VOV4.Bahnar - Kiơ̆ hơ len lăng đơ̆ng Anih vei lăng găh Jŏh ayŏ, Tơ plŏng kơ dâu păng tơ mang lăng dêh char Đồng Tháp, hơ dai hăm rim tơ ring tŏk bŏk hơ tŏk tơ iung tôch kơ ‘lơ̆ng găh tơ mang lăng hăm lơ kơ loăi um rup  ‘noh oei lơ tơ ring, lơ̆m noh đei rim tơ ring sơ lam kơ dêh char oei tam mă iŏk jang đĭ tơ mam, tơ drong pran lơ̆m tơ drong jang ‘nâu. Vă pơ trŭt pơm tơ drong hiôk vă tơ mang lăng tơ ring sơ lam tŏk pran tơ̆ hơ năp kơnh, Anih vei lăng găh Joh ayŏ, Tơ plŏng kơ dâu păng tơ mang lăng dêh char hlôi jang hơ dai hăm apŭng Hồng Ngự pơ gơ̆r hơ len lăng, hơ dai hăm ‘noh tơ lĕch jang Tơ drong tơ chơ̆t đơ̆ng Jơ nŭm pơ gơ̆r kon pơ lei dêh char, tơ chơ̆t găh trong jang tơ gŭm hơ tŏk tơ iung tơ mang lăng lơ̆m dêh char Đồng Tháp truh hăm dôm bơ ngai, anih jang tŏk bŏk pơ jing rim tơ drong jang tơ mang lăng.

Famstay “Hnam pơm tơ̆ kơ pal dơ nâu đak” kơ mŏ Tô Kim Thi tơ̆ apŭng Tân Hồng tơ jê̆ âu đei lơ tơ moi tơ mang lăng băt truh ‘noh jĭ 1 hơ nih tơ mang lăng ‘nao, hơ iă tơ̆ tơ ring sơ lam kơ dêh char Đồng Tháp.

Dang ei famstay “Hnam pơm tơ̆ kơ pal dơ nâu đak” đei 2 lăm đei pơm kiơ̆ trong rơ goh ‘lơ̆ng hăm cham char, pơm hăm ‘long, tơ̆r ngăl, tơ̆ lơ̆m đei hơ met tôm tơ mam kơ 1 lăm ƀĭch oei. Mă loi ‘noh, pơm hơ iă hăm tơ moi hloh mưh truh tơ̆ âu ‘noh hơ nih să rơ hơi hiôk hăm pơ gar ‘nhot, dơ dâu rong ka păng dôm ‘long pơ rŏ ‘lơ̆ng hlĭch:

Tơ drong hơ iă đơ̆ng ĭnh tơ̆ âu đei 1 pôm hnam pơm kơ pal đak, ‘nâu jĭ 1 tơ drong hơ iă đơ̆ng 1 ‘nu kon pơ lei tơ ring đei đak să, hơ drol sơ̆ ŭnh hnam nhôn kŭm hlôi arih lơ̆m đak krong tơ̆ hnam pơm kơ pal đak nhen thoi âu, ‘noh ĭnh ‘meh truh tơ̆ Hnam pơm tơ̆ kơ pal dơ nâu đak âu ‘noh jĭ đe buăl gô lăng ƀôh đei 1 năr arih lơ̆m hnam pơm kơ pal đak thoi sơ̆, đĭ đăng ‘noh ĭnh hơ met ăn tôm tơ mam lơ̆m noh.

Yua kơ dơ nâu đak să kơ na tơ plih yua kơ oei lơ̆m hnam pơm tơ̆ kơ pal đak lơ̆m đak krong, dang ei, tơ moi tơ mang lăng gơh ƀôh đei tơ drong arih tơ̆ tơ ring đak Đồng Tháp kơ tă hloi tơ̆ Hnam pơm kơ pal đak âu. Hơ dai hăm dơ nâu rong ka oei đei dơ nâu pơ kao sen păng mŏ Tô Kim Thi tơ băt tŏk bŏk pơ tăm thim pơ gar ‘long sa plei kŭm nhen pơm hơ met ‘lơ̆ng hơ nih ƀĭch pơ dơh, chă lăng, pơ vih pơ văn et sa ăn tơ moi tơ mang lăng mưh gơh pơ̆ih ‘măng:

‘Meh ‘noh bôl buăl truh ‘noh gô ăn kơ kon hơ ‘lơ̆p đe sư vă kơ băt đei pơ tăm ‘nhot, chă pơ tăm kơ dih pơ gar ‘nhot rơ goh, gơh chih dơ̆ng khei ‘năr pơ tăm vă đei tơ drong vă năm tơ mang lăng dơ̆ng, đang kơ ‘noh gơh băt phĕ pơ kao sen păh noh, hao thŏng an, phĕ pơ kao sen, văh ka, tơ̆ âu hloh 10 sơ năm bơ̆ih ka tơ̆ âu đei kơ dih tôch kơ lơ.

