Ƀât oei đei ‘mi ƀơ ƀreh, dơ̆ng kơ pal kơmŏng hnam păk, đak lơ̆p, teh dơ̆k, ƀok Phạm Dũng, tơ̆ plei Phú Hữu, xăh Hòa Thịnh, dêh char Đắk Lắk tơnhong năng đe ƀô đô̆i oei man ming hnam ‘nao. Ƀok tơroi, Khul kơdră teh đak tơƀôh 3 kơloăi hnam vă ăn ƀok rơih, hnam yơ kŭm pơm ăn ƀok hơđơ̆ng jơhngâm ngăl yoa đei man kơjăp ‘lơ̆ng gơ̆h tơjră hăm ‘mi kial hơbŭt roi đunh roi dêh hrei ‘nâu: “Hnam kơloăi mônh, kơloăi 2 hăm tơring tơrang tơ̆ âu tôch lăp. Yoa tơring tơ̆ âu đak đa lơ̆p, rơih kơloăi hnam thoi noh vă pơm tôch kơ lăp hăm tơring, ưh đei nơ̆r pơma kiơ dơ̆ng bơih.”

Kŭm hăm unh hnam ƀok Dũng, lơ unh hnam kon pơlei tơ̆ xăh Hoà Thịnh kŭm tôch lăp hăm kơloăi hnam “3 kơjăp” – đei kơmŏng kơjăp, không kơjăp, bơbŭng kơjăp, đei man lơ̆m “Tơdrong jang Quang Trung". Yă Nguyễn Thị Thiểu, tơ̆ plei Phú Hữu, xăh Hoà Thịnh pơma: “Hơpo kŭm ưh đei tơchĕng truh tơdrong đei teh đak tơgŭm tôch hrĕnh, tôch ‘lơ̆ng thoi âu. Hrôih đei dơ̆ng anih oei xa vă sơng xa têt, Teh đak pơngơ̆t ăn kon pơlei thoi âu hơiă dêh.”

Hăm kon pơlei tơ̆ tơring đak lơ̆p, tơdrong đei măt đơ̆ng khul linh ưh lăp vang tơgŭm găh tơmam đĕch, mă oei tơgŭm găh jơhngâm đon, pơm ‘lơ̆ng vă đe sư ưh đei hŭt hơchăng lê̆ tơ̆ rŏng. Lơ̆m khei ‘năr tơlĕch tơdrong jang "Quang Trung", tơdrong hơnơ̆ng đei pơma hăm đe kăn ƀô̆, linh ‘nŏh jĭ “jang ăn kon pơlei nhen jang ăn kơtum kơtŏng ba”. Thượng uý Đỗ Đình Tuấn, Trung đoàn 143, Sư đoàn 315 (Quân khu 5) tơroi: “Mưh truh hăm rim unh hnam kon pơlei, nhôn năng hnam đe mih ma duch nă tơ̆ âu nhen thoi hnam kơdih ba. Tơgŭm ăn kon pơlei kum jing tơgŭm ăn unh hnam kơdih ba.”

Ưh lăp dôm tơnglat ‘nhik tơ̆ anih ming man dăh mă dôm kơmăng bơ̆jang truh hơdăh đĕch, "Tơdrong jang Quang Trung" tôch hrĕnh oei tơƀôh hơdăh tơdrong vang jang hrơ̆ch ‘lơ̆ng đơ̆ng rim anih jang chinh trĭ. Tơ̆ tơring đak lơ̆p Khánh Hoà, Kơdră vei lăng kon pơlei dêh char Trần Phong pơma hơdăh, Khul linh păng Công an đei hơnăp jang tơm vang tơgŭm ăn kon pơlei man hnam; khul kơdră tơring chĭu pŭ găh tơdrong mong akŏm, pơtruh jên, tơmam đơ̆ng tơpôl vang tơgŭm, vă pơm ‘lơ̆ng rim tơdrong tơgŭm gơ̆h truh tơpăt hăm kon pơlei.

