VOV4.Êđê - Tlam hruê 15/10, Nguyễn Phước Lộc – K’iăng khua anôk bruă đru čung ba mnuih ƀuôn sang gưl dlông mâo leh mmông mă bruă hŏng čar Bạc Liêu kơ hdră gang mkhư̆ klei ruă Covid 19. Hluê si klei hưn, gưl bluh mâo tal 4 ti Bạc Liêu mâo 823 čô djŏ kman SARS-CoV-2, mâo 5 čô djiê.

Ti anôk mă bruă, Nguyễn Phước Lộc brei thâo, Anôk bruă đru čung ba mnuih ƀuôn sang gưl dlông bi hgŭm mtrŭt mjhar, đru 4 êbâo hnơ̆ng vaccine lehanăn lŏ mđĭ ai kơ êpul mă bruă mdrao mgŭn čar Bạc Liêu tlŏ kơ mnuih ƀuôn sang hlăm 2 hruê, wưng ti anăp srăng hluê ngă hdră kčah đru kơ Bạc Liêu hnưm dưi tlŏ vaccine kơ jih jang mnuih ƀuôn sang. Mbĭt anăn, êpul ăt mtrŭt mjhar sa anôk bruă duh mkra ti ƀuôn prŏng Hồ Chí Minh đru kơ Bạc Liêu 3.200 hruh êa drao đru mdrao phung F0 ti sang mâo ênoh jih jang 32 êklai prăk, mđup brei 100 giêt oxi mta 4 lit kơ mnuih ruă./.

H Nêč pô mblang