VOV4.Bahnar - Tơ jur tơ drong hơ mơt tơ poh jĭ ăn đe y ƀak si păng khŭl jang tŏk bŏk pơ vih pơ văn tơ̆ dôm hơ nih ăn oei hơ drô̆, dôm pơ gang pơm pơ gia tang găn jĭ Covid-19, dôm robot VIBOT- mĭnh tơ mam đơ̆ng tơ drong jang khoa hŏk kơ măy kơ mŏk kơ teh đak đei Anih tơm Khoa hŏk păng kơ măy kơ mŏk pơ jao kơ Học viện Ki thuơ̆t khŭl linh bơ̆ jang hlôi đei tơ̆ dôm anih jĭ đơ̆ng Bắc Giang păng dang ei ‘noh pơ lei tơm Hồ Chí Minh. Tơ drong jang kơ jăp prăt năr prăt măng, dôm  robot VIBOT gơh tơ plih, tơ gŭm bơ ngai jang pơ gang dôm tơ drong jang pơ vih pơ văn, vei lăng bơ ngai jĭ păng bơ ngai jĭ, hơ nhăk tơ mam sa, đak nhă, pơ gang...

            Tơ̆ Hnam pơ gang pơm pơ gia kơ sô̆ 7 (phường An Khánh, pơ lei tơm Thủ Đức, pơ lei tơm Hồ Chí Minh), kơ măy 2 tŏ robot VIBOT-2 hlôi păng tŏk bŏk tơ gŭm, tơ plih bơ ngai jang pơ gang ba tơ mam sa, pơ gang, tơ mam yua kăl păng dôm tơ mam yua nai đơ̆ng ‘ngoăih mơ̆t lơ̆m hơ nih ăn oei hơ drô̆ păng hơ lơ̆k dơ̆ng. Tơ drong jang hơ nơ̆ng 24/7, mĭnh pôm robot VIBOT-2 vei lăng 4-5 tơ̆ng lơ̆m 10 tơ̆ng kơ hnam pơ gang, tơ gŭm tơ jur ƀiơ̆ tơ drong jang tih mă 6-7 ‘nu bơ ngai jang pơ gang, bơ ngai jang tơ gŭm athei iŏk jang rim năr. ‘Nhŏng Tô Tuấn Hải- bơ ngai jang tơ gŭm tơ̆ Hnam pơ gang pơm pơ gia kơ sô̆ 7 tơ băt:

Lu oh klăih song 6-7 ‘nu klăih song 14 tơ̆ng kơ na tôch kơ lap. Mă lei gơ nang đơ̆ng 2 robot âu mă lu oh hiôk ƀiơ̆, vei đei jơ hngơ̆m. Oh ƀôh robot tôch kơ hiôk, đei yua păng hơ gei”.

VIBOT ‘noh jĭ tơ mam đơ̆ng tơ drong jang Khoa hŏk kơ măy kơ mŏk kơ teh đak “ Tơ chĕng hơ len, chă pơm kơ măy robot jang pơ gang chă ba bơ̆n tơ mam lơ̆m hơ nih ăn oei hơ drô̆ jĭ tơ poh đei krê hơ mơt lơ” đei Anih tơm Khoa hŏk păng kơ măy kơ mŏk pơ jao kơ Học viện Ki thuơ̆t khŭl linh bơ̆ jang đơ̆ng khei 4/2020. VIBOT đei tơ drong jang tơ plih bơ ngai jang  ba dôm tơ mam sa, pơ gang, tơ mam yua kăl păng dôm tơ mam nai đơ̆ng hơ nih akŏm ( tơ̆ ‘ngoăih hơ nih ăn oei hơ drô̆) truh tơ̆ dôm hơ nih jĭ ( lơ̆m hơ nih ăn oei hơ drô̆) vă pơ truh ăn bơ ngai jĭ; ba kơ thŭng mong râm rĕk truh dôm hơ nih jĭ vă iŏk râm rĕk păng ba lĕch tơ̆ hơ nih akŏm râm rĕk; năm truh dôm hơ nih jĭ vă y ƀak si, bơ ngai ŭnh hnam ( tơ̆ ‘ngoăih hơ nih ăn oei hơ drô̆) pơ ma dơ nuh đơ̆ng hơ tăih hăm bơ ngai jĭ... GS.TS Nguyễn Văn Kính – Kơ dră Khŭl vei lăng jĭ tơ poh Việt Nam tơ roi:

