Tơ̆ tơring sơlam teh Ia Chia, lơ̆m dôm năr ou, tơdrong pơvih hơmet ăn pôk rơih đei pơgơ̆r hăt hot. Đơ̆ng pơgê hrôih, kan ƀô̆ linh tơ̆ Kơđông Ƀô đô̆i vei sơlam teh Ia Chia hlôi năm truh rim thôn, pơlei, jang hơdoi hăm tơring vă tơroi tơbăt ăn kon pơlei gah sơnong jang vei sơđơ̆ng tơdrong pơgơ̆r kơdih tơring sơlam kơ teh đak; sơnong jang đơ̆ng kon pơlei lơ̆m tơdrong pơm kiơ̆ pơkăp pôk rơih. Ƀok Phạm Văn Phúc, Ƀĭ thư Chi ƀô̆ pơlei Kom Yố, xah Ia Chia ăn tơbăt, lơ̆m rim 'măng tơroi tơbăt, kon pơlei ưh hơdrô̆ hlôh vao hơdah gah sơnong pơyua, sơnong jang kơ po mă oei lui ngeh lơ̆m tơdrong pơgơ̆r đơ̆ng Đảng, tơdrong pơgơ̆r đơ̆ng jơnŭm pơgơ̆r tơring: “Truh khei năr ou hlôi tơroi gah pôk rơih đei 3 'măng bơih, dang ei tơ̆ thôn pơlei, jơnŭm pôk rơih kơsô̆ 5 hlôi keh đang gah tơdrong pơkăp hơnăn bơngai tah hla. Năr pôk rơih trŏ ah năr 15/3/2026 noh hlôi tơroi truh tôm kon pơlei băt tôm tơdrong kăl lơ̆m tơdrong jang ăn pôk rơih”

Lơ̆m pơlei pơla, sơnong jang kơ đe kră pơlei, bơngai đei kon pơlei lui yom pơtoi đei akŏm, kơtă chă tơroi tơbăt gah kăp gĭt kơ tơdrong pôk rơih, hơvơn kon pơlei tơnăp lơ̆m chă rơih bơngai tang măt mă tơgăl, atŭm hăm noh kơchăng hăm dôm tơdrong jou kư̆ kă, chere tơdrong tơguăt tơguăl tôm kon pơlei. Kră pơlei Rơ Châm Chích, tơ̆ pơlei Beng, xah Ia Chia tơroi: “Kơdih inh ră hơdah lơ tơdrong vă kon pơlei băt vao, vă tơnăp chă rơih dôm bơngai đei đon 'lơ̆ng, gơh hơgei, tơnăp hăm tơdrong jang pơvih ăn kon pơlei. Tơring ou noh tơring sơlam teh noh athei kơchăng tôch dêh hăm dôm tơdrong pơhlŭ pơhlôm phă tơpăi tơdrong rơngei hiôk hian păng akŏm chă pơm tơhuăng đơ̆ng khul ayăt kơnê̆, ưh kơ mơ̆ng, ưh kiơ̆, athei pơm kiơ̆ trŏ dôm tơchơ̆t đơ̆ng Đảng, khôi luơ̆t đơ̆ng teh đak păng dôm tơchơ̆t đơ̆ng tơring”

Thiếu tá Nguyễn Thanh Bảo, jang Chinh trĭ tơ̆ Kơđông Ƀô đô̆i vei sơlam teh Ia Chia ăn tơbăt: Tơguăt kơjăp hăm tơdrong pơgơ̆r đơ̆ng đe kơpal, hơnih linh kơtă truh rim unh hnam vă pơma dơnuh, pơtho hơdah tơgŭm kon pơlei băt hơdah tơdrong kăp gĭt kơ pôk rơih; hơtŏk kơchăng, vei sơđơ̆ng tơdrong tơguăt tơguăl tôm kon pơlei tơ̆ tơring sơlam: “Hơtŏk ăn kon pơlei băt vao hơdah gah tơdrong tơm kơ tơdrong pôk rơih. Đơ̆ng noh kon pơlei kơchăng chă rơih dôm bơngai tang măt đei đon 'lơ̆ng, gơh hơgei, tang măt ăn nơ̆r pơma kơ kon pơlei lơ̆m tơring, mă kăl noh tơ̆ tơring sơlam teh. Kon pơlei adoi tơƀôh đei tơdrong khŏm mă tơguăt tơguăl, hơtŏ hơnơ̆ng lơ̆m hla kơphĭu kơ po. Nhôn tơroi tơbăt vă kon pơlei hơtŏk tơdrong kơchăng, pơm kiơ̆ trŏ dôm tơchơ̆t đơ̆ng Đảng, khôi luơ̆t teh đak, kơchăng tang găn păng tơjră hăm dôm tơdrong pơm kơnê̆ tơhĭl, chere pơm phă tơpăi tơdrong tơguăt tơguăl tôm kon pơlei”

Xah Ia Chia hlôi pơkăp 6 hơnih pơgơ̆r pôk rơih tơ̆ 10 thôn, pơlei; keh đang dôm jơnŭm jang tơroi tơbăt, vei sơđơ̆ng tơpôl, sek tơlang tơdrong tơkêng tơhlou... Hăm hloh 70% kơsô̆ măt kon pơlei kon kông, tơdrong hŏk pơhrăm tam mă hơtŏ hơnơ̆ng, tơdrong jang tơroi tơbăt đei sơkơ̆t jĭ tơdrong jang dơnơm, hơbĕch hơbal, ƀônh hlôh vao, trŏ hăm tơdrong hơrih. Ƀok Nguyễn Công Hòa, Kơdră Hơnih jang vei lăng kon pơlei xah Ia Chia ăn tơbăt: “Dôm jơnŭm jang đei tơdrong jang, đei pơkăp jang, asong tơdrong jang ăn rim bơngai vang jang. Rim khul grŭp jang hơdoi, đei khul linh Vei sơlam teh, Kŏng an, Hơnih tơm vei lăng Khul linh xah... hlôi hŏk hôp, asong sơnong jang vă vei sơđơ̆ng tơpôl hơdrol, lơ̆m păng đơ̆ng rŏng kơ pôk rơih Kuô̆k hô̆i jăl 16 păng Hô̆i đŏng kon pơlei dôm jăl jang sơnăm 2026-2031 gơh 'lơ̆ng tơnăp păng vei sơđơ̆ng gah tơpôl tơ̆ tơring sơlam teh”

Ah mă tơring sơlam sơđơ̆ng, jơhngơ̆m đon kon pơlei drơ̆ng minh, rim hla kơphĭu tơ̆ tơring sơlam roi hơtŏk tơdrong kăp gĭt. Rim hla kơphĭu tơring sơlam ưh hơdrô̆ jing tơdrong rơih bơngai tang măt, mă oei jing tơdrong tơchơ̆t pơgơ̆r kơdih, jing tơdrong tơbang hơdah kơ tơdrong tơguăt tơguăl tôm kon pơlei. Đơ̆ng tơdrong iung jang kơ tôm hơnih jang chinh trĭ atŭm hăm tơdrong tơnăp kơ rim kon pơlei tơ̆ tơring sơlam tŏk bŏk pơjing tơdrong sơđơ̆ng kơjăp vă Năr akŏm pôk rơih kơ teh đak gơh đei pơgơ̆r sơđơ̆ng, hiôk hian, trŏ khôi luơ̆t.