Vă bơ̆ jang tơdrong jang âu, Công an dêh char krao akŏm 13 công ty ming man hăm hlŏh 700 ‘nu thơ̆ 1 năr, kŭm hăm hlŏh 300 ‘nu kăn ƀô̆, linh vang bơ̆ jang, tơgop vă jê̆ 5.500 năr jang vang ming man. Công an dôm xăh, phường vang roi tơƀôh ăn khul kơdră tơring, krao akŏm dơ̆ng 4.973 ‘nu bơngai jang tơ̆ tơring vang ming man.

Lơ̆m kơsô̆ 176 tŏ hnam, truh dang ei hlôi man đang păng pơjao 106 tŏ hnam. Hăm 70 tŏ hnam oei đei dơ̆ng, yoa dôm unh hnam ‘mĕh iŏk thim jên kơdih vă pơm hnam xă ƀiơ̆, Công an dêh char vang hơlen năng, khŏm tơgŭm trŏ bơngai, trŏ kơsô̆ jên păng năr hơgăt.

Thiếu tướng Phan Thanh Tám, Yŏng Công an dêh char Đắk Lắk pơma hơdăh, tơdrong man đang dôm tŏ hnam mă blŭng lơ̆m 1 khei ‘năr ưh đunh ưh lăp hơnhăk ba tơdrong arih xa sơđơ̆ng ‘lơ̆ng ăn tơpôl đĕch mă oei đei tơdrong vang tơgŭm đơ̆ng khul linh Công an, anih chĕp kơ̆l đảng, khul kơdră tơring mưh vei lăng năng tông truh tơdrong arih xa kơ kon pơlei, mă loi hăm dôm unh hnam hiong răm lơ đơ̆ng ‘mi kial, đak lơ̆p âu ki.”