VOV4.Bahnar - Jô̆ trŭh năr au, năr 25/3, Việt Nam hlôi đei 6 năr pă đei ƀô̆h bơngai ‘nao tơpŏh jĭ Covid-19 lơ̆m kon pơlei. Trŭh dang ei lơ̆m tĕh đak bơ̆n đei 1601 ‘nu bơngai jĭ Covid-19 kơ yuơ tơpŏh lơ̆m tĕh đak, lơ̆m au măt bơngai ‘nao tơpŏh jô̆ đơ̆ng năr 27/1 trŭh dang ei ‘nŏh 908 ‘nu bơngai. Akŏp măt bơngai tơ ƀơ̆p păng năm mơ̆t đơ̆ng tơring đei jĭ ăn oei hơdrô̆ hloi ‘nŏh 36.480 ‘nu. Lơ̆m akŏp măt bơngai ji Covid-19 tŏk bŏk đei ming hơmet, măt bơngai ư̆h kơ ƀô̆h sơmach jĭ Sars-CoV-2 ‘nŏh 120 ‘nu bơngai. Tơdrong jang ƀet pơgang bơ̆ng pơ̆ih să lơ̆m tĕh đak, lơ̆m năr 24/3, lơ̆m tĕh đak bơ̆n đei dơ̆ng 1906 ‘nu bơngai đei ƀet bơ̆ng pơgang vaccine tang găn jĭ Covid-19. Năr 24/3, rim dêh char Quảng Ninh, Tây Ninh, Đồng Tháp hlôi iung jang ƀet bơ̆ng pơgang vaccine tang găn jĭ Covid-19. Lơ lŏh trŭh dang ei, vaccine COVID-19 hlôi đei tơlĕch ăn iung jang ƀet bơ̆ng tơ̆ 19 dêh char, pơlei tơm lơ̆m ‘măng ƀet bơ̆ng mă 1.

Tơblơ̆ nơ̆r: Amazưt