Lơ̆m bơbŭng hnam kơ Mĕ Việt Nam Nuih mơng Võ Thị Đủ (97 sơnăm), tơ̆ xah Đông Sơn, dêh char Quảng Ngãi, rơ-ông rơ-ang nơ̆r hơhiĕk nơ̆r pơma dơnuh. Rim năr, đe kang ƀô̆, khul linh kơ Anih tơm Pơgơ̆r khul linh dêh char Quảng Ngãi, Jơnŭm pơgơ̆r khul linh xah, khul dân kuân păng đoan viên hơdruh tơdăm tơ̆ tơring truh ngôi, pơma dơnuh, chă tơgŭm mĕ Võ Thị Đủ pơ-'nguaih hnam oei. Klo păng 2 'nu kon mĕ adoi vang năm tơblah vei lăng teh đak păng hlôi lôch tang tơ̆ kơdrăn tơblah. Ah mă teh đak đei jơnei rơngei, mĕ Võ Thị Đủ hơnơ̆ng đei iŏk tơdrong tơgŭm, vei lăng hơnơ̆ng đơ̆ng đe kang ƀô̆, khul linh tơ̆ pơlei pơla: “Dang ei mĕ 'lŏ kră bơih, ưh kơ grăng noh ưh kĕ chă yak tơ̆ ou tơ̆ to, ưh kĕ chă jang ôh. Gơnơm đe 'nhŏng oh ƀô đô̆i tơgŭm ăn kơ Mĕ hnam oei vă kơ rơngơp, oei ah pơyan tŏ phang noh kơ-'năr dơ̆ng athei tang 'măng đĕch. Mưh ƀĭch noh chă tơchĕng tôm tơdrong. 'Năr ou đei 'nhŏng oh truh hơpong ngôi, asong ăn tơmam ou to, pơm ăn hnam oei. 'Noh mĕ hmach bơnê tôch lơ”

Tơ̆ dêh char Quảng Ngãi, hloh 6.800 Mĕ đei pôk hơnăn Mĕ Việt Nam Nuih mơng, dang ei oei 106 Mĕ oei hơrih. Lơ̆m noh, Anih tơm Pơgơ̆r Khul linh dêh char Quảng Ngãi iŏk rong 'me đĭ jơhnơr hơrih 21 Mĕ. Dôm sơnăm kơ ou, đe kang ƀô̆, khul linh dêh char Quảng Ngãi hơnơ̆ng jang tơnăp tơdrong vei rong Mĕ Việt Nam Nuih mơng, bơngai tơgŭm jơhngơ̆m ăn kăch mạng, rim unh hnam mă teh đak tơchơ̆t tơgŭm. Ƀok Lê Văn Công, Phŏ Kơdră Anih Pơgơ̆r Khul linh xah Đông Sơn, dêh char Quảng Ngãi ăn tơbăt: “Inh ƀôh đơ̆ng tơdrong jang ou noh kăp gĭt, tơgŭm ăn đe sơnăm mơlôh hrei ou hlôh vao hơdah gah tơdrong plang, tơdrong hiong răm đơ̆ng đe Mĕ adoi nhen đe 'nhŏng, đe mih ma hlôi lôch plang vă kơ teh đak gơh đei jơnei rơngei. Kiơ̆ đơ̆ng dôm tơdrong jang ou noh kăp gĭt ăn đe sơnăm mơlôh nhôn, vă kơ đe sơnăm mơlôh nhôn minh 'măng dơ̆ng gơh đei pôk bơnê păng noh adoi jing nơ̆r tơbăt ăn đe sơnăm mơlôh nhôn gơh đei tơdrong pơm jang kăp gĭt hloh”.

Rim Anih linh lơ̆m dêh char Quảng Ngãi hlôi păng tŏk bŏk jang hơdoi hăm rim anih jang kơpal akŏm sek tơlang tơtom, dôm tơchơ̆t jang đơ̆ng Trung ương, đơ̆ng dêh char hăm dôm bơngai mă teh đak tơchơ̆t tơgŭm. Tơdrong jang chơ chă, sir kôch akŏm kơting linh lôch tang lơ̆m lơ sơnăm kơ ou adoi đei Anih jang Đảng kơ Anih tơm Pơgơ̆r Khul linh tơrĕk truh. Đơ̆ng blŭng sơnăm truh dang ei, Anih jang pơkăp tơgŭm kơ Anih tơm Pơgơ̆r Khul linh dêh char Quảng Ngãi hlôi sơng iŏk, sơkơ̆t athei sek tơgŭm ăn 24 hô sơ linh jĭ rơka oei đei đơ̆ng rŏng kơ tơdrong tơblah, pơtho chih hô sơ, athei sơkơ̆t hơdah gah linh lôch tang.

Atŭm hăm noh, Anih tơm Pơgơ̆r Khul linh dêh char Quảng Ngãi jang atŭm hăm dôm anih jang tơm, rim tơring đei tơrĕk vă sơkơ̆t hơdah kơtơ̆ng ang hăm tơdrong hơpơi 'meh 'nhăk dôm tơmam drăm kơ đe linh lôch tang ăn teh đak gơh vih hăm unh hnam, 'nhŏng oh. Anih linh hlôi pơjao 20 hô sơ tơmam drăm truh hăm unh hnam 'nhŏng oh.

Hăm đon bơnôh pôk bơnê kăp gĭt hăm đe mih ma yak hơdrol, dôm năr ou, kang ƀô̆, khul linh dêh char Quảng Ngãi pơgơ̆r lơ tơdrong jang kăp gĭt vă tơrĕk tơvei ăn rim unh hnam linh jĭ rơka, linh lôch tang ăn teh đak; pơgơ̆r khăm hơlen, asong pơgang ưh kơ iŏk jên ăn dôm unh hnam mă teh đak tơchơ̆t tơgŭm, bơngai tơgŭm jơhngơ̆m lơ̆m dêh char. Đại tá Võ Tấn Tài, Chinh uy Anih tơm pơgơ̆r Khul linh dêh char Quảng Ngãi sơkơ̆t hơdah: “Tơdrong pơkăp jang ƀlŏk bơnê đei Anih jang Đảng Khul linh dêh char tơrĕk truh. Lơ̆m khei năr ou ki, adoi pơjing ming man đei lơ hnam 'mêm kơ-eng, hnam tơgŭm tơpôl păng mă kăl noh tơrĕk truh dôm bơngai mă dang ei oei hơrih lơ̆m hnam pơgia, lơ̆m noh đei lơ unh hnam tŏk bŏk oei soi ƀlŏk kơ linh lôch tang ăn teh đak, asong khul năm hơpong ngôi păng pôk hơpah ăn rim bơngai tơchơ̆t tơgŭm ou”.