Tơdrong tơlĕch jang đei kơsô̆ jên asong jang pơhlom 2.592 tih hlj, ming man lơ̆m hơnih teh să jê̆ 5,6 ha, lơ̆m noh teh ming man tơm đei hloh 44.000m², pah oei nai noh 'măn pơm trong nơnăm, pơtăm 'long jơk păng hơnih jang kih thuơ̆t.

Tơdrong ming man đei 8 hơbon hnam kơjung đơ̆ng 12 truh 15 tăl, đei 7 hơbon hnam oei tơpôl păng 1 hơbon hnam tĕch tơmam drăm atŭm hăm hnam rong hơ-ioh, hăm kơsô̆ pơhlom 1.570 tŏ hnam, să đơ̆ng 70 truh 77m², vă đei mah hơnih oei xa ăn pơhlom  4.500 kang ƀô̆, khul linh păng unh hnam. 'Nou jĭ tơdrong jang dơnơm lơ̆m tơdrong hơtŏk hnam oei tơpôl ăn khul Kŏng an kon pơlei, tơgop hơtŏk tơdrong hơrih, vă kan ƀô̆ khul linh sơđơ̆ng jơhngơ̆m pơm jang, tơguăt đunh đai hăm tơring.