VOV4.Bahnar - Vă hơ nơ̆ng hơ tŏk tơ drong jang tơ bôl vắc-xin, Kơ dră tĕh đak Nguyễn Xuân Phúc ‘nao đei kơ thơ gơih ăn ƀok Charles Michel, Kơ dră chĕp kơ̆l Anih vei lăng Châu Âu (EU) athei  EU tơ gŭm, klăih song vắc-xin ăn Việt Nam. Lơ̆m kơ thơ, Kơ dră tĕh đak Nguyễn Xuân Phúc bơ nê tơ drong tơ gŭm đơ̆ng Jơ nŭm châu Âu ăn Việt Nam khei ‘năr âu ki, mă loi ‘nŏh tơ gŭm 2,4 triu kơ liêu vắc-xin kiơ̆ đơ̆ng tơ drong jang COVAX.

Kơ dră tĕh đak pơ ma hơ dăh Việt Nam oei tơ ƀâp lơ mơ mat tat vă gơ̆h đei tôm vắc-xin ăn vă jê̆ 100 triu ‘nu kon pơ lei păng tơ mam kơ măy kơ mŏk vă tang găn jĭ. Kiơ̆ kơ ‘nŏh, kiơ̆ đơ̆ng tơ drong pơ vei jang hơ doi gĭt kăl păng tôm tơ drong oei tŏk ‘lơ̆ng đơ̆ng Việt Nam păng EU, Kơ dră tĕh đak athei EU tơ gŭm tôch ai ăn Việt Nam kiơ̆ đơ̆ng dôm tơ drong jang tơ gŭm, asong vắc-xin, kơ măy kơ mŏk, pơ truh tơ mam pơ gang hơ met ăn bơ ngai jĭ COVID-19 păng roi tơ băt ăn băl trong jang kăl vă tơ jră hăm jĭ hơ buh.

Dơ̆ng: Tơ blơ̆