VOV4.Bahnar - ‘Nao âu, rơ bâu ‘nu bơ ngai ‘nŏh jĭ kon pơ lei đơ̆ng dôm dêh char Tây Nguyên oei arih xa păng bơ̆ jang tơ̆ plt Hồ Chí Minh păng dôm dêh char găh pơ băl dui băl brŏk tơ̆ pơ lei vă vĕh ver kơ jĭ Covid-19 hao gre kơ dih. Vă găn ƀiơ̆ tơ drong krê jĭ tơ pŏh đơ̆ng dôm bơ ngai ‘nao vih tơ̆ pơ lei, dôm dêh char lơ̆m tơ ring hlôi hơ met gre, khul jang păng anih oei, tơ mam drăm vă tơ gŭm ăn kon pơ lei vih tơ̆ hnam sơ đơ̆ng ‘lơ̆ng. 1 tơ drong tôch gĭt kăl đơ̆ng rŏng kơ vih tơ̆ pơ lei, rim bơ ngai athei bơ̆ jang ‘lơ̆ng dôm tơ drong hơ găt găh tang găn jĭ vă vei lăng jơ hngâm pran. 

Tơ̆ hơ năp lơ bơ ngai kiơ̆ băl brŏk tơ̆ pơ lei vă veh ver tơ drong jĭ tơ tă năm klĕch anih gak hơ len jĭ Cai Chanh (apŭng Đắk R’Lấp) dêh char Dak Nông ngăl, anih jang pơ gang hlôi ăn khul jang păng gre, tơ mam kơ măy kơ mŏk vă khăm hơ len, tơ tom chơ ba bơ ngai jĭ năm tơ̆ anih oei hơ drô̆ tơ dăh đei. Kiơ̆ ƀok Hà Văn Hùng, Phŏ Kơ dră vei lăng tơ drong jang pơ gang Dak Nông, tơ drong vei kơ jăp, klăih song anih năm oei adrô̆ hăm kon pơ lei ‘nao brŏk, năm klĕch dêh chả gô tơ gŭm ăn tơ ring găn đei tơ drong jĭ tơ pŏh đơ̆ng blŭng păng huei akŏm lơ bơ ngai jĭ tơ̆ hnam pơ gang vă bơ̆ jang tang găn jĭ hrei ‘nâu:

“Tơ̆ anih gak ‘nŏh nhôn pơ gơ̆r pơ tŏ hơ yuh hơ kâu vă khăm hơ len dôm bơ ngai yuh, hiĕn, dui jơ hngâm mơ mat đei ƀơm truh bơ ngai jĭ, pơ gơ̆r chih tơ roi găh jơ hngâm jăn hăm kơ măy đei mã QR-Code. Nhôn hơ nơ̆ng bơ̆ jang vei lăng bơ ngai năm vih vât tơ̆ Dak Nông ‘nŏh athei đei hla ar set hơ len ơh đei jĭ Covid-19 ‘mơ̆i. Mă loi hăm dôm bơ ngai yơ vih, truh tơ̆ Dak Nông mă lei tam mă set hơ len jĭ, dôm bơ ngai ‘nŏh nhôn pơ gơ̆r test hrĕnh hloi vă tơ tom chă ƀôh jĭ”. 

Lơ bơ ngai mât tơ̆ Anih akŏm vă test hrĕnh adrol kơ brŏk tơ̆ hnam

Oei hơ năp khei mă 7, klo kăn mŏ Hoàng Thị Nhung, xăh Cư Ea Vy, apŭng Ea H’Leo, dêh char Dak Lak pơm công nhân tơ̆ Bình Dương krao điên thoăi pơ ma nuh hăm unh hnam, hơ met tôm tơ mam ăn kang kưt tơ̆ mir, vă klo kăn ‘nŏh brŏk oei tơ̆ noh mưh vih dơ̆ng tơ̆ pơ lei: “Vih tơ̆ hnam ƀôh sơ đơ̆ng ƀiơ̆, mă lei rok trong ŏh ƀôh tôch pơ ngơ̆t yoa đĭ test tơ̆ noh bơih mă lei vih tơ̆ âu dang ei test dang bơih, ƀôh da ƀiơ̆ kơ pơ ngơ̆t bơih. Mưh vih truh tơ̆ hnam ŏh năm tơ̆ Hnam pơ gang chih tơ roi găh jơ hngâm jăn, đang kơ ‘nŏh 2 ‘nu klo kăn mât oei tơ̆ anih oei hơ drô̆ tơ̆ mir hơ tăih kơ hnam 4 km.”

