Tơlĕch jang lơ tơdrong jang bơngơ̆t, vei lăng tơdrong pơm tơm păng đei yua trŏ ƀlep đơ̆ng kang ƀô̆ thây kô pơtho păng bơngai jang, đơ̆ng blŭng sơnăm hŏk 2024-2025 truh dang ei, Kŏng đoan pơtho pơhrăm Đắk Lắk hlôi krao hơvơn tơgop jên mong tơgŭm đoàn viên, bơngai jang kŏng đoan lơ̆m dêh char đei hloh 500 triệu hlak jên.

Lơ̆m năr Tết nguyên đán Ất Tỵ âu, kŏng đoan anih pơtho pơhrăm Đắk Lắk pơgơ̆r tơdrong joh ayŏ kơdŏ soang, iŏk tơdrong pŭn ai blŭng puih mak păng tơƀơ̆p muh măt têt joăt joe lơ̆m kang ƀô̆ thây kô pơtho păng bơngai jang. Hơvơn rim kon jên asong tơmam têt ăn kang ƀô̆ pơtho pơhrăm păng bơngai jang đei tơdrong hơrih sa mơmat tat, bơngai đei tơdrong jĭ hơmet ưh kơ klăih hăm akŏp kơjă dôm tơpu tơmam ‘noh vă jê̆ 600 triệu hlak jên.