Kiơ̆ hla bơar pơchoh ăn găh tơdrong pơjing rim đang ƀô̆ găh lơ̆m Đảng uỷ Kuô̆k hô̆i, đei 11 đang ƀô̆, đei: Đảng bộ Hơnih jang dăr lăng teh đak; Đảng ƀô̆ Hơnih bơ̆ jang Kuô̆k hô̆i; Đang ƀô̆ Jơnŭm vei lăng kon kông; Đang ƀô̆ Hơnih bơ̆ jang Khôi luơt păng Tư pháp; Đang ƀô̆ Hơnih bơ̆ jang Mŭk drăm păng Jên hu; Đang ƀô̆ Hơnih jang Ƀô̆ đô̆i vei lăng sơlam teh đak, Tơdrong sơđơ̆ng păng Jang tơbôl; Đang ƀô̆ Hơnih jang vei lăng Joh ayŏ păng Tơpôl; Đang ƀô̆ Hơnih jang Khoa hŏk, Kmăi kmŏk păng Cham char; Đang ƀô̆ Hơnih jang Bơ̆ jang vei lăng khul tang măt; Đang ƀô̆ Hơnih jang Pơrô̆ pơrôp păng Dăr lăng; Đang ƀô̆ rim hơnih jang pơchoh trong, jang tơgum tơdrong jang Đang ủy Kuô̆k hô̆i.

Iung pơma tơ̆ Hop akŏm, Kơdră chĕp pơgơ̆r Kuô̆k hô̆i Trần Thanh Mẫn athei rim Đang ƀô̆ tĕnh koăng tơlĕch tơdrong jang kiơ̆ trong jang hle, khul jang ‘nao, lơ̆m ou kăl sơđơ̆ng ăn kiơ̆ yok rok jơ̆ng jang ‘lơ̆ng tơdrong bơ̆ jang, tơdrong jang jơnei kơ rim khul Đảng, Đang ƀô̆ hơdrol ou ki, ‘nĕ kơtĕch toch broch, lon tơdrong jang, pơm hơtgŏk jang ‘lơ̆ng, jơnei tôm tơdrong jang. Rim hơnih jang iung jang hơdoi kơjăp, băt hơdăh tơdrong tơnap tap, tơhlăk tơhlĭn ƀôh ‘nao vă tơtom hơmet pơ ‘lơ̆ng; tơroi tơbăt ăn kơdră kơpal lăng hơlen, kĭ tơchơ̆t mưh kăl.

Kơdră chĕp pơgơ̆r Kuô̆k hô̆i pơkă, tĕnh koăng hơmet pơ ‘lơ̆ng hơnih jang, pơjing rim chi ƀô̆, tơ iung pơjing tơdrong pơkăp bơ̆ jang, pơjao tơdrong jang hơdăh ăn rim đang viên lơ̆m khul kơdră chĕp pơgơ̆r păng tơdrong tơgoăt jang hơdoi lơ̆m bơ̆ jang hăm rim hơnih jang ƀơm truh vă tơdrong jang kơ rim đang ƀô̆ sơđơ̆ng ‘lơ̆ng, jơnei. Kăl hơnơ̆ng jang ‘lơ̆ng tơdrong jang chinh trĭ, jơhngơ̆m đon, dăr lăng kơjăp, vei lăng năng tông ‘lơ̆ng bơ̆ jang chĕp pơgơ̆r kơ rim chi ƀô̆, đang ƀô̆, sơđơ̆ng hop akŏm tơpăt ‘lơ̆ng.

Kơdră chĕp pơgơ̆r Kuô̆k hô̆i pơkă, kăl lăng truh bơ̆ jang hop akŏm chi ƀô̆, rim đang viên; trong tơgum djru hăm rim kang ƀô̆ đei ƀơm truh; pơ prŏ tơmơ̆t jang ăn kang ƀô̆ mă trŏ lăp, trŏ ƀlep hăm tơdrong jang “đơ̆ng tơdrong jang chă rơih bơngai”, rơih iŏk dôm bơngai gơ̆h hơgei, đei jơhngơ̆m đon ‘lơ̆ng.