 Famstay Hnam pơm tơ̆ kơ pal đak lăp jing 1 lơ̆m lơ hơ nih năm truh tơ̆ tơ ring sơ lam Đồng Tháp. Jê̆ apŭng Tân Hồng, apŭng Hồng Ngự đei 6 hơ nih đei rơ̆ih iŏk vă jang hơ dai hơ tŏk tơ iung tơ mang lăng, ‘noh đei: pơ lei pơm hnam tơ̆ đak krong, tơ ring pơ tăm ‘nhot rơ goh ‘lơ̆ng tơ̆ xăh Long Thuận, dôm hnam so hloh kơ hrĕng sơ năm, Đình Long Khánh đei chih tơ mơ̆t lơ̆m anih gru groa kơ teh đak, pơ lei tanh brai vai khăn kră sơ̆ păng hơ nih hum tơ̆ xăh Long Khánh A.

Mă đơ̆ng tam mă đei drơ̆ng ăn tơ pă ‘noh hơ nih chă tơ mang lăng kơ dêh char mă lei khei ‘năr âu ki, lơ tơ moi tơ mang lăng lơ̆m păng ‘ngoăih teh đak hlôi rơ̆ih hơ nih âu ‘noh hơ nih năm truh lơ̆m tơ drong tơ mang lăng Kơ lih thoi noh, khŭl kơ dră tơ ring kŭm hlôi tŭn pran tơ drong jang vei lăng tơ̆ dôm hơ nih năm truh, hơ dai hăm ƀrư̆ ƀrư̆ pơ jing um rup tơ mang lăng kơ apŭng. Ƀok Nguyễn Đức Trí, Kơ dră anih vei lăng joh ayŏ kơ tơ̆ng ang apŭng Hồng Ngự, dêh char Đồng Tháp tơ băt:

Anih vei lăng kon pơ lei apŭng đei athei rim tơ ring, rim anih jang, lơ̆m noh đei anih jang găh joh ayŏ jang hơ dai hăm Anih vei lăng kon pơ lei xăh Long Khánh A jang ‘lơ̆ng tơ drong jang mă mônh ‘noh vei sơ đơ̆ng tơ pôl, mă ƀar găh pơm rơ goh cham char. Mă pêng, găh pơ klep kơ jă tĕch tơ̆ dôm hơ nih tơ mang lăng.

Hơ dai hăm tơ drong tơ roi tơ ƀôh pơ tho dơ̆ng 1,2 tơ drong ‘meh vă lơ̆m tơ drong jang vei lăng ăn tơ ring, Anih vei lăng găh Joh ayŏ, Tơ plŏng kơ dâu păng tơ mang lăng kŭm hlôi tơ lĕch jang rim trong jang tơ gŭm găh hơ tŏk tơ iung tơ mang lăng lơ̆m dêh char, kiơ̆ tơ drong Tơ chơ̆t kơ sô̆ 210 đơ̆ng jơ nŭm pơ gơ̆r kon pơ lei dêh char. Mă hơ dăh ‘noh, gô tơ gŭm tơ mơ̆t jên jang ming man hnam hôtel, tơ gŭm jên cheh tŏk iŏk tơ mơ̆t jên jang hơ tŏk tơ iung kơ loăi um rup tơ mang lăng lơ̆m tơ pôl hăm khul jang, kơ dih kiơ̆ hơ găt tơ̆ tơ drong Tơ chơ̆t âu. Kiơ̆ kơ ƀok Ngô Quang Tuyên, Phŏ kơ dră Anih vei lăng joh ayŏ tơ plŏng kơ dâu păng tơ mang lăng dêh char Đồng Tháp tơ băt:

Đơ̆ng rŏng hơ len lăng âu ‘noh bơ̆n gô vang hơ dai băl tơ oei dơ̆ng vă hơ len lăng vă kơ sư lăp hăm tơ mam ‘lơ̆ng. Mă 2 ‘noh bơ̆n gô pơ jing đei tơ mam ‘noh jĭ tơ gŭm rim ŭnh hnam păng rim tơ ring vă pơ jing dôm tơ mam tơ mang lăng ‘lơ̆ng hơ drô̆, đơ̆ng tơ drong pran kơ rim tơ ring, bơ̆n gô tơ gŭm pơ hrăm pơ tho vă gơh hơ tŏk tơ iung tơ mang lăng vă tơ iung tơ drong jang sa, vă pơm tơ mang lăng tơ ring âu, pơm liơ vă kơ sư đei iŏk yua.

Kŭm hăm dôm tơ drong đei yua găh tơ drong hiôk đei đơ̆ng hơ drol, thim lơ̆m noh dơ̆ng ‘noh jĭ dôm trong jang tơ gŭm hơ dăh gô jing tơ drong hiôk vă kon pơ lei păng rim bơ ngai tơ mơ̆t jên jang pơ̆ih să, hơ tŏk ‘lơ̆ng hloh dơ̆ng rim tơ drong pơ vih pơ văn, tơ gŭm ăn tơ mang lăng tơ̆ apŭng  Hồng Ngự pơ ma hơ drô̆ păng rim tơ ring sơ lam kơ Đồng Tháp pơ ma atŭm tơ pă jang tŏk pran tơ̆ hơ năp kơnh.

VOV4