“Jên,tơmam tơgŭm vă man hnam ăn kon pơlei tơ̆ tơring đak lơ̆p hlôi đei mong akŏm, đei hloi khul linh, Công an vang tơgŭm. Dôm tơring athei pơm thoi yơ vă jên đơ̆ng dêh char, đơ̆ng dôm bơngai đei đon ‘lơ̆ng gơ̆h răt đei tơmam ming man, găn ƀiơ̆ tơdrong kla jên kŏng. Yoa thoi noh, hơnăp jang đơ̆ng dôm xăh, phường ‘nŏh tôch gĭt kăl.” Ƀok Trần Phong pơma thoi noh.

Hăm đon pơhnŏng chinh trĭ tôch pơnĕh, "Tơdrong jang Quang Trung" hlôi tơgop pơjing đei jơhngâm pran tơpôl mưh tơjră hăm tŏ ‘mi kial kơnê̆: găh tơdrong pơgơ̆r, vang jang hơdoi păng bơ̆ jang kiơ̆ trong đei tơlĕch. Đơ̆ng dôm tơdrong ‘nŏh gô pơjing đei jơhngâm bơ̆ jang pran, hrĕnh, hơnhăk ba lơ hnam oei kơjăp ‘lơ̆ng păng tơdrong hưch hanh, đon lui kơjăp ăn kon pơlei. Đại tá Dương Văn Long, Phŏ kơdră chĕp kơ̆l Công an dêh char Gia Lai ăn tơbăt: “Jơhngâm đon jang ‘nŏh khŏm bơ̆jang mă ‘lơ̆ng ưh đei jô̆ năr pơdơ̆h, ưh đei jô̆ jơ, kŭm ưh đei pơngơ̆t ‘mi dăh mă prăng. Nhôn adrin pơm thoi yơ vă truh Tết Nguyên Đán, đĭ đăng unh hnam đei tơgŭm, gơ̆h đei hnam, đei anih oei xa păng arih xa hiôk sơđơ̆ng.”

“Tơdrong jang Quang Trung” gô tôch mưh dôm tŏ hnam mă hơtuch đei pơjao, mă lei dôm kơjă kăp gĭt mă tơdrong jang hơnhăk ăn ‘nŏh gô đei ling lang. ‘Nŏh ưh lăp hlŏh 1.600 tŏ hnam đei man ‘nao kơjăp ‘lơ̆ng păng 40.000 tŏ hnam đei pơm hơmet ming, tơgŭm ăn kon pơlei hơđơ̆ng jơhngâm tơ̆ hơnăp tơdrong tŏ ‘mi kial kơnê̆ đĕch, mă oei tơƀôh hơdăh jơhngâm pran, bơ̆jang rơgei, hơbĕch hơbal păng tơdrong pơvei kơjăp ‘lơ̆ng hai! 

Dôm tŏ hnam “3 kơjăp” đơ̆ng "Tơdrong jang Quang Trung" gô jing “anih oei xa tôch hơđơ̆ng” lơ̆m jơhngâm đon kon pơlei, đei man hăm đon kơchăng păng đak pơ uh pơ ang kơtoh prăt măng prăt năr đơ̆ng đe linh. Đơ̆ng kơmŏng hnam trôk, hlŭt, mĭnh tơdrong arih xa ‘nao oei vă tŏk dơ̆ng, roi pran kơjăp. Mĭnh “đon lui đơ̆ng kon pơlei” oei pơjing roi kơjăp gô jing jơhngâm pran vă jang tŏk teh đak lơ̆m chăl ‘nao./.

Bai1:https://vov4.vov.vn/bahnar/trong-jang-teh-dak-tojur-an-pang-todrong-horih-chinh-sach-va-cuoc-song/mang-iung-jang-quang-trung-tenh-koang-to-iung-pojing-ming-man-hnam-pojing-johngom-don-kon-polei-lui-yom-bai-1-dom-hoyak-khul-bo-doi-iung-jang-tenh-koang-505276.vov4