăh, akŏm chih tơ băt hăm kơ măy sô̆ dôm tơ mam jŏh ayŏ kăp gĭt, pơ 'nhŏ ăn dôm tơ mam jŏh ayŏ, anih gru groa so kơ tĕh đak 'mơ̆i vă kon pơ lei tơ̆ tơ ring păng tơ moi chă tơ mang lăng kŭm hăm bôl boăl lơ̆m tĕh đak, đơ̆ng apŭng plenh tĕh đei băt truh ngăl."

Hrei 'nâu tơ̆ dêh char Thái Nguyên đei hlŏh 800 anih gru groa, cham char 'lơ̆ng rŏ, hlŏh 500 tơ drong jŏh hơ ri kăp gĭt, lơ̆m nŏh đei 17 tơ drong jŏh ayŏ kơ bơ ngai kon kông đei pôk pơ ư, chih tơ băt jĭ tơ mam jŏh ayŏ kơ dŏ xoang kơ tĕh đak, kŭm hăm rơ bâu tơ mam drăm tŏk bŏk đei chĕp vei tơ̆ Anih 'măn răk kơ dêh char. Vă hơ tŏk tơ drong 'lơ̆ng đơ̆ng vei lăng păng roi tơ băt, anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng oei tơ lĕch trong jang tôch rơ đăh vă jăh jang kĕh tơ drong iŏk yoa kơ măy sô̆, tơ gop ăn tơ drong chĕp răk tơ ƀăk vei, tưk tơ iung kơ jă kăp gĭt đơ̆ng jŏh ayŏ kơ dŏ xoang so tơ̆ dêh char.

Hrei ‘nâu, tơ pôl 53 hơ drĕch kon kông oei đei hlŏh 14 triu ‘nu kon pơ lei, arih xa răh rai tơ̆ hlŏh 52 dêh char, plt, akŏm lơ tơ̆ dôm tơ ring mơ mat tat, tơ ring sơ lam kơ tĕh đak. Mă tơ pă ăn ƀôh, kơ măy chih răk tơ mam jŏh ayŏ kơ dŏ xoang kơ kon pơ lei kon kông ưh lăp tơ gŭm pơm hơ tŏk tơ drong ‘lơ̆ng mưh vei lăng tơ mam jŏh ayŏ kơ dŏ xoang đĕch, mă oei jing tơ drong vă roi tơ băt dôm kơ jă kăp gĭt đơ̆ng chăl adrol sơ̆ lơ̆m khei 'năr jang kơ măy kơ mŏk tŏk pran hrei 'nâu dơ̆ng.

Ƀok Hà Việt Quân, Kơ dră Anih pơ gơ̆r Tơ drong jang tơm kơ tĕh đak atŏk tơ iung mŭk drăm, tơ pôl tơ̆ tơ ring kon kông păng groi kông ăn tơ băt, Tơ drong jang kơ sô̆ 6 đei 19 tơ drong hăm kơ sô̆ jên jang dang 5900 ti. Gơ̆h pơ ma ‘nâu jĭ ‘măng mă blŭng đei 1 tơ drong jang tih thoi âu ‘măn ăn tơ drong jŏh ayŏ kơ dŏ xoang kơ hơ drĕch kon kông. Dôm tơ drong jang tôch rơ đăh vă hơ tŏk tơ drong xa yoa găh jơ hngâm đon, vei lăng păng atŏk tơ iung dôm tơ drong jŏh ayŏ kơ dŏ xoang ‘lơ̆ng hơ iă, nhen chih pơ jing trong vei lăng, pơ tho tơ ƀôh tơ̆ hnam trưng, pơ gơ̆r lơ tơ drong et soi păng kăl loi jĭ chih tơ băt hăm kơ măy sô̆ dôm tơ mam jŏh ayŏ kơ dŏ xoang gĭt kăl:

“Tơ drong chih tơ băt hăm kơ măy sô̆ dôm tơ mam jŏh ayŏ kơ dŏ xoang ‘nŏh Ƀok kơ dră nhôn hlôi đei nơ̆r pơ tho găh tơ drong tơ chĕng hơ len, tơ plih kơ măy, chih tơ băt hăm kơ măy sô̆ dôm tơ drong jang mưh bơ̆ jang tơ drong jang tơm kơ tĕh đak. Găh nŏh dơ̆ng ƀok Kơ dră oei đei nơ̆r pơ tho athei tơ chĕng hơ len, jang hơ doi hăm Anih tơm vei lăng jŏh ayŏ kơ dŏ xoang, dôm anih jang kơ pal đei ƀơm truh păng mă loi jĭ dôm tơ ring, tơ pôl dôm hơ drĕch kon kông pơ jing đei 1 trong vei lăng hăm anih ‘măn răk tơ mam kơ sô̆, vă tưk tơ iung kŭm nhen roi tơ băt dôm kơ jăp kăp gĭt đơ̆ng jŏh ayŏ kơ dŏ xoang ‘lơ̆ng hơ iă kơ kon pơ lei kon kông. Păng đei anih ‘măn răk tơ mam chih răk hăm kơ sô̆ pơ ma atŭm găh jŏh ayŏ kơ dŏ xoang, mŭk drăm, tơ pôl, pơ yoa ăn tơ drong atŏk tơ iung dôm kơ jă kăp gĭt găh jơ hngâm đon kŭm nhen pơ yoa ăn tơ drong jang atŏk tơ iung mŭk drăm, tơ pôl kiơ̆ đơ̆ng dôm tơ drong chă tơ mang lăng."

Dơ̆ng: Tơ blơ̆