Pơyan ‘mi kial sơnăm sơ̆, dôm ‘măng ‘mi kial hơbŭt pơm ăn hnam đe yă Nguyễn Thị Dung (kueng Sơn Hà, thị trấn Na Dương, apŭng Lộc Bình, dêh char Lạng Sơn) roi hơprem, hiăh hiok hlŏh dơ̆ng. Mât lơ̆m pơyan yă Rak, kial tơngiĕt thu hơ hĕu mât lơ̆m hnam hiăh, iĕ ioch kơ unh hnam. Mă đơ̆ng đĭ adrin mong răk lơ sơnăm bơih ră mă lei tơdrong pơmat tat oei hơnơ̆ng kơna đon hơpơi ‘mĕh đơ̆ng unh hnam yă Dung găh 1 tŏ hnam kơjăp ‘lơ̆ng rŏ năng gô ưh kơ đei...

Mă lei, Tết ‘nâu đei sơng sơnăm ‘nao lơ̆m hnam xă hlŏh 40 m2 đei tơnăr man, hơnă ximăng, bơbung kem kơjăp ‘lơ̆ng pơm ăn yă Dung tôch hơiă, lơ măng tep kơsuk yoa pơnơ̆h dêh hnang: “Klo inh pơ̆k jo jăn đơ̆ng sơnăm 1991, inh ‘nŏh jĭ iăn prăt sơnăm, mŏ mai inh pơ̆k pham blŭh tơ̆ ‘ngok lôch đunh kơ âu 2 sơnăm bơih, lăp hơdrô̆ kon drŏ nglo inh đĕch chă jang kơ đe rong 5 ‘nu bơngai kơna tơdrong arih xa tôch pơmat tat. Đơ̆ng đei trong jang sut pơđĭ hnam hiăh hiok, Đảng, teh đak, Anih tơm vei lăng Công an, dôm anih jang kơpal, khul grŭp tơpôl, bơngai đei đon ‘lơ̆ng vang tơgŭm, man ăn unh hnam nhôn hnam ‘nâu, unh hnam tôch čhôk ‘nă.”

Hăm jơhngâm đon “ưh đei hŭt hơchăng bu tơ̆ rŏng”, apŭng Lộc Bình, dêh char Lạng Sơn oei hơtŏk hrĕnh tơdrong jang man 292 tŏ hnam ăn dôm unh hnam tơnuh, vă jê̆ tơnuh, unh hnam đei kŏng. 1 pôm hnam man hăm kơsô̆ jên 110 triu, lơ̆m noh Anih tơm vei lăng Công an tơgŭm 70 triu. Ƀok Trịnh Tuấn Đông, Kơdră vei lăng kon pơlei apŭng Lộc Bình, dêh char Lạng Sơn ăn tơbăt, dôm tơring lơ̆m apŭng oei hăt ming man vă gơh jang đang trŏ hăm tơdrong hơgăt: “Tơdrong tơlĕch jang sut pơđĭ hnam hiăh hiok ‘nŏh jĭ trong jang tih đơ̆ng Đảng păng teh đak păng tôch gĭt kăl, tơgŭm ăn kon pơlei mă loi jĭ dôm unh hnam tơnuh, vă jê̆ tơnuh, unh hnam đei kŏng đei xa yoa tơdrong tơgŭm đơ̆ng rim anih jang kơpal. Nhôn vang tơgop jơhngâm vă sut pơđĭ hnam hiăh hiok, hơnhăk ăn kon pơlei hnam ‘nao ƀlep ƀât sơng sơnăm plơ̆ng. Lơ̆m khei ‘năr tơlĕch jang nhôn krao hơvơn đĭ đăng kon pơlei tơ̆ tơring, kiơ̆ jơhngâm đon bu đei yă kiơ tơgop yă ‘nei, vă pơm thoi yơ man đei 292 tŏ hnam tơgŭm ăn kon pơlei sơng xa Tết Nguyên đán chơt hơiă ‘nă hal.”

Jô̆ truh ‘năr 17/12/2024, Anih MTTQ Việt Nam dêh char Lạng Sơn sơng iŏk đei hlŏh 77 ti hlak jên, lơ̆m noh đĭ tơlĕch ăn dôm apŭng man hnam ‘nao ăn dôm unh hnam pơmat tat hăm kơsô̆ jê̆ vă jê̆ 51 ti bơih. Akŏm đĭ đăng kơsô̆ unh hnam đei tơgŭm man hnam oei ‘nŏh hlŏh 2.400 unh hnam, hlôi man đei hlŏh 80% kơsô̆ hnam. 

Ƀok Hồ Tiến Thiệu, Kơdră Anih vei lăng kon pơlei dêh char Lạng Sơn pơma hơdăh, dêh char adrin sut pơđĭ vă jê̆ 2.500 tŏ hnam hiăh hiok ăn dôm unh hnam tơnuh, vă jê̆tơnuh, unh hnam đei kŏng arih xa pơmat tat... adrol kơ khei 4/2025: “Nhôn akŏm jơhngâm bơ̆jang tôch ai vă sut pơđĭ hnam hiăh hiok lơ̆m sơnăm 2024-2025, chă mong akŏm jên tơmam đơ̆ng tơpôl, hăm kơsô̆ jên dang 160 ti. Hrei ‘nâu tơdrong jang tŏk bŏk tơlĕch jang tôch pơneh, trŏ trong jang, nơ̆r pơtho đơ̆ng Thủ tướng ‘nŏh pơjing tơdrong bơ̆ jang ăn đĭ đăng tơpôl, vă rim bơngai vang tơgop jơhngâm ưh hơdrô̆ lăp lê̆ 1 khul yơ ‘noh bơ̆jang đĕch ôh, tơdrong jang hlôi păr ang jơ̆p jang, pơjing đei đon lui, tơdrong chơt hơiă ăn kon pơlei. ‘Nâu jĭ tơdrong jang tôch gĭt kăl, tôch ‘lơ̆ng hơiă, tơƀôh hơdăh đon pơngơ̆t đơ̆ng Đảng păng teh đak hăm kon pơlei, mă loi jĭ hăm dôm unh hnam pơmat tat. Dôm unh hnam mă tam mă đei hnam kơjăp ‘lơ̆ng ‘nŏh truh Tết Ất Tỵ âu gô đei hnam ‘nao, ‘nâu jĭ tơdrong pơlung tih, jĭ jơhngâm chơt hơiă tih hăm lơ unh hnam pơmat tat lơ̆m dêh char.”

Pơyan Puih mak ‘nao vă truh bơih, lơ “Hnam man tơgŭm ăn bơngai pơmat tat" đei man ưh lăp tơƀôh hơdăh jơhngâm đon ‘lơ̆ng, băt ‘mêm băl, tơgŭm băl lơ̆m tơpôl đĕch mă oei jing tơdrong ‘lơ̆ng vă pơlung, tơiung dơ̆ng jơhngâm hưch hanh ăn kon pơlei tơ̆ dêh char sơlam groi kông Lạng Sơn hơđơ̆ng jơhngâm jang xa, vei lăng ‘lơ̆ng tơdrong arih, jang tŏk klăih đơ̆ng tơnuh hin./.