Tơ̆ tơring Ia Hiao, dêh char Gia Lai (đêi jing đơ̆ng hơgrop 3 tơring ‘noh tơring Chrôh  Pơnan, tơring Ia Hiao păng tơring Ia Peng apŭng Phú Thiện so) tơdrong bơ̆ jang lơ̆m dôm năr hơtuch sơnăm rơ ông rơ ang hloh dơ̆ng. Lơ̆m rim trong nơnăm pơlei pơla, kang ƀô̆, đang viên hăm kon pơlei iung jang chă yuih pơgar, plang ăn teh pơih să trong nơnăm vă ming man trong ‘lơ̆ng hơ iă. Kơtă tơ̆ trong tơm mơ̆t lơ̆m pơlei Sômalơng A ‘noh hnam ƀok Siu Hiếu, Kơdră chĕp pơgơ̆r Hơnih bơ̆ jang MTTQ Việt Nam tơring Ia Hiao. Pơgar hnam tơter trong hăm minh met ioi kơjă kơjên truh kơ hrĕng triu hlak jên đei ƀok plang ăn tơdrong vă jang pơih să trong nơnăm ưh kơ đei chă drơ̆ng drơ̆t yă kiơ. Ƀok Siu Hiếu tơbăt:“Hơtŏk kơtang hơnăp jang kơ Kơdră chĕp pơgŏr Măt trân, jĭ bơngai chĕp kơ̆l lơ̆m bơ̆ jang pơrô̆ pơrôp kon pơlei găh pơm trong. Trong jang tơ̆ ou ưh khan lăp hơdrô̆ pơlei mă oei pơ đĭ lơ̆m tơring Ia Hiao. Hơpơi ăn kon pơlei jei lăp đon vang tơgŭm djru, hơpơi ăn trong nơnăm roi năr roi să păng rơgoh ‘lơ̆ng hloh dơ̆ng vă kon pơlei chă yơ yak hiôk hian hloh.”

Trong tơlĕch jang lang să trong nơnăm đei trong să đơ̆ng 3 met tŏk truh 5,5m đei tơlĕch jang kiơ̆ hrơ̆p mĭnh ‘măng. Lơ̆m lơ̆m khei ‘năr kơ đeh, 52 ŭnh hnam kon pơlei hlôi plang ăn teh vă jê̆ 4.500m2, yuih hŭt hloh 1.200m dur pơgar B40, atŭm hăm lơ ‘long sa plei, hơdroong rơmo, hnam tăh mŭk drăm, hăm akop kơjă kơ jên kơ ti hlak jên. Gơnơm đei drơ̆ng mĭnh nơ̆r ‘noh, 4 jăl trong păng thoong đak, hơtăih 2km 500 met hlôi đei ming man keh ƀlep trong tơlĕch ăn, xek tơlang keh đang đak tơ̆ng, ưh kơ rơgoh ‘lơ̆ng pơm tơnap tap ăn kon pơlei chă yơ yak lơ̆m lơ sơnăm ou ki. Kon pơlei Ia Hiao sơng iŏk trong tơlĕch jang ou hăm jơhngơ̆m đon lui kơjăp păng hơnăp jang kơtang. Ƀok Kpă Nghing, pơlei Sômalơng A, tơroi:“Khul kơdră chĕp pơgơ̆r tơring, Teh đak pơm ăn trong ba hơ iă dêh, kơ yuơ sơ̆ trong iĕ, đơ̆ng rŏng ou kơnh bơngai kơdrơ̆m, kon pơlei lơ ‘noh chă yak ưh kơ gan hiôk. Mă ƀar găh gre chă yak glĕch gloch dih băl mơmat tat. Kơna tơdrong teh đak pơm trong ‘lơ̆ng lơ lou kon pơlei lăp đon plang ăn teh hloi.”

Tơ̆ thôn Bình Trang, ƀok Nguyễn Văn Nhâm jei hưch hanh vang jang:“Atŏk tơ iung tơring tơrang ‘nao pơih să trong nơnăm ‘noh nhôn tôch lăp đon păng tơgŭm djru hloi. Dang ei pơih să trong nơnăm ‘noh kăl pơm lơ liơ, pơjing rơvơn ăn kon pơlei đei hơlŏng đak, mă ƀar dur pơgar tơ iung pơjing mă trŏ lăp kon pơlei nhôn jei lăp đon drơ̆ng nơ̆r hloi.”