Kăl tơ jur ƀiơ̆ jơ năr tơ jê̆ hăm bơ ngai jĭ... ‘noh nhôn yua robot vă tơ plih kon bơ ngai 1 păh ‘noh veh ver đei tơ drong tơ poh kiơ̆ ngôi tơ jê̆ kơ tă. Hloh kơ ‘noh dơ̆ng kơ sư̆k bơ̆ jang đơ̆ng robot kŭm ‘lơ̆ng hloh păng lơ bơ ngai gô ư̆h kơ mơ̆t ngôi tơ jê̆ hăm bơ ngai jĭ.

Hơ drol ‘noh, tơ drong jang tơ chĕng hơ len đei tơ lĕch jang kiơ̆ 2 jăl jang, Kơ măy robot jang pơ gang chă ba tơ mam VIBOT-1 ‘noh anih dăr lăng, vei lăng păng 01 robot nơ năm kiơ̆ trong ba. Jăl jang 2, pơm tơ ‘ngla kơ măy kơ mŏk păng pơm kơ măy robot VIBOT-2 chă nơ năm kơ dih. Robot bơ̆ jang ‘lơ̆ng, hơ gei lơ̆m hơ nih să, chă nơ năm klĕch rim hơ nih hrăt păng mơ mat hloh, hơ năp jang kŭm lơ hloh... Thiếu tướng Nguyễn Lạc Hồng- Phŏ Kơ dră Học viện Ki thuơ̆t Khŭl linh pơ ma hơ dăh:

Nhôn đei tơ drong tôch kơ hiôk ‘noh jĭ tơ drong jang hơ dai đơ̆ng Học viện khŭl linh hăm rim hnam kơ măy kơ khŭl linh, rim kơ măy kơ mŏk, đang kơ ‘noh rim hnam kơ măy nai dơ̆ng, kơ na ƀơ̆t tơ drong jang đei hơ len lăng ‘lơ̆ng păng bơ̆ jang đei đĭ tơ drong jang ‘noh nhôn gơh jang hơ dai hăm rim hnam kơ măy lơ̆m khŭl linh vă pơm tơ lĕch hăm kơ sô̆ tih pơm lăp ‘meh vă đơ̆ng rim anih jang tơ lĕch ăn.

Hơ drol kơ pơ lei tơm Hồ Chí Minh, VIBOT-2 hlôi đei iŏk yua pơ long lăng tơ̆ Hnam pơ gang Trung ương khŭl linh 108, đơ̆ng rŏng kơ ‘noh, hơ tuch khei 4/2021 robot đei tơ lĕch jang bơ̆ jang tơ̆ hơ nih ăn oei hơ drô̆, hơ met bơ ngai jĭ COVID-19 kơ hnam pơ gang Bạch Mai- hơ nih 2 (tơ̆ Phủ Lý- Hà Nam). Truh hơ tuch khei 5/2021, VIBOT-2 hơ nơ̆ng đei tơ lĕch jang tơ̆ hơ nih hơ met bơ ngai jĭ F0 kơ Hnam pơ gang Đa khoa dêh char Bắc Giang, tơ gŭm hơ met kơ hrĕng bơ ngai jĭ COVID-19, tơ gop pơm tơ jur jang gleh ăn bơ ngai jang pơ gang, veh ver tơ poh đơ̆ng bơ ngai ‘nâu tơ̆ bơ ngai to lơ̆m hơ nih ăn oei hơ drô̆, hơ met jĭ.

