Kiơ̆ tơroi, truh dang ei jơ̆p teh đak hlôi keh đang, pơjao hloh 65 rơbâu tŏ hnam vă rim unh hnam đei oei lơ̆m hnam 'nao; atŭm hăm noh man hloh 56 rơbou tŏ hnam. Đơ̆ng rŏng kơ Hop akŏm mă 2 (ah tong hơnê̆ khei 1) truh dang ei tŏk jê̆ 16 rơbou tŏ hnam keh đang păng 18 rơbou tŏ hnam đei ming man. Pơma ah 'măng hop akŏm, Thủ tướng Phạm Minh Chính sơkơ̆t hơdah, ou jĭ minh tơdrong jang kăp gĭt đơ̆ng Đảng păng Teh đak hăm kon pơlei bơ̆n; tơƀôh tơdrong pôk bơnê hăm dôm bơngai tơgŭm jơhngơ̆m hăm teh đak hlôi plang ăn tơdrong jang kăch mang kơ hơdrung hơdrĕch, kơ teh đak bơ̆n lơ̆m dôm chăl hơrih; Tơƀôh tơdrong tơguăt tơguăl 'mêm kơ-eng dih băl đơ̆ng kon pơlei.

Kơyuơ noh, bơ̆n hơdrô̆ pơđăp vă pơm jang, ưh đei pơma pơgăn, ou jĭ tơchơ̆t đơ̆ng plei nuih. Tơchơ̆t ưh đei tơplih, truh năr 30 khei  10 sơnăm 2025 keh đang tơchơ̆t ou, dang hơdrol hloh 2 khei pơtêng hăm tơchơ̆t tơlĕch đunh kơ ou 1 sơnăm.