Kueng kơphô̆ 6, phương Quy Nhơn dang ei đei  67 tong duk hăm hloh 200 bơngai jang ka hơnơ̆ng rôp you ka đunh năr tơ̆ đak dơsĭ. Dôm năr tơjê̆ ou, ah mă duk rôp ka chôt vih đơ̆ng rŏng kơ 'măng chă rôp you ka tơ̆ đak dơsĭ, yă Mai Thị Gái, Kơdră Hơnih jang Măt trâ̆n kueng kơphô̆ 6 năm truh dơnŏk duk dơ̆ng vă tơroi tơbăt gah năr pôk rơih. Tơ̆ ou, yă asong hla bar chih tơroi gah jơ năr pôk rơih, atŭm hăm noh hơvơn kon pơlei kơchăng asong jơ năr năm pôk rơih jang tơnăp sơnong jang kơ bơngai tah hla. Hăm duk rôp you ka tŏk bŏk oei pơm jang tơ̆ đak dơsĭ, yă hơvơn unh hnam tơ-'ngla duk kiơ̆ kơmăi kơmŏk tơroi tơbăt vă tơƀlŏk ăn bơngai jang ka dah hrôih 'nhăk duk vih tơ̆ kông, akŏm năm pôk rơih. Yă Mai Thị Gái ăn tơbăt: “Rim năr, jơnŭm pơgơ̆r pôk rơih asong bơngai jang năm truh rim unh hnam kon pơlei chă tơroi tơbăt, hơvơn kon pơlei asong jơ năr vă năm pôk rơih. Rim bơngai lĕch măt tơgar tơ̆ phương Quy Nhơn adoi đei tơroi tơbăt ăn vă kon pơlei jang ka băt hơdah tơdrong kăp gĭt, rơih iŏk dôm bơngai tơgăl pôk jang lơ̆m Kuô̆k hô̆i”

Đei tơroi tơbăt kơtă, lơ kon pơlei băt hơdah hloh tơdrong kăp gĭt kơ hla kơphĭu păng kơchăng năm akŏm pôk rơih. Bơngai jang ka Nguyễn Văn Tuấn, tơ̆ tơring kơphô̆ 6, phương Quy Nhơn ăn tơbăt, 'nhŏng oh lơ̆m duk hlôi pơdơh tơdrong jang kơchăng vă dah tom vih tơ̆ kông trŏ ah năr pôk rơih: “Hơmet truh năr pôk rơih 15/3, inh adoi pơm kiơ̆ ƀlep, gô pơdơh minh năr vă ah pơgê hrôih năm pôk rơih tơ̆ tơring”

Atŭm hăm dôm trong tơroi tơbăt ƀôh kơtă nhen pano, áp phích tơ̆ tơring pôk rơih păng dôm jăl trong dơnơm, jơnŭm pơgơ̆r tơring oei hơtŏk kơtang tơdrong tơroi tơbăt kơtă tơ̆ dơnŏk duk oei, tơgŭm ăn kon pơlei jang ka hlôh vao hơdah hloh tơdrong kăp gĭt kơ tơdrong pôk rơih.

Gơnơm đơ̆ng noh, lơ kon pơlei hlôi kơchăng asong jơ năr vih tơ̆ kông vă năm tah kơphĭu. Ƀok Nguyễn Đức Toàn, Kơdră Hơnih Pôk rơih phương Quy Nhơn ăn tơbăt, tơring hlôi tơlĕch lơ trong pơm jang vă vei sơđơ̆ng ăn kon pơlei jang ka, dôm bơngai tah hla hơnơ̆ng lĕch tơ̆ đak dơsĭ đunh năr adoi oei gơh jang tôm sơnong pôk rơih kơ po: “Lơ kon pơlei jang ka đei hnam oei tơ̆ tơring. Dôm kueng kơphô̆ păng hơnih pôk rơih hlôi pơtruh ăn rim unh hnam. asong theh kư tri, păng mă kăl noh asong hla kơ ăn kon pơlei jang ka vă sô̆ hơ-iă hăm năr pôk rơih. Rim unh hnam adoi tơroi tơtom vă kon pơlei băt, asong jơ năr vih tơ̆ kông ah năr 15/3 vă năm pôk rơih kiơ̆ tơchơ̆t tơlĕch”

Kiơ̆ kơ ƀok Bùi Duy Ninh, Phŏ Kơdră Hơnih jang vei lăng kon pơlei phương Quy Nhơn Đông, tơdrong jang tơroi tơbăt hơvơn kon pơlei jang ka năm akŏm pôk rơih đei tơrĕk kăp gĭt. Phương hlôi pơgơ̆r dôm tơring oei xa, khul pôk rơih jang atŭm hăm dôm khul jang ka băt hơdah tơdrong rôp you ka tơ̆ đak dơsĭ đơ̆ng kon pơlei vă chă tơroi tơbăt trŏ ƀlep.

Atŭm hăm noh hơtŏk chă tơroi tơbăt kiơ̆ aloa pơre nơ̆r, tơdrong akŏm hŏk hôp kon pơlei păng kơtă tơ̆ dơnŏk ka, dơnŏk duk dăng oei: “Kon pơlei jang ka lơ̆m phương đei lơ măt bơngai lơ̆m tơring kon pơlei oei xa păng hơnơ̆ng năm tơ̆ đak dơsĭ đunh khei năr kơyuơ noh tơdrong tơroi tơbăt ăn kon pơlei jang ka đei tơring tơrĕk kăp gĭt. Atŭm hăm noh, hơvơn kon pơlei jang ka asong jơ năr năm rôp ka tơ̆ đak dơsĭ mă trŏ ƀlep vă năm tah kơphĭu tôm măt”

Hăm tơdrong vang jang đơ̆ng tôm hơnih jang chĭnh trĭ, kon pơlei jang ka tơ̆ dôm tơring tơjih đak dơsĭ kơ dêh char Gia Lai hlôi băt hơdah sơnong jang kơ po, kơchăng asong jơ năr năm truh hăm năr akŏm tôm kon pơlei. Hla kơphĭu kơ kon pơlei jang ka tơ̆ đak dơsĭ gô tơgop kăp gĭt ăn tơdrong đei jơnei đơ̆ng tơdrong pôk rơih truh ou kơnh.