Kiơ̆ đơ̆ng tơ drong pơ long lăng, tơ mơ̆t yua tơ̆ dôm hnam pơ gang, hơ nih ăn oei hơ drô̆, hơ met jĭ Covid-19 hlôi ăn ƀôh Kơ măy robot jang pơ gang chă ba tơ mam VIBOT bơ̆ jang sơ đơ̆ng păng đei yua, tơ gop tơ gŭm tang găn jĭ. ‘Năr 23/7 âu ki, Khŭl jang Khoa hŏk kơ măy kơ mŏk tơ roi tơ ƀôh hơ len lăng, iŏk hơ len lăng tơ drong jang khoa hŏk kơ măy kơ mŏk kơ teh đak hlôi hôp, hơ len lăng pơ tôch jang kiơ̆ tơ drong jang đei tôch kơ hơ gei păng athei hơ nơ̆ng jang pơ keh kơ măy kơ mŏk, tơ mơ̆t jên jang pơm tơ lĕch dơ̆ng dôm kơ măy robot VIBOT vă pơ yua ăn tang găn jĭ. GS.TS Đào Văn Hiệp - Kơ dră khŭl jang khoa hŏk tơ drong jang “ Tơ chĕng hơ len, pơm kơ măy robot jang pơ gang chă ba tơ mam lơ̆m hơ nih ăn oei hơ drô̆ jĭ tơ poh đei krê hơ mơt lơ” tơ roi:

Jăl jang blŭng lăp đei pơm lơ̆m 1 khei athei đei robot pơm lăp hăm tơ drong jang ƀơ̆t măt lơ̆m rim hơ nih ăn oei hơ drô̆. Jăl jang 2 ‘noh sư gơ̆h băt tơ drong hlôh vao kơ jung hloh, vă khan robot hơ gei. Tơ drong chă nơ năm ưh kơ kiơ̆ trong năm hơ met lê̆ hơ drol dơ̆ng, mă athei chă nơ năm kiơ̆ la kak - la kak ‘noh gô tơ mơ̆t đơ̆ng hơ drol dăh mă kơ dih sư pơ jing. Ưh kơ sĭ lăp 1 pôm robot đĕch mă jing 1 grŭp robot, kơ na akŏm vei lăng athei vei lăng đei pơ đĭ grŭp robot. Thim dơ̆ng, dôm robot athei gơh chă hơ dai hăm băl, đang kơ ‘noh chă jang hơ dai kơ dih hăm bơ ngai jang pơ gang mă ưh kơ pơ mơ̆ng lơ̆m anih vei lăng.

Pơ tôch jang kiơ̆ tơ drong jang “ Tơ chĕng hơ len, pơm robot jang pơ gang chă ba tơ mam lơ̆m hơ nih ăn oei hơ drô̆ jĭ tơ poh krê hơ mơt lơ” păng iŏk yua kơ măy tơ chĕng hơ len ( Kơ măy robot VIBOT) lơ̆m tơ drong jang tang găn jĭ Covid-19 hlôi păng tŏk bŏk ăn ƀôh lăng tơ drong jang, tơ drong vă jang trŏ ƀlep đơ̆ng Anih tơm Khoa hŏk păng kơ măy kơ mŏk păng tơ drong kĕ jang, tơ drong hơ drin đơ̆ng anih jang bơ̆ jang kiơ̆, rim bơ ngai jang khoa hŏk kơ Học viện Ki thuơ̆t khŭl linh lơ̆m tơ drong tơ lĕch jang tơ tom rim hơ năp jang Khoa hŏk kơ măy kơ mŏk đei kơ măy kơ mŏk hơ gei lơ̆m tơ gŭm ăn tơ drong jang tang găn jĭ pơ ma hơ drô̆ kŭm nhen lơ̆m trong vă jang hơ tŏk tơ iung khoa hŏk kơ măy kơ mŏk kơ teh đak pơ ma atŭm.

VOV

Thuem: Tơ blơ̆