Đei kang ƀô̆, ƀô̆ đô̆i Kơđông Ƀô̆ đô̆i vei lăng sơlam teh đak Đak Long păng Hơnih chĕp pơgơ̆r Ƀô̆ đô̆i vei lăng sơlam teh đak dêh char Kon Tum pôk ăn tơmam drăm, plôih ‘măng pơjao ăn hnam ‘nao, ƀok A Trỏ, hơdrung Jeh-Triêng, pơlei Dục Lang, tơring Đak Long, apŭng Đak Glei chhôk hơ iă. Ƀok Trỏ tơbăt, sơnăm ou hlôi 84 sơnăm bơih, ưh kơ pơ̆n chă tơchĕng truh lơ̆m chăl hơrih mă đei oei lơ̆m hnam să, ‘lơ̆ng liĕm lơ lou:“Hnam so bơ̆n mưh ‘mi ‘noh hnăt hnot, mưh kial ‘noh ying yông. Hnam 'nao đei Teh đak tơgŭm ăn 60 triu hlak jên, đơ̆ng noh rim đe kôn mon kon sou ƀô̆ đô̆i Kơđông Đak Long chă ming man, ăn kơ ƀok kră ou bơ̆n xi măng păng jang tơgŭm ăn kơ ƀok. ‘Nao chă man lăp hloh 1 khei mă lei đĭ keh đang bơih. Pă băt pơma lơ liơ bơih, lăp băt bơnê kơ rim đe kôn mon kon sou ƀô̆ đô̆i vei lăng sơlam teh đak đĕch”.

Tơring sơlam Teh đak Đak Long, apŭng Đak Glei, dêh char Kon Tum đei trong sơlam teh đak hơtăih hloh 53km tơtil hăm teh đak boăl Lào. Tơring đei 2 Kơđông ƀô̆ đô̆i vei lăng sơlam teh đak ‘noh Kơđông Đak Long hăm Kơđông Rơ Long. Jang kiơ̆ nơ̆r pơrô̆ jang đơ̆ng Hơnih Đảng dêh char Kon Tum xut xa hnam pơgia, hnam hnăt hnot ăn ŭnh hnam kon pơlei, 2 kơđông iung jang hơdoi hăm Khul kơdră Đảng, Kơdră chĕp pơgơ̆r tơring Đak Long năm dăr lăng rim pơlei, xơkơ̆t hơdăh đei 24 ŭnh hnam kăl vă xut xa hnam pơgia, hnam hnăt hnot. Ƀok A Thai, Bí thư Đảng tơring Đak Long tơbăt, hăm tơdrong tơgŭm djru đơ̆ng kang ƀô̆, ƀô̆ đô̆i kơđông Ƀô̆ đô̆i vei lăng sơlam teh đak, truh năr 1/3 tơring hlôi iung jang ming man 18 tŏ hnam păng hơdrol ming man keh đang dôm hnam ou lơ̆m năr hơdrol kơ năr 30/4:“Đảng uỷ iung jang hơdoi hăm kơđông oei lơ̆m tơring jang kiơ̆ trong jang bu đei yă kiơ tơgŭm yă ‘noh. Mă kăl, ƀô̆ đô̆i vei lăng sơlam teh đak ‘nhŏng oh tơgŭm năr jang tôch kơ lơ. ‘Ngoăih vang jang kơđông jei chă krao hơvơn kang ƀô̆, ƀô̆ đô̆i tơgŭm djru hăm kon jên hu vă tơgŭm ăn kon pơlei vă kon pơlei kon kông hơdrin kĕ yak hloh dơnuh hin kơjăp ‘lơ̆ng”.

