Tơ̆ Hnam akŏm thôn 2, xah Phú Xuân, dêh char Đăk Lăk lơ kon pơlei atŭm hăm Jơnŭm pơgơ̆r thôn hăt hot keh đang tơdrong jang hơmet ăn hơnih pôk rơih kơsô̆ 10. Băng rôn, nơ̆r chih, hla kơ đei hơtol kăp gĭt; kơthŭng kơphĭu, kơƀang tang dŏ, đak unh hơyuh, hnam pơyơ̆ng adoi hơmŏ tôm, rơgoh 'lơ̆ng. Ƀok Trần Văn Hùng, vang jang lơ̆m Khul pôk rơih kơsô̆ 10 ăn tơbăt, năr 15/3 truh ou kơnh, 1.060 bơngai tah hla gô năm tah kơphĭu tơ̆ ou. Yuơ kơchăng đơ̆ng hrôih, tơdrong chă hơmet pơrŏ, hơmŏ hơnih pôk rơih păng dôm tơdrong jang vei sơđơ̆ng tơpôl hlôi đei kơchăng tơnăp ăn năr akŏm kơ bơngai tah hla: “Kiơ̆ hơnăn bơngai tah hla đei pơkăp ah hnam hŏk hôp thôn 2 lơ̆m dôm năr ou ki, nhôn adoi chă tơroi tơbăt, pơtho kon pơlei đŏk hơlen hơdah hăm dôm bơngai lĕch măt tơgar. Đơ̆ng noh rơih iŏk dôm bơngai gơh hơgei, hŏk kơjung, đei đon bơnôh 'lơ̆ng vă pôk jang tang măt ăn Kuô̆k hô̆i adoi nhen ăn Hô̆i đơ̆ng kon pơlei dôm jăl jang”

         Xah Phú Xuân đei pơjing đơ̆ng tơdrong tơmơ̆t hơdoi 3 xah Ea Púk, Ea Dăh păng Phú Xuân (kơ apŭng Krông Năng so). Pôk rơih bơngai jang tang măt Kuô̆k hô̆i jăl 16 păng Hô̆i đŏng kon pơlei dôm jăl jang sơnăm 2026–2031, xah đei pơhlom 25.000 'nu bơngai tah hla tơ̆ 7 hơnih pôk rơih, 19 hơnih tah kơphĭu. Ƀok Nguyễn Tiến Ấn, Phŏ Kơdră Hơnih jang vei lăng kon pơlei xah, vang jang lơ̆m Jơnŭm pơgơ̆r pôk rơih xah ăn tơbăt, truh dang ei, tôm 19 hơnih pôk rơih hlôi keh đang hơnih tơmam drăm kăl, vei sơđơ̆ng tơpôl; hơnăn, tơdrong chih akŏm hơrih jang xa kơ bơngai lĕch măt tơgar đei pơkăp tơbang kơtă păng lơ̆m mạng tơpôl; dôm tơdrong akŏm pơma dơnuh hăm bơngai tah hla adoi pơgơ̆r keh đang, kơchăng ăn năr akŏm tôm kon pơlei: “Hơnih bơ̆ jang vei lăng kon pơlei tơring Phú Xuân hlôi ming hơmet pơ ‘lơ̆ng, hơtol hơmet ƀăng rôn, nơ̆r pơrô̆, kơthŭng tăh hla ... tơ̆ rim hơnih pôk rơih kiơ̆ ƀlep tơdrong tơchơ̆t đơ̆ng Jơnŭm vei lăng pôk rơih Teh đak. Truh dang ei, rim tơdrong jang hơmet ăn hlôi keh đang. Tơdrong pơkep hla bơar chih hơnăn bơngai tăh hla đei pơkap tơ hơnih tăh hla păng hơmet ‘lơ̆ng ăn ‘măng pôk rơih.”