Oei mŏ H’Mara Niê, tơ̆ xăh Hòa Phong, apŭng Krông Bông kŭm chu kơ dâu trong hơ tăih đơ̆ng Bình Phước vih dơ̆ng tơ̆ hnam mưh kơ tơ̆ng mĕ tơ roi tơ̆ xăh đei anih oei hơ drô̆ ăn dôm bơ ngai vih đơ̆ng tơ ring đei jĭ ‘năi. Đon pơ ngơ̆t hơ mơt kơ dih đei pơ rang jĭ pơm tơ pŏh ăn unh hnam, ăn pơ lei pơ lei nhen hơi ƀiơ̆ mưh ŏh đei mât oei tơ̆ anih oei hơ drô̆ lơ̆m xăh. H’Mara Niê ăn tơ băt: “Ŏh tôch hơ iă mih truh tơ̆ âu. Ŏh mât oei hơ drô̆ tơ̆ hnam hŏk lơ̆m xăh, ưh kơ đei vih tơ̆ hnam hloi ôh. Mĕ ŏh kŭm krao điên thoăi khan bơih, brŏk ‘nŏh athei năm tơ̆ anih oei hơ drô̆ hloi lê̆ kơ brŏk hơ yŏh tơ̆ hnam.”

‘Nhŏng Bùi Ngọc Hoàng, Bí thư đoan apŭng Ea H’Leo, dêh char Dak Lak ăn tơ băt: Bơ̆ jang kiơ̆ nơ̆r pơ tho ‘năr 31/7 đơ̆ng Thủ tướng tĕh đak, Anih pơ gơ̆r jang tang găn jĭ COVID -19 apŭng Ea H’Leo pơ gơ̆r hôp tơ lĕch trong sơng kon pơ lei vih. Kiơ̆ kơ ‘nŏh, apŭng pơm 3 anih oei hơ drô̆ hơ dai păng ăn 9 tŏ gre năm tơ̆ Hnam trưng tĕh đak rong hŏk tro kon kông Nơ Trang Lơng – anih mă kon pơ lei vih tơ̆ Dak Lak akŏm tơ̆ noh vă test jĭ hrĕnh adrol kơ vih tơ̆ tơ ring vă sơng kon pơ lei. Tơ drong jang pơ gang, pơ vih pơ văn lơ̆m khei ‘năr kon pơ lei oei hơ drô̆ kŭm đei apŭng tơ lĕch trong tôch rơ đăh.

“Anih oei hơ drô̆ kơ apŭng kĕ ăn dang 400 ‘nu bơ ngai mât oei, tơ̆ 3 anih ‘nŏh jĭ, Hnam pơ gang apŭng, mă 2 jĭ Anih pơ tho tơ drong jang kơ apŭng păng mă 3 ‘nŏh, Hnam trưng tĕh đak rong hŏk tro kon kông apŭng. Anih pơ gơ̆r jang kơ apŭng hlôi hơ met tôm tơ drong, kơ plăh dang ei ‘nŏh pơm ăn kon pơ lei sơ đơ̆ng jơ hngâm mât oei hơ drô̆ păng pơm kiơ̆ dôm tơ drong hơ găt tang găn jĭ.”

Kon pơ lei đei test hrĕnh adrol kơ brŏk tơ̆ hnam

Đơ̆ng kơ sơ̆ 29 truh pơ gê ‘năr 30/7/2021, vă jê̆ 900 ‘nu bơ ngai jang tơ̆ Đồng Nai hao gre hon đa vih tơ̆ Dak Lak. Dôm kon pơ lei ‘mĕh vih brŏk hlôi chih măt hăm anih jang kơ pal kơ dêh char Đồng Nai păng lăp gơ̆h brŏk mưh test hrĕnh ưh đei pơ rang jĭ COVID-19 đĕch vă pơm ‘lơ̆ng huei kơ rôp gơ̆t tơ̆ rim anih gak hơ len jĭ. Đơ̆ng rŏng kơ ‘nŏh, Kanh sat vei lăng trong nơ năm păng dôm khul jang kơ pal đei công an vei lăng sơ đơ̆ng, tang găn tơ drong yoch, khul y ƀak si kơ dêh char Đồng Nai pơ jing khul ba trong kơ dâu truh 400 km. Dêh char Đồng Nai oei ăn 1 pôm gre chơ tơ mam xa vă pơ vih ăn khul tôch trong kơ dâu hai.

