Tơdrong pơgơ̆r "Puih mak Ƀô̆ đô̆i vei lăng sơlam Teh đak - Chhơp jơhngơ̆m kon pơlei" puih mak Ất Tỵ 2025 ‘nao đei Khul kơdră chĕp pơgơ̆r Ƀô̆ đô̆i vei lăng sơlam teh đak dêh char Gia Lai pơgơ̆r tơ̆ tơring Ia Pnôn, apŭng Đức Cơ, hăm lơ tơdrong pơgơ̆r ‘lơ̆ng hơ iă nhen: “Jơnŭm kơchơ Têt 0 hlak jên”, tơdrong pơgơ̆r ‘nŭng ƀĕng chưng păng pơgơ̆r joh ayŏ kơdŏ soang chơt hơ iă teh đak tơplih ‘nao, chơt hơ iă kơ Đảng, chơt hơ iă kơ Puih mak Ất Tỵ 2025. Tơ̆ ou, Khul kơdră chĕp pơgơ̆r Hơnih Ƀô̆ đô̆i vei lăng sơlam teh đak dêh char Gia Lai hlôi pôk ăn 100 tơnô̆ tơmam drăm ăn ŭnh hnam đei iŏk yua ăn Teh đak hăm ŭnh hnam tơnap tap. Adoi, 20 ‘nu oh lơ̆m tơdrong jang “Ba oh năm tơ̆ hnam trương” păng kon rong rim kơđông ƀô̆ đô̆i ve lăng sơlam Teh đak hlôi đei sơng iŏk tơmam drăm Têt. Đei pôk ăn tơmam drăm, ‘nhŏng Siu Kỳ, oei tơ̆ pơlei Bua, tơring Ia Pnôn, apŭng Đức Cơ pơma:“Ba chơt hơ iă dêh, lơ̆m sơnăm ‘nao, Ƀô̆ đô̆i vei lăng sơlam teh đak dêh char Gia Lai hlôi vih hăm tơring pơgơ̆r pôk tơmam drăm, khăm jĭ jăn ăn kon pơlei, kon pơlei lơ̆m tơring păng 4 pơlei tôch kơ bơnê tơdrong kăng ba đơ̆ng Ƀô̆ đô̆i vei lăng sơlam teh đak păng rim hơnih jang năm pơgơ̆r ou.”

Ia Pnôn ‘noh tơring sơlam teh đak kơ apŭng Đức Cơ, dêh char Gia Lai hăm găh lơ ‘noh kon pơlei kon kông, hơrih sa oei tơnap tap. Hrei ou ŭnh hnam dơnuh kơ tơring oei 16,49%. Hăm trong jang ưh kơ lê̆ bơngai bu hơchăng hŭt tơ̆ rŏng păng sơđơ̆ng ăn rim ŭnh hnam kon oelei đei sa Têt ngăl, tơdrong jang ou hlôi tơlĕch lơ tơdrong jang ‘lơ̆ng hơ iă.

Tơ̆ Dak Lăk, Tơdrong pơgơ̆r "Puih mak Ƀô̆ đô̆i vei lăng sơlam Teh đak - Chhơp jơhngơ̆m kon pơlei" jei ‘nao đei Khul kơdră chĕp pơgơ̆r Ƀô̆ đô̆i vei lăng sơlam Teh đak dêh char pơgơ̆r tơ̆ tơring Ia Lôp, apŭng Ea Sŭp. Vang mơt hơdoi lơ̆m jơ ‘năr chơt hơ iă ‘nă hal kơ năr lêh, dôm tơdrong hơsoang khua luống kơ kon pơlei hơdrng Thái nhen lĕ nơ̆r hơvơh hơvơi hơpơi đei ‘mi rŏ tŏ hơlăng jang sa iŏk yua kơjăp. Mŏ Hà Thị Tằm, kon pơlei oei lơ̆m pơlei Nừng Nhạt, tơring Ia Lôp tơbăt, tơdrong pơchơt ou ưh khan lăp mĭnh tơdrong pơgơ̆r pơchơt pơhiơ̆ mă oei tơbăt hơdăh tơdrong joăt joe, jơhngơ̆m đon tơgoăt tơgoăl păng jing jơ ‘năr vă kon pơlei tơƀôh hơdăh tơdrong hơbĕch hơbal, jơhngơ̆m đon tơgoăt tơgoăl pơlei pơla:“Ba hŏk pơhrăm đơ̆ng ‘lơ̆p, kiơ̆ yă ƀok, ba jei hơdrin chă pơtho ăn jơhnơr mơlôh, tơdăh ưh lei đe hăp hiơt hiong hloi tơdrong oei sa joăt joe kơ hơdrung bơ̆n. Khua luống ‘noh tơbăt hơdăh găh tơdrong hơpơi ‘meh vă ‘mi rŏ tŏ hơlăng, jang sa đei iŏk yua kơjăp”

Atŭm hăm pơgơ̆r rim tơdrong joh ayŏ kơdŏ soang, rim ƀô̆ đô̆i găh Kơđông ƀô̆ đô̆i vei lăng sơlam teh đak oei iung jang hơdoi hăm khul ƀok thây pơgang khăm jĭ păng ƀơk pơgang ăng kon pơlei. Mŏ Cầm Thị Sáu oei tơ̆ pơlei Đóng, pơma tơbăt: “Bơnê kơ Ƀô̆ đô̆i vei lăng sơlam teh đak hlôi pơgơ̆r năr lêh ou vă kon pơlei đei năm khăm jĭ jăn, đei vang năm joh ayŏ kơdŏ soang.”

