Phường Quy Nhơn jĭ 1 lơ̆m dôm tơring tơlĕch jang hrôih tơdrong hơmet ăn pôk rơih. Đơ̆ng blŭng jăl jang, phường hlôi hơmet đang Khul pơgơ̆r păng Anih vei lăng pôk rơih phường, atŭm hăm ‘nŏh pơjing 5 khul jang đei: Khul rơih bơngai; khul pơvih pơvăn; khul roi tơbăt; khul sek tơlang tơdrong tơkêng; khul vei sơđơ̆ng păng jang pơgang. Dôm khul jang đei bơngai jang tơgŭm ngăl, pơjao hơdăh tơdrong jang, ăn rim khul grŭp, pơm ‘lơ̆ng gơ̆h kơchăng, drơ̆ng 1 nơ̆r mưh chĕp kơ̆l pơgơ̆r bơ̆ jang.

Kiơ̆ trong jang, tơ̆ phường gô đei 6 anih pôk rơih, vă pôk rơih 30 ‘nu bơngai tang măt Jơnŭm pơgơ̆r kon pơlei phường jăl jang đơ̆ng 2026–2031. Tơ̆ hop akŏm pơma nuh 'măng mă mônh, đei 48 ‘nu bơngai đei rơih chih măt lĕch pơjei. Lơ̆m noh kơsô̆ drŏ kăn đei 45,8%. Đei lơ bơngai hŏk đơ̆ng đăi hŏk tŏk tơ̆ kơpal. Kơdră chĕp kơ̆l Anih vei lăng pôk rơih phường Quy Nhơn bơ̆ jang iŏk hơlen năng hla ar hô sơ dôm bơngai lĕch pơjei kiơ̆ tơdrong hơgăt, atŭm hăm ‘nŏh kơchăng tơlĕch dôm tơdrong jang kiơ̆ tơdrong đei hơmet vă pơgơ̆r hop akŏm pơma nuh ‘măng mă 2, hơlen năng păng pơklĕm hơnăn bơngai lĕch pơjei, pơm ‘lơ̆ng bơ̆ jang trŏ năr hơgăt, trŏ trong đei tơlĕch păng lăp hăm nơ̆r athei mưh pôk rơih.

Ƀok Nguyễn Đức Toàn- Bí thư Đảng, Kơdră Anih vei lăng kon pơlei phường Quy Nhơn ăn tơbăt: “Phường Quy Nhơn rơih 48 ‘nu bơngai vă ăn kon pơlei pôk rơih pă 30 ‘nu bơngai tang măt kiơ̆ tơdrong hơgăt, pơm ‘lơ̆ng chă rơih dôm bơngai rơgei, đei jơhngâm đon ‘lơ̆ng vă pôk mât jang lơ̆m Jơnŭm pơgơ̆r kon pơlei phường vă tơgŭm ăn tơring pơjing Khul kơdră pơgơ̆r jê̆ kon pơlei, akŏm jơhngâm jang tŏk mŭk drăm - tơpôl tơ̆ tơring. Găh noh dơ̆ng, nhôn oei hơlen năng vă pơjing dôm grŭp pôk rơih tơ̆ 63 kueng kơphô̆ păng hơlen năng, chih măt dôm bơngai tăh hla tơ̆ tơring”.

Kiơ̆ trong jang, tơ̆ ‘măng pôk rơih khei 3 truh, dêh char Gia Lai đei 6 anih pôk rơih bơngai tang măt Quốc hội, tơchĕng adrol vă pôk rơih 16 ‘nu bơngai tang măt. Hăm Jơnŭm pơgơ̆r kon pơlei dêh char, lơ̆m dêh char đei 18 anih pôk rơih, vă pôk rơih 85 ‘nu bơngai tang măt, pơm lăp hăm tơdrong hơgăt, kơsô̆ bơngai vă pôk rơih.

Vă ‘măng pôk rơih gơ̆h sơđơ̆ng ‘lơ̆ng, kon pơlei pơm tơm păng đei jơnei ‘lơ̆ng, đơ̆ng hơtuch khei 11/2025, Khul kơdră chĕp kơ̆l Đảng dêh char Gia Lai hlôi pơgơ̆r hop akŏm tơlĕch trong pơgơ̆r pôk rơih tơmât hơdai lơ̆m kơmăy trư̆k tuyê̆n truh tơ̆ 135 xăh, phường. Truh dang ei, rim anih pôk rơih  đơ̆ng dêh char truh tơ̆ tơring hlôi đei hơmet pơ ‘lơ̆ng, drơ̆ng pôm nơ̆r kiơ̆ tơdrong pơtho tơƀôh păng pơgơ̆r jang tơ̆ yăn âu. Khul kơdră chĕp kơ̆l Anih MTTQ Việt Nam dêh char kŭm pơgơ̆r dôm ‘măng hop akŏm roi tơƀôh tơdrong jang găh chă rơih bơngai lĕch pơjei, drơ̆ng nơ̆r ăn 1 trong jang păng nơ̆r athei pơgơ̆r dôm ‘măng hop akŏm pơma nuh kiơ̆ tơdrong hơgăt đơ̆ng luơ̆t. Hơdai hăm ‘nŏh, tơdrong jang roi tơbăt găh pôk rơih đei tơiung pran, tơgŭm ăn bơngai tăh hla băt hơdăh hơnăp jang đơ̆ng kơdih păng dôm tơdrong hơgăt hăm bơngai vă pôk pơm bơngai tang măt.

Hrei ‘nâu, dôm tơring lơ̆m dêh char Gia Lai oei akŏm jơhngâm pơtâp pơhrăm ăn dôm anih pơgơ̆r pôk rơih, chih pơkeh hơnăn dôm bơngai lĕch pơjei kiơ̆ năr hơgăt; atŭm hăm ‘nŏh hơmet tơmam, trong jang vei lăng sơđơ̆ng lơ̆m tơpôl păng jang pơgang pơvih ăn năr pôk rơih. Ƀât blŭng khei 1/2026, Anih vei lăng pôk rơih dêh char Gia Lai pơgơ̆r ăn lơ khul jur dăr lăng tơdrong hơmet ăn pôk rơih tơ̆ dôm xăh, phường vă tơtom hơmet ming pơ ‘lơ̆ng dôm tơdrong pơmat tat, pơm ‘lơ̆ng ăn dôm tơdrong jang gơ̆h pơgơ̆r ‘lơ̆ng hơiă, trŏ luơ̆t.

Hơlen năng tơ̆ phường Quy Nhơn, ƀok Thái Đại Ngọc- Kơdră jang lơ̆m Trung ương đảng, Bí thư Đảng dêh char, Kơdră Anih vei lăng pôk rơih dêh char Gia Lai athei: “Chih hla ar găh kon bơngai mă hơdăh, tơdrong ‘nâu tôch gĭt kăl. Mă jang thoi yơ kŭm athei jang mă ‘lơ̆ng, kon bơngai athei tơpăt ‘lơ̆ng, trŏ ƀlep, mă ưh kơ lăp hơdrô̆ găh tơdrong hơgăt đĕch. Yoa ‘nâu jĭ bơngai dơ̆ng tang ăn ăn kon pơlei. Kơna athei rim anih jang chinh trĭ đơ̆ng dêh char truh tơ̆ tơring bơ̆ jang mă ‘lơ̆ng tơdrong 'nâu”.