Đơ̆ng rŏng 3 kơ măng sơng kon pơ lei vih đơ̆ng dôm dêh char găh pơ băh đĭ đei hlŏh 3.000 ‘nu bơ ngai đei vih tơ̆ Dak Lak. Vă vei lăng sơ đơ̆ng, tang găn đei jĭ, khul jang kơ pal trŏng prăt măng pơm hla ar păng test hrĕnh ăn kon pơ lei. Đơ̆ng nŏh, chă ƀôh dang 20 ‘nu bơ ngai test hrĕnh đei pơ rang jĭ SARS- CoV-2, lơ̆m nŏh đei 7 ‘nu bơ ngai set hơ len RT - PCR đei jĭ, oei đei ‘nŏh oei gô set hơ len RT–PCR ‘mơ̆i. Dôm bơ ngai test hrĕnh đei jĭ đei ăn oei hơ drô̆ vă răp gô tơ drong set hơ len RT–PCR, dôm bơ ngai ưh đei jĭ đei ăn vih tơ̆ pơ lei hăm nơ̆r athei năm chih tơ roi jơ hngâm jăn tơ̆ dôm Hnam pơ gang păng oei hơ drô̆ tơ̆ hnam trŏ tơ drong hơ găt. Ƀok Lê Phúc, Phŏ Kơ dră Anih vei lăng tơ drong jĭ jăn dêh char Dak Lak ăn tơ băt: Đơ̆ng rŏng kơ Thủ tướng tĕh đak đei hla ar chih ‘năr 31-7, ‘nŏh gơ măng 1/8, đơ̆ng rŏng kơ kon pơ lei truh ƀât anih akŏm gô test hrĕnh, lơ apŭng hlôi hơ met gre vă chơ kon pơ lei vih tơ̆ hnam păng pơm kiơ̆ dôm trong oei hơ drô̆ mă lăp. Tơ drong ‘nâu gô tơ gŭm ăn dôm tơ ring găn lê̆ tơ drong krê kơ jĭ tơ pŏh:

“Mĭnh ƀar tơ ring hlôi pơ gơ̆r ăn oei hơ drô hơ dai tơ̆ apŭng, nhôn akhan trong jang ‘nâu ‘lơ̆ng ƀiơ̆ yoa ăn oei hơ drô̆ hăm 1 kơ sô̆ kon pơ lei ưh đei tôm tơ drong ‘lơ̆ng vă gơ̆h oei hơ drô̆ tơ̆ hnam kơ dih. Ăn oei hơ drô̆ hơ dai ‘nŏh gô đei set hơ len PCR păng mưh ƀôh đei jĭ ‘nŏh sư đĭ oei lơ̆m anih oei hơ drô̆ bơih, huei kơ pơm tơ pŏh xă lơ̆m tơ pôl. Hăm bơ ngai oei hơ drô̆ tơ̆ hnam ‘nŏh athei đei tôm tơ drong kăl, athei vei lăng mă ‘lơ̆ng ‘năi păng athei set hơ len jĭ tơ̆ hnam vă pơm ‘lơ̆ng tơ dăh đei jĭ ‘nŏh gô đei trong jang ăn oei hơ drô̆ mă lăp hloi.”

Truh dang ei, đĭ đăng 15 apŭng, thĭ xăh, plt kơ dêh char Dak Lak đei bơ ngai jĭ Covid-19 ngăl bơih. Dôm bơ ngai jĭ âu đei tơ pŏh jĭ đơ̆ng plt Hồ Chí Minh păng 1,2 dêh char găh Pơ băh ngăl. Tơ̆ hơ năp tơ drong krê hơ mơt đơ̆ng jĭ, tơ drong lơ bơ ngai hơ nơ̆ng vih tơ̆ pơ lei vă vĕh ver jĭ rŏ năng gô đei dơ̆ng. Dôm trong jang sơng kon pơ lei vih tơ̆ hnam tŏk bŏk đei Dak Lak bơ̆ jang 1 păh yơ ‘nŏh hlôi tơ gŭm ăn kon pơ lei sơ đơ̆ng jơ hngâm ƀiơ̆ păng găn ƀiơ̆ tơ drong krê kơ jĭ tơ pŏh xă lơ̆m tơ pôl.

Dơ̆ng: Tơ blơ̆