“Akŏm pơrô̆ hơvơn kon pơlei plang ăn teh, pơih să rim trong nơnăm” ‘noh mĭnh lơ̆m 5 trong jang kăl hloh đei Đang ƀô tơring Ia Hiao sơkơ̆t hơdăh tơ̆ Hop akŏm tih ‘măng mă I. ‘Nou tơdrong jang đei iung jang tôch trŏ lăp hăm tơring, pơjing hơyak vă khul kơdră chĕp pơgơ̆r Đảng, khul kơdră chĕp pơgơ̆r tơring păng rim hơnih jang tơlĕch jang kiơ̆ hơdăh jing tơdrong jang tơm lơ̆m jăl jang. Lơ̆m ou, Khul drŏ kăn tơring đei pơjao iŏk jang pơrô̆ pơrôp kon pơlei - mĭnh tơdrong jang tôch tơnap tap mă lei kăl pơma sa gơh, hơdrin. Yă Trần Thị Minh Hiền, Kơdră chĕp pơgơ̆r Khul bơngai drŏ kăn tơring Ia Hiao tơbăt:“Khul drŏ kăn tơring hlôi yak năm truh hăm ŭnh hnam vă chă pơrô̆ hơvơn kon pơlei, tơbăt ăn kon pơlei băt găh trong bơ̆ jang vă pơih să trong nơnăm păng hơboong thoong đak. Tơblang hơdăh ăn kon pơlei hlôh vao ‘noh tơdrong pơih să trong nơnăm păng pơm thoong hơboong đak ưh khan lăp vă pơm ăn pơlei pơla, tơring tơrang ‘lơ̆ng liĕm păng tơ iung pơjing tơring tơrang ‘nao mă oei pơjing tơdrong rơvơn hloh dơ̆ng vă kon pơlei hơrih sa lơ̆m tơring đei trong nơnăm hiôk hian, hoei đei đak lơ̆p trong nơnăm lơm pơyan ‘mi kial.”

Hop akŏm tih jei sơkơ̆t hơdăh trong jang: Đang ƀô̆ rơgoh ‘lơ̆ng, khul kơdră chĕp pơgơ̆r tơring gơ̆t găt-gơh hơgei-iung jang tơnăp, Mặt trận hăm rim khul jang chinh trĭ-tơpôl ‘noh hơnih tơm tơgoăt tơgoăl pôm nơ̆r ƀơ̆r đon lơ̆m kon pơlei. Rim hơnih jang đei pơjao tơdrong jang hơdăh, vang iung jang tơgum djru khul kơdră tơring, pơjing đei trong bơ̆ jang ‘lơ̆ng hơ iă, hơnăp jang kơtang. Mă lei, tơdrong mơmat tat uơ oei đĕch. Ƀok Bùi Hữu Tâm, Kơ iĕng Kơdră chĕp pơgơ̆r Đảng tơring Ia Hiao tơƀôh hơdăh:“Khul kơdră chĕp pơgơ̆r Đảng tơring hlôi ƀôh hơdăh dôm tơdrong tơnap tap lơ̆m tơlĕch jang kiơ̆, jơ ‘năr iung jang păng tơlĕch kon jên tơmơ̆t jang lăp khei ‘năr truh năr 31/12/2025 kơna lơ̆m jơ ‘năr jang kiơ̆ kăl iung jang kiơ̆ dôm trong jang ‘lơ̆ng hơ iă hloh. Lơ̆m tơlĕch jang kiơ̆, hloh đơ̆ng dăr lăng hơlen ‘noh ƀôh kon pơlei jei lăp đon ngăl, tơgŭm djru tơdrong pơih să trong nơnăm păng ming hơmet pơ ‘lơ̆ng. Đơ̆ng noh drơ̆ng nơ̆r plang ăn teh, mŭk drăm ưh kơ pơkoel athei chă hrŭ ăn.”

Tơ̆ jăl trong tŏk bŏk pơih să, dôm hơnih tŏk bŏk oei ming man ... ‘noh tơƀôh hơdăh ăn jơhngơ̆m đon “Kon pơlei băt, kon pơlei pơma dơnuh, kon pơlei iung jang, kon pơlei đei iŏk yoa sa hơpăh”. Mưh trong tơlĕch jang tơm đei iung jang kiơ̆, hăm jơhngơ̆m đon pơm jŭk yŭk trong hơlou đơ̆ng kang ƀô̆, tơdrong lăp đon đơ̆ng kon pơlei gô jing jơhngơm pran kơtang hloh lang sa lơ̆m tơdrong hơrih sa. ‘Nou jei jing jơ ‘năr mă tơdrong tơchơ̆t đơ̆ng Đảng tơpă yak mơ̆t lơ̆m tơdrong hơrih, pơjing hơyak gĭt kăl hloh ăn tơplei ‘nao tơ̆ pơlei pơla.