‘Măng mă 2 ouy, Quân khu 5 pôk ăn 435 pơbŭng hnam ‘nao, đơ̆ng rŏng hlôi pôk ăn 175 pơbŭng hnam lơ̆m blŭng khei 1, iung jang keh đang “ ‘Măng iung jang Quang Trung”, iung jang keh đang ‘lơ̆ng kơ kuh chơt hơ iă Hop akŏm tih Kơdră tang măt lơ̆m teh đak ‘măng mă XIV kơ Đảng.  Ming man keh đang tôm 610 pơbŭng hnam ‘nao păng 314 pơbŭng hnamn ming hơmet, Quân khu 5 hlôi pơtôch “ ‘Măng iung jang Quang Trung” lơ̆m jơhngơ̆m đon chơt hơ iă ‘nă hal đơ̆ng kon pơlei tơring ‘mi kial đak hơbông pơrăm, pơjing đei gru kơnăl ‘lơ̆ng rŏ hơbŏ nhen kơ “Ƀô̆ đô̆i Ƀok Hô”. Rim kang ƀô̆, ƀô̆ đô̆i hlôi ƀôh kang bang kơl lơ̆m jơ ‘năr mơmat tat, yak hơdoi hăm Kon pơlei yak hloh ‘mi kial pơrăm, pơm sơđơ̆ng hơrih sa. Hăm jơhngơ̆m đon ‘jang kơ ‘năr tim mă đang, iung jang hloi tơ̆ gơmăng’, ‘Jang ưh hơchăng ti, ‘mi ưh kơdơ̆h” kang ƀô̆, ƀô̆ đô̆i Quân khu 5 lăng tơdrong jang tơgŭm kon pơlei tơ iung pơjing ming man hnam oei đơ̆ng rŏng ‘mi kial hơbŭt hơbông pơrăm jĭ trong tơlĕch ăn đơ̆ng jơhngơ̆m đon tơchĕng. Dôm pơbŭng hnam keh đang dang ei ưh khan lăp hơnih ming man, mă oei jing jơhngơ̆m đon lui, jĭ jơhngơ̆m đon ‘mêm kơ eng dih băl ƀar păh ƀô̆ đô̆i-kon pơlei đei gei kơjăp prăt jơ ‘năr mơmat tat hrat hrĭn.