Yă Lăng Thị Nguyên, Kơ iĕng Kơdră chĕp pơgơ̆r Hơnih vei lăng kon pơlei tơring Ia Lôp, apŭng Ea Sŭp tơbăt, tơring oei đei hloh 1.800 ŭnh hnam, hăm 15 hơdrech hơdrung vang hơrih sa, ŭnh hnam dơnuh hloh 54%. Tơdrong pơgơ̆r "Puih mak Ƀô̆ đô̆i vei lăng sơlam Teh đak - Chhơp jơhngơ̆m kon pơlei" hlôi hơnhăk ăn kon pơlei tơ̆ ou mĭnh pơyan puih mak phĭ tơtŏ dơnŏ ‘lơ̆ng dơ̆ng kơjăp:“Tơdrong pơgơ̆r puih mak Ƀô̆ đô̆i vei lăng sơlam Teh đak - Chhơp jơhngơ̆m kon pơlei hăm minh tơring sơlam teh đak đei tơdrong pơgơ̆r ou jĭ chơt hơ iă ‘nă hal ưh kơbăt dang yơ hloi bơih hăm kon pơlei tơring Ia Lốp. Hlôi hơnhăk ba đei mĭnh pơyan phĭ tơtŏ dơnŏ ‘lơ̆ng ăn kon pơlei lơ̆m jơ ‘năr Têt Ất Tỵ.”

Tơ̆ pơgơ̆r ou, vă jê̆ 400 tơnô̆ tơmam drăm hlôi pôk ăn rim ŭnh hnam đei iŏk yua ăn teh đak păng ŭnh hnam dơnuh, atŭm hăm mĭnh pơbŭng hnam “Tơgoăt tơgoăl” kơjă kơjên 100 triu hlak jên. Mă kăl, rim tơnô̆ kon jên hŏk pơhrăm jei đei pôk ăn đe hŏk tro dơnuh hŏk hơgei, tơgŭm ăn đe oh kĕ yak truh tơdrong hiôk jơnap tơ̆ hơnăp kơnh. Đại tá Rơ Lan Ngân, Kơ iĕng Kơdră chĕp pơgơ̆r Đảng Ƀô̆ đô̆i vei lăng sơlam teh đak dêh char Dak Lăk, tơbăt: “Ƀlep lơ̆m jơ ‘năr Têt Ất Tỵ sơnăm 2025, Ƀô̆ đô̆i vei lăng sơlam teh đak dêh char Dak Lăk hlôi pơgơ̆r chă krao hơvơn dômbơngai đei jơhngơ̆m đon vang iung jang kiơ̆ tơdrong pơgơ̆r ou, lơ̆m ou đei tơdrong jang nhôn hlôi tơlĕch jang kiơ̆ nhen kon rong ƀô̆ đô̆i vei lăng sơlam teh đak, ba oh năm tơ̆ hnam trương, bô̆i phe ‘mêm mơnat, pơbŭng hnam sơlam teh đak tơgŭm ăn kon pơlei đei rơvơn sa têt chơt hơ iă hloh dơ̆ng. Nhôn jei hơpơi ‘meh vă jơhngơ̆m đon kon pơlei tơring sơlam teh đak tơgoăt tơgoăl kơjăp iăp kơtang hloh dơ̆ng hăm Ƀô̆ đô̆i vei lăng sơlam teh đak păng atŭm hăm Ƀô̆ đô̆i vei lăng sơlam Teh đak bơ̆ jang ‘lơ̆ng tơdrong jang vei lăng năng tông tơdrong pơm tơ-‘ngla sơlam teh đak”.

Tơdrong pơgơ̆r "Puih mak Ƀô̆ đô̆i vei lăng sơlam Teh đak - Chhơp jơhngơ̆m kon pơlei"  ‘nao đei Ƀô̆ đô̆i vei lăng sơlam teh đak pơgơ̆r tơ̆ 2 apŭng kơ 2 dêh char Gia Lai hăm Dak Lăk ưh khan lăp hơdrô̆ tơmam mă lei oei jing tơlei tơgoăt kơjăp jơhngơ̆m đon ‘mêm kơ eng dih băl ƀô̆ đô̆i kon pơlei, tơgoăt kơjăp tơdrong tơgoăt tơgoăl ƀar păh khul Ƀô̆ đô̆i vei lăng Sơlam Teh đak hăm kon pơlei rim hơdrung, pơjing đei hơyak pran kơjăp iăp kơtang ăn mĭnh tơring sơlam teh đak rơngei hiôk hian, phĭ tơtŏ dơnŏ ‘lơ̆ng dơ̆ng kơjăp.