Tơ̆ tơring M’Drăk, hơtăih đơ̆ng hơnih tơm dêh char Dak Lăk dang 90km, jơ ‘năr hơmet ăn jei tôch kơtang. Ƀok Nguyễn Đức Thảo, Kơdră chĕp pơgơ̆r Hơnih vei lăng kon pơlei tơring, Kơdră Hơnih chĕp pơgơ̆r pôk rơih tơring tơbăt, ‘măng pôk rơih kơdră tang măt Kuô̆k hô̆i jăl XVI păng Jơnŭm vei lăng kon pơlei rim kâp tơ̆ tơring đei dang 15.800 ‘nu bơngai tăh hla vang năm tăh hla tơ̆ 10 hơnih găh 8 hơnih pôk rơih. Truh dang ei, bơ̆ jang hơmet ăn hlôi keh đang, sơđơ̆ng ăn năr pôk rơih. Ƀok Nguyễn Đức Thảo tơroi tơbăt.“Hrei ou, nhôn hlôi pơklep tôm hla bơar chih hơnăn rim bơngai đei hơnăn ăn pôk tơmơ̆t tơ̆ rim hơnih tăh hla păng hơnih bơ̆ jang tơring;. Pơgơ̆r đang hop akom pơdrơ̆ng dih băl ‘măng mă 3 păng tơbăt hơdăh hơnăn kơdră đei 40 ‘nu bơngai pơjei vă pôk rơih iŏk đei 24 ‘nu kơdră tang măt Jơnŭm vei lăng kon pơlei tơring jăl jang 2026 – 2031.”

Kiơ̆ kơ yă Cao Thị Hòa An, Kơdră jang lơ̆m Trung ương Đảng, Kơ iĕng kơdră chĕp pơgơ̆r Đảng dêh char, Kơdră chĕp pơgơ̆r Hơnih bơ̆ jang pôk rơih dêh char Dak Lăk, vă pơvih pơvăn ăn dang 2 triu 420.000 ‘nu bơngai tăh hla, dêh char hlôi pơjing 102 hơnih pôk rơih tơring, phương, proh hơmet ăn 2.119 hơnih tăh hla. Truh dang ei, 100% hơnih tăh hla hlôi jang keh đang rim tơdrong ou to; rim ‘măng pơgơ̆r pơdrơ̆ng dih băl, pơklep hla bơar hơnăn bơngai tăh hla păng pơgơ̆r tơƀơp pơma dơnuh hăm bơngai tăh hla vă dôm bơngai năm pơjei pơma tơbăt trong bơ̆ jang đơ̆ng kơdih trŏ lăp hăm tơdrong tơchơ̆t, hơmet ăn ‘măng pôk rơih. Kơdră chĕp pơgơ̆r Hơnih pôk rơih dêh char Dak Lăk athei rim hơnih bơ̆ jang păng Hơnih vei lăng kon pơlei rim tơring, phương hơnơ̆ng dăr lăng kơjăp hơnăn bơngai tăh hla, sơđơ̆ng ăn rim răih kon pơlei jei đei năm tah hla ngăl.“Kăl iung jang dăr lăng mă hơlen hơnăn bơngai tăh hla, sơđơ̆ng ưh kơ lon bơngai bu. Mă kăl ‘noh khul bơngai tăh hla tŏk bŏk jang tơ̆ rim hơnih jang kmăi kmŏk pơm tơlĕch tơmam drăm, năm jang tơ̆ hơtăih; khul tăh hla ‘noh bơngai hŏk tro, sinh viên; adoi nhen dôm bơngai tim mă đei ƀơk ăn kăn kươk, dôm bơngai ‘măng mă blŭng năm tăh hla. Mă kăl, bơngai tăh hla tŏk bŏk jĭ jăn, tŏk bŏk ming hơmet tơ̆ hnam pơgang adoi kăl dăr lăng hơlen mă tôm, sơđơ̆ng ăn rim bơngai kon pơlei đei năm tăh hla ngăl.”

          Hăm tơdrong hơmet ăn tôm tong, kơjăp đơ̆ng dêh char truh tơ̆ tơring, 102 tơring, phương tơ̆ Dak Lăk hlôi hơmet ăn năr pôk rơih. Đơ̆ng tơdrong iung jang hơmet tôm hơnih jang truh dăr lăng rim hơnăn bơngai tăh hla, đĭ đăng jei lăng truh trong ưh kơ lê̆ lon bơngai bu. Năr 15/3 kơnh, atŭm hăm bơngai tăh hla lơ̆m teh đak, hloh 2 triu 420.000 ‘nu bơngai tăh hla Dak Lăk gô yak mơ̆t lơ̆m năr lêh tih kơ teh đak.