VOV4.Êđê -  Adiê hjan nanao hlăm dŭm hruê êgao ngă klưh lăn ti dŭm ktuê êlan leh anăn êngăp êa ti čar Dak Nông. Klă klơ̆ng, ti kdriêk Krông Knô, ktuê êlan dơ̆ng čar 4B, kdrêč găn să Quảng Phú mâo nanao lu anôk klưh lăn ti êlan čư̆ nah dlông, ngă luič klei êđăp ênang hlăm êlan klông. Êlan dơ̆ng ala čar mrô 28, kdrêč găn alŭ Phú Thuận, să Quảng Phú êngăp êa êlam.

Êa lip đĭ ăt ngă êngăp krĭng wăl kban găn êa hnoh Dăk Sôr, să Nam Xuân. Ti kdriêk Dak Glong, ti ktuê êlan mlir să Dăk Som, nao să Dăk Rmăng, kdrêč găn ƀuôn B’Dơng, să Dak Som, klưh lăn dlông êbeh 60m. Bruă klưh lăn dleh ktuê dlăng leh anăn klei êa lip ăt lŏ dơ̆ng mâo. Ti dŭm wăl êngăp êa, klưh lăn, dŭm alŭ wăl ti Dak Nông pơ̆ng leh mdhă hưn brei răng huĭ hyưt, mbha êpul gak răng, ktrâo lač kơ mnuih ƀuôn sang, êdeh êdâo găn êrô kñăm rơ̆ng êđăp ênang. Êpul bruă djŏ tuôm ăt pral ktuê dlăng dŭm alŭ wăl huĭdah êngăp êa, klưh hroh lăn, mprăp hdră mbĕ đuê mnuih ƀuôn sang čiăng rơ̆ng êđăp ênang.

H Zawut pô mblang