Lăng truh Hop akŏm tih mă XIV ưh khan lăp tơdrong gôchang mă oei hăm dôm tơdrong iung jang hloi, tơdrong jang tơpă tơklep hăm tơdrong hơrih sa kơ kon pơlei. Tơ̆ lơ tơring kơ dêh char Dak Lăk, tơdrong jang tơ iung pơjing hơrih sa ‘lơ̆ng, hơmet ming pơlei pơla, vei kơjăp cham char, tơ iung pơjing jơhngơ̆m đon tơgoăt tơgoăl pôm nơ̆r ƀơ̆r đon hơdrĕch hơdrung đei atŏk kơtang nhen dôm “hơnih ming man jơhngơm đon kon pơlei” kơkuh chơt hơ iă Hop akom tih. Tơ̆ Koeng kơphô̆ 6A, phương Thành Nhất, jơ ‘năr kơkuh chơt hơ iă Hop akŏm tih mă XIV đei tơƀôh hơdăh kiơ̆ rim tơdrong jang kơ yuơ chi ƀô̆ păng koeng kơphô̆ tơlĕch ăn. Ƀok Nguyễn Ngọc Thu, Bĭ thư Chi ƀô̆, Kơdră chĕp pơgơ̆r Koeng kơphô̆ 6A tơbăt:"Yak truh Hop akŏm tih kơ Đảng ‘măng mă XIV, Koeng kơphô̆ 6A hlôi tơlĕch iung jang tơdrong jang tơ iung pơjing tơdrong hơrih sa ‘lơ̆ng hơ iă. Pơm trong hla kơ păng pơrô̆ hơvơn kon pơlei pơm trong koeng kơphô̆ hơdăh ang rang ‘lơ̆ng vă kơkuh chơt hơ iă Hop akŏm tih. Kon pơlei tôch hơmŏ kơtang păng lui kiơ̆ kơjăp lơ̆m Hop akŏm tih ou păng tôch chơt hơ iă ‘nă hal. Hơpơi ăn Hop akŏm tih gô jơnei hloh dơ̆ng, hơnhăk đei iŏk yoa sa hơpăh ăn kon pơlei."

Tơ̆ rim pơlei pơla kon kông, mă kăl tơring sơlam teh đak, jơhngơ̆m đon lăng truh Hop akŏm tih đei ranh kơtang, mă kăl lơ̆m khul đoàn viên, hơdruh tơdăm hơpơi ‘meh vă atŏk tơ iung, pơjing tơdrong jang. Tơ̆ ƀuôn Drang Phốk, tơring Buôn Đôn, hơdruh tơdăm rơih trong iung jang kơkuh chơt hơ iă Hop akŏm tih hăm iung jang hơdăh, tơklep hăm tơdrong tơ iung pơjing pơlei pơla oei sa gơh găt, atŏk tơ iung kơjăp iăp kơtang. Mŏ H Ly A Knul, Ƀĭ thư Chi đoàn ƀuôn Drang Phốk, tơring Buôn Đôn, dêh char Dak Lăk tơbăt:“Khul đoàn viên hơdruh tơdăm ƀuôn Drang Phốk hlôi tơlĕch jang chă hơpuih hơmet pơ ‘lơ̆ng pơlei, pơtho tơbăt ăn kon pơlei vă kơkuh chơt hơ iă ăn Hop akŏm tih kơdră tang măt lơ̆m teh đak ‘măng mă 14 kơ Đảng. Nhôn hơmŏ hop akom tih truh ou kơnh gô đei lơ trong jang tơgŭm djru ăn hơdruh tơdăm tơring sơlam teh đak đei rơvơn pơjing tơdrong jang păng atŏk tơ iung mŭk drăm ăn unh hnam păng pơlei pơla”.

Đơ̆ng dôm tơdrong jang kơtang păng tơpă đei ƀôh, Hop akŏm tih ‘măng mă XIV jĭ hơnih gơnang ăn jơhngơ̆m đon lui, jĭ hơnih hơmŏ găh dôm trong jang trŏ lăp, mă kăl hăm tơring kon kông, tơring hơtăih yăih, tơring sơlam teh đak.

Atŭm hăm kon pơlei, khul kang ƀô̆ tơring - dôm bơngai iung jang hloi trong bơ̆ jang đơ̆ng Đảng lơ̆m tơdrong hơrih sa - jei tŏk bŏk lăng tông nông gia kơjăp truh Hop akŏm tih hăm jơhngơ̆m đon hơmŏ kơtang. Tơ̆ phương Ea Kao, tơdrong hơmŏ ‘noh tơklep kơjăp hăm tơdrong pơkoel tơplih ‘nao kơtang trong chĕp pơgơ̆r, pơm pơkeh trong bơ̆ jang ‘lơ̆ng, pơjing đei hơyak kăl ăn kang ƀô̆ pơ̆n tơchĕng, pơ̆n iung jang, pơn chiu pŭ tơ̆ hơnăp tơdrong jang kơ yuơ tơdrong atŏk tơ iung kơ tơring. Ƀok Đặng Gia Duẩn, Ƀĭ thư Đảng phương Ea Kao, dêh char Dak Lăk tơbăt:" Hop akŏm tih gô pơma dơnuh dih băl dôm tơdrong kăl kơ teh đak, lơ̆m ou nhôn tôch hơpơi ‘meh vă đei dôm tơdrong lăng ba kơjăp hloh dơ̆ng ăn kang ƀô̆ tơring, phương. Mă đơ̆ng kang ƀô̆ tơring hơdrol ou ki dăh mă kang ƀô̆ lơ̆m dêh char, lơ̆m apŭng mơ̆t jang ‘noh kiơ̆ kơ ĭnh lơm rim kang ƀô̆ jei oei vei kơjăp jơhngơ̆m đon hơpơi ‘meh vă ăn tơring bơ̆n atŏk tơ iung. Lơ loh tơdrong pơm hơtŏk jơhngơ̆m ranh kơtang hơpơi ‘meh vă ‘noh kăl đei trong tơlĕch jang kơtang trŏ lăp vă kang ƀô̆ iung jang ‘lơ̆ng, atŭm hăm pơjao jang hơdăh vă mưh jang kiơ̆ dôm trong tơlĕch jang, tơdrong tơgŭm djru ‘lơ̆ng hơ iă vă tơring bơ̆n atŏk tơ iung kơtang."

Đơ̆ng tơring kơdrơ̆m truh tơring choh jang sa, đơ̆ng tơring tơmăn truh tơring sơlam teh đak, dôm jơhngơ̆m đon hơpơi ‘meh vă ‘noh tŏk bŏk akŏm đei mĭnh trong yak atŭm: jơhngơm đon lui kơjăp lơ̆m Đảng, lơ̆m trong atŏk tơ iung kơ teh đak lơ̆m chăl ‘nao. Hăm Dak Lăk-tơring đei lơ hơdrĕch hơdrung hơrih sa, đei lơ tơdrong ‘lơ̆ng hơ iă mă lei jei ƀĕnh ƀang tơdrong long-Hop akŏm tih ‘măng mă XIV đei kon pơlei gôchang hơmŏ kơtang gô pơjing đei dôm trong tơlĕch jang kăl, pơjing đei hơyak pran ‘nao vă Dak Lăk pơma hơdrô̆ păng rim tơring lơ̆m teh đak pơma atŭm atŏk tơ iung tĕnh koăng păng kơjăp ‘lơ̆ng lơ̆m chăl ‘nao.