Tơ̆ hơnăp ‘meh vă đei tơmam ming man lơ, Hơnih vei lăng kon pơlei dêh char athei rim tơring iung jang chă hơvơn khul, sơđơ̆ng tĕch ăn măh mai, sơđơ̆ng kơjă, ưh kơ lê̆ đei gơ̆t vă tĕch tŏk kơjă. Lơ̆m dêh char dang ei đei 89 pơbŭng hnam hơlih, đak jroh hŭt kăl ming man ‘nao păng vă jê̆ 300 pơbŭng hnam hư răm kăl ming hơmet. Truh dang ei, hloh 50 pơbŭng hnam hlôi đei ming man, 46 pơbung hnam tŏk bŏk ming hơmet tơ̆ 30 tơring, phương, hăm vang iung jang đơ̆ng pơ đĭ khul chinh trĭ, khul kŏng ang, ƀô̆ đô̆i păng tơpôl hơnih mơdro sa. Hơnih vei lăng kon pơlei dêh char athei rim hơnih jang iung jang dăr lăng, xek phak hăm tơdrong pơm glăi gơ̆t tơmam, hơtŏk kơjă. Kiơ̆ đơ̆ng Hơnih vei lăng tơ iung pơjing ming man Khánh Hòa, dêh char tơgŭm ăn 60 triu hlak jên lơ̆m 1 pơbŭng hnam ming man ‘nao păng klăh asong 500 tân xi măng, hơdrin ming man keh đang hơdrol năr 15/1/2026 păng ming hơmet hnam keh đang hơdrol năr 31/12/2025.