Kơdră chĕp pơgơ̆r Kuô̆k hô̆i Trần Thanh Mẫn pơma hơdăh: ‘nou jing ‘măng hop akŏm mă blŭng lơ̆m sơnăm 2025, đei pơgơ̆r lơ̆m jơ ‘năr jơ̆p tơring lơ̆m teh đak chơt hơ iă ăn kơ Đảng, chơt hơ iă kơ Puih mak păng pơgơ̆r lơ tơdrong jang chơt hơ iă Têt Nguyên đán Ất Tỵ, tơbăt 95 sơnăm Năr pơjing Đảng Cộng sản Việt Nam. Adoi, Kuô̆k hô̆i păng Jơnŭm vei lăng kon pơlei rim hơnih pơgơ̆r rim tơdrong jang tơbăt 79 sơnăm Năr Pôk rơih blŭng a Kuô̆k hô̆i Việt Nam. Pơma hơdăh, tơdrong jang lơ̆m sơnăm 2025 jĭ tôch kơ lơ, Kơdră chĕp pơgơ̆r Kuô̆k hô̆i pơma hơdăh, lơ̆m jăl I sơnăm ou akŏm pơgơ̆r ‘Măng hop akŏm hăt hot ‘măng mă 9:"Bơ̆n akŏm, kơrŭn jơhngơ̆m ăn ‘Măng hop akŏm hăt hot lơ̆m vă đĭ khei 2. ‘Măng hop akom Kuô̆k hô̆i gô hop akŏm ưh kơ jô̆ jơ ‘năr dôm yơ mă lei kăl lăng truh pơm lơ liơ pơgơ̆r keh đang vă pơdrơ̆ng kiơ̆ dôm tơdrong hơmet ming rim khôi luơ̆t, tơdrong tơchơ̆t kơ Kuô̆k hô̆i tơgŭm ăn tơdrong hơlen hơdăh pơtôch jang kiơ̆ Tơdrong tơchơ̆t 18 găh pơm kơtoei khul kơdră chĕp pơgơ̆r, bơ̆ jang ‘lơ̆ng, jơnei lơ̆m khei năr kơnh".

Hơnih bơ̆ jang Khul kơdră chĕp pơgơ̆r Kuô̆k hô̆i lăng hơlen hla bơar chih tơbăt bơ̆ jang hơlen tơdrong tơgop đơ̆ng kon pơlei kơ Kuô̆k hô̆i khei 12/2024. Kơdră chĕp pơgơ̆r Hơnih jang hơlen tơdrong tơgop nơ̆r đơ̆ng kon pơlei Dương Thanh Bình tơbăt: Bơngai tăh hla păng kon pơlei lăp đon kơtang hơnơ̆ng pơrô̆ jang kiơ̆ Tơdrong tơchơ̆t 18 găh hơmet pơ ‘lơ̆ng pơm kơtoei  hơnih jang lơ̆m khul jang chinh trĭ. Bơngai tăh hla păng kon pơlei hơpơi hrôih đei khul kơdră bơ̆ jang kơ rim hơnih jang Đảng, teh đak, rim hơnih jang đơ̆ng Trung ương truh tơ̆ tơring kơtoei, gơ̆h hơgei, bơ̆ jang tơnăp, jơnei hơ iă.

Hơnih bơ̆ jang Khul kơdră chĕp pơgơ̆r Kuô̆k hô̆i ăn tơgop nơ̆r lơ̆m trong vă pơjing Tơdrong tơchơ̆t găh pơgơ̆r tơƀơ̆p pơma dơnuh hăm bơngai tăh hla đơ̆ng Kơdră tang măt Kuô̆k hô̆i păng kơdră tang măt Jơnŭm vei lăng kon pơlei. Lơ nơ̆r tơgop đơ̆ng rim kơdră jang lơ̆m Hơnih bơ̆ jang Khul kơdră chĕp pơgơ̆r Kuô̆k hô̆i oei pơngơ̆t găh tơdrong Khul kơdră chĕp pơgơ̆r Hơnih bơ̆ jang Măt trân Tổ quốc Việt Nam tơring pơgơ̆r Hop akŏm tơƀơ̆p pơma dơnuh hăm bơngai tăh hla. Kơdră chĕp pơgơ̆r Hơnih bơ̆ jang Khôi luơ̆t Hoàng Thanh Tùng tơbăt hơdăh: "Khul kơdră chĕp pơgơ̆r Hơnih jang MTTQ Việt Nam tơring ưh khan tơring ayơ jei  iung bơ̆ jang jơnei ‘lơ̆ng hơ iă ngăl ôh, mă kăl hăm tơring hơtăih yăih, tơring oei lơ tơdrong tơnap tap. Kơna tơdrong tơchơ̆t sơkơ̆t hơdăh pơgơ̆r Hop akom tơƀơ̆p pơma dơnuh hăm bơngai tăh hla tơ̆ tơring  lơ̆m tơdrong tơchơ̆t pơjao hloi ăn Khul kơdră chĕp pơgơ̆r hơnih bơ̆ jang MTTQ Việt Nam tơring pơm tơm, iung jang hơdoi hăm MTTQ apŭng păng rim hơnih bơ̆ jang, pơgơ̆r tơƀơ̆p pơma dơnuh hăm bơngai tăh hla rŏ năng đei mĭnh ƀar hơnih jang bơ̆ jang ư kơ kĕ ƀlep tơdrong tơchơ̆t, pơm ưh kơ ‘lơ̆ng truh tơdrong ‘lơ̆ng hơ iă lơ̆m ‘măng pơgơ̆r tơƀơ̆p pơma dơnuh hăm bơngai tăh hla".