Ou ki, Hơnih tơm Chinh trĭ tơlĕch Tơdrong tơchơ̆t 126, lơ̆m ou đei dôm tơdrong ƀơm truh Khul Kuô̆k hô̆i, Kơdră chĕp pơgơ̆r Kuô̆k hô̆i Trần Thanh Mẫn athei, Đảng ủy Kuô̆k hô̆i hrôih tơchĕng hơlen vă mưh Trung ương tơchơ̆t tơdrong hơdăh hoei sơ̆l vơ̆l.“Hơmet ming, tơmơ̆t dơ̆ng rim tơdrong tơchơ̆t kơ Đảng, khôi luơ̆t kơ Teh đak, trong jang, trong tơgŭm djru đei ƀơm truh tơdrong khôi luơ̆t tơlĕch jang keh kong trong bơ̆ jang khul chinh trĭ. Nhen Tổng bí thư Tô Lâm pơma, jơ rơvơn gĭt kăl hloh vă hơmet ăn Hop akom tih kơ Đảng rim hơnih, yak truh Hop akom tih lơ̆m teh đak kơ Đảng; hơnơ̆ng hơmet pơ ‘lơ̆ng rim hơnih jang; tơ iung pơjing trong jang hơnơ̆ng hơmet pơ’lơ̆ng tơring trŏ lăp hăm trong chĕp pơgơ̆r ‘nao; Pơchoh trong hơkrop jing minh kơ mĭnh ƀar hơnih jang lơ̆m dêh char; hơmet ming, tơmơ̆t dơ̆ng rim tơdrong tơchơ̆t khôi luơ̆t, tơdrong tơchơ̆t kơ Đảng đei ƀơm truh tơdrong hơmet pơ ‘lơ̆ng khul jang “truh hloi rim hla bơar tơchơ̆t kăl nhen hơmet ming Khôi luơ̆t tơm", Khôi luơ̆t pôk rơ̆ih … lơ̆m khei năr kơnh”.

Kơdră chĕp pơgơ̆r Kuô̆k hô̆i Trần Thanh Mẫn ‘meh vă, rim kơdră đảng kơ rim Đang ƀô̆ đei pơjing năr ou kăl jang kiơ̆ ‘lơ̆ng hơnăp jang chĕp pơgơ̆r tôm tong, jơnei lơ̆m jang kiơ̆ tơdrong jang chinh trĭ kơ Khul chĕp pơgơ̆r, rim Hơnih bơ̆ jang, rim hơnih jang kơ Kuô̆k hô̆i; sơđơ̆ng rim tơdrong kăl đei khul kơdră chĕp pơgơ̆r đang lăng hơlen, ăn tơgop nơ̆r hơdrol tơlĕch jang kiơ̆, lơ̆m ou tơlĕch jang kiơ̆ kơtang rim trong tơlĕch jang, hơnơ̆ng tơplih ‘nao trong jang khôi luơ̆t, sơđơ̆ng ăn kơchăng, hơlen kơhret, ‘lơ̆ng, trŏ lăp hăm tơdrong  jang yan ou; pơm hơtŏk jang ‘lơ̆ng dăr lăng păng tơblang hơdăh, atŏk kơtang trong jang tơblang hơdăh, tơgoăt iŏk nơ̆r tơgop kơdră tang măt Kuô̆k hô̆i păng kon pơlei; pơm hơtŏk jang ‘lơ̆ng tơchơ̆t tơdrong kăl kơ teh đak kiơ̆ trong roi năr roi trŏ lăp, tơtom; chă tơchĕng hơlen, pơm pơjing trong jang tơgŭm djru tơplih kơsô̆, tơplih rơgoh ‘lơ̆ng, jang kiơ̆ kmăi kmŏk hơgei, pơtrŭt kơtang pơjing tơdrong jang, tơplih ‘nao tơchăr...

Ham trong “Kơdou răh pơrĕng rah” kăl bơ̆ jang mă hơlen, mă kơchăng tôch kơ brĕ; iung jang mă lei ưh pơhơi, Kơdră chĕp pơgơ̆r Kuô̆k hô̆i hơmŏ păng lui akhan, pơjing khul Đang ƀô̆ Kuô̆k hô̆i pơma atŭm păng rim Đang ƀô̆ găh hơnih ou pơma hơdrô̆ gô iung jang hơdoi kơjăp, jang kiơ̆ ‘lơ̆ng tơgoăt pôm nơ̆r ƀơ̆r đon, hơtŏ hơnơ̆ng, tơpăt, hơnăp jang ‘lơ̆ng, tơplih ‘nao, tơchăr hơ iă vă hơdrin jang keh đang ‘lơ̆ng rim tơdrong jang, tơgop lơ̆m rim tơdrong iŏk đei jơnei atŭm kơ lơ̆m teh đak.