Thượng tá Đặng Nguyên Hương, Bí thư Đảng uỷ, Chinh trĭ viên Kơđông Ƀô̆ đô̆i vei lăng sơlam teh đak Đak Long, apŭng Đak Glei, tơbăt:“Jang kiơ̆ tơdrong jang xut xa hnam pơgia, hnam hnăt hnot lơ̆m tơring nhôn đei tơdrong tơchơ̆t, trong pơprŏ jang pơgơ̆r krao hơvơn lơ̆m đĭ đăng kang ƀô̆, ƀô̆ đô̆i vang iung jang kiơ̆ tơdrong jang ou. Nhôn iung jang hơdoi kơjăp hăm khul kơdră Đảng, Kơdră chĕp pơgơ̆r tơring kơ tơring Đak Long ăn kang ƀô̆ ƀô̆ đô̆i vang chơ pơdŭ tơmam drăm ming man păng vang jang ming man hnam hloi. ‘Ngoăih kơ ‘noh nhôn tơgŭm ăn xi măng krao hơvơn dôm bơngai đei jơhngơ̆m đon ‘lơ̆ng vă tơra tơgŭm ăn”.

Vang yak hơdoi hăm kơdră Đảng, Kơdră chĕp pơgơ̆r tơring kơ 13 tơring sơlam teh đak găh 4 apŭng: Đak Glei, Ngọc Hồi, Sa Thầy păng Ia H’Drai, kang ƀŏ, ƀô̆ đô̆i vei lăng sơlam teh đak dêh char Kon Tum tŏk bŏk roi năr vang iung jang, tơgop jơhngơ̆m tơgŭm kon pơlei xut xa hnam pơgia, hnam hnăt hnot.

Đại tá Lê Minh Chính, Bí thư Đảng uỷ, Chính uỷ Ƀô̆ đô̆i vei lăng sơlam Teh đak dêh char Kon Tum tơbăt, tôch môch tơring sơlam teh đak hơtăih truh 292km tơtil hăm teh đak boăl Lào păng Cam puchia đei 199 pơbŭng hnam kon pơlei hyăh hyok, hnăt hnot păng hnam kăl vă ming man ‘nao ‘noh 145 tŏ hnam. Ưh khan tơgop jơhngơ̆m iung jang hơdoi hăm kơdră tơring hrôih jang keh đang xut xa hnam pơgia, hnam hnăt hnot, kang ƀô̆, ƀô̆ đô̆i vei lăng sơlam teh đak oei kơrŭn đĭ ai tơgŭm ăn rim ŭnh hnam kon pơlei ming man đei pơbŭng hnam hăm kơjă kơ jên lơ hloh kon jên mă Teh đak tơgŭm ăn:“ ‘Ngoaih 60 triu hlak jên đơ̆ng teh đak tơgŭm nhôn oei chă krao hơvơn kon jên đơ̆ng kang ƀô̆, ƀô̆ đô̆i vei lăng sơlam teh đak dêh char Kon Tum, rim hơnih mơdro sa, rim bơngai đei jơhngơ̆m đon ‘lơ̆ng vang tơra pơm lơ liơ vă mĭnh pơbŭng hnam đei ming man hăm kon jên đơ̆ng 85, 90 triu hlak jên năm tơ̆ lơ. Pơbŭng hnam ‘noh jing hơnih ming man tôch kơ gĭt kăl hăm tơdrong hơrih sa kơ kon pơlei vă kon pơlei đei mĭnh tŏ hnam kơjăp ‘lơ̆ng păng sơđơ̆ng kơjăp đunh đai tai sơnăm ăn kon pơlei”.

Hăm tơdrong vang iung jang, tơgop jơhngơ̆m đơ̆ng kang ƀô̆, ƀô̆ đô̆i vei lăng sơlam teh đak, tơdrong ming man ‘nao, ming hơmet 199 pơbŭng hnam pơgia, hnam hnăt hnot tơ̆ 13 tơring sơlam teh đak kơ dêh char Kon Tum tŏk bŏk iung jang tĕnh koăng. Lơ̆m ou, lơ tơring hlôi jang keh đang trong tơlĕch jang xut xa hnam pơgia, hnam hnăt hnot ăn kon pơlei hơdrol năr 30/4, tơtom ăn kơkuh chơt hơ iă tơbăt 50 sơnăm năr Rơngei tơring Pơbăh, teh đak rơngei keh kong. Truh đĭ khei 2 ou ki, dêh char Kon Tum hlôi ming man kh đang 879 pơbŭng hnam lơ̆m akŏp 2.752 pơbŭng hnam pơgia, hnam hnăt hnot kăl ming man ‘nao păng ming hơmet.