Tơ̆ hop akom, 100% bơngai jang lơ̆m Hơnih bơ̆ jang Khul kơdră chĕp pơgơ̆r Kuô̆k hô̆i hlôi pơdrơ̆ng kiơ̆ Tơdrong tơchơ̆t sơkơ̆t hơdăh tơdrong pơgơ̆r tơƀơ̆p pơma dơnuh hăm bơngai tăh hla đơ̆ng Kơdră tang măt Kuô̆k hô̆i păng kơdră tang măt Jơnŭm vei lăng kon pơlei. Tơdrong tơchơ̆t sơkơt hơdăh găh sơnong jang păng hơnăp jang kơ rim hơnih bơ̆ jang lơ̆m tơƀơ̆p pơma dơnuh hăm bơngai tăh hla; bơ̆ jang, trong pơgơ̆r tơƀơ̆p pơma dơnuh hăm bơngai tăh hla; Chih akŏm dôm nơ̆r tơgop đơ̆ng bơngai tăh hla; mă kăl sơkơ̆t hơdăh hơnăp jang kơ rim hơnih bơ̆ jang lơ̆m xek tơlang tơblang hơdăh dôm nơ̆r tơgop đơ̆ng bơngai tăh hla; tơƀôh tơbăt hơdăh xek tơlang dôm nơ̆r tơgop đơ̆ng bơngai tăh hla păng dăr lăng tơdrong xek tơlang nơ̆r tơgop đơ̆ng bơngai tăh hla.

Rim kơdră jang lơ̆m Hơnih bơ̆ jang Khul kơdră chĕp pơgơ̆r Kuô̆k hô̆i  jei pơma tơbăt dôm tơdrong tim mă trŏ lăp kăl đei rim hơnih bơ̆ jang đei trong bơ̆ jang ‘lơ̆ng hloh dơ̆ng lơ̆m khei năr ou kơnh nhen tơmam drăm tŏk kơjă, tơdrong tơhlăk trong nơnăm, tơdrong tĕch mơdro, mong răk, iŏk yua glăi găh kơmlăi ... Kơ iĕng Kơdră chĕp pơgơ̆r Kuô̆k hô̆i Nguyễn Đức Hải athei tĕnh koăng tơlĕch jang kiơ̆ hloi Khôi luơ̆t Groi teh sơnăm 2024:"Bơ̆n tŏk bŏk tơlĕch vă jang kiơ̆ khôi luơ̆t groi teh ‘noh kon pơlei tôch kơ chơt hơ iă. Mă lei găh tơdrong đei ƀơm truh hơmet ming kơjă teh; đei ƀơm truh tơdrong tơchơ̆t pơm tơ-‘ngla teh rim tơring ... hrei ou oei đei lơ hla bơar tim mă pơm keh đang. Bơ̆n pơtrŭt kơtang bơ̆ jang pơm hla bơar drơ̆ng nơ̆r pơm tơ-‘ngla teh, tơdrong mă ou kăl iung jang hơdoi mă kơtang hlŏh dơ̆ng, ‘lơ̆ng hloh dơ̆ng đơ̆ng rim hơnih bơ̆ jang. ‘Moi kiơ̆ mĭnh khôi luơ̆t hle, trong jang hle tơmơ̆t jang kiơ̆ păng kon pơlei tŏk bŏk gô chang".

Hơnih bơ̆ jang Khul kơdră chĕp pơgơ̆r Kuô̆k hô̆i  athei Khul kơdră chĕp pơgơ̆r Teh đak pơrô̆ athei rim hơnih tơm, hơnih bơ̆ jang ƀơm truh, khul kơdră chĕp pơgơ̆r tơring lăng ba kơjăp bơ̆ jang hơmet ăn tơmam drăm tơgŭm ăn tĕch mơdro lơ̆m khei ‘năr Têt Nguyên đán; Hơnih tơm vei lăng trong nơnăm atŏk kơtang iung jang dăr lăng hơlen tơdrong jang kiơ̆ tơƀôh tơbăt hơdăh kơjă hao gre. Hơnih tơm Kŏng ang dăr lăng kơjăp, pơm dă ƀiơ̆ đei tơdrong sar bar trong nơnăm, mă kăl ‘noh gre chơ tơmoi, chơ tơmam drăm gô tŏk kơtang vă tơtom tơgŭm ăn jơ ‘năr Têt Nguyên đán.