VOV4.Êđê- 9 mlan, kah knar grăp mlan mâo êbeh 10 êbâo phung duh mkra mnia mblei kbiă đuê̆ mơ̆ng anôk mnia blei, êjai anăn, ênoh knơ̆ng bruă mrâo rŭ mdơ̆ng leh anăn ênoh ngăn prăk bi klă ăt hrŏ lu mkă hŏng wưng anei thŭn leh êgao. Ti anăp klei dleh dlan mơ̆ng dŭm anôk bruă, khua knŭk kna mâo leh klei gĭt gai klă jing hdĭp mƀĭt êđăp ênang hŏng klei ruă tưp čiăng mđĭ kyar bruă duh mkra.

Hluê si Dhar bruă ksiêm yap, kyua hmaĭ mơ̆ng klei ruă Covid-19, hdră mkăp kpăk đuôm, 9 mlan êgao mâo êbeh 90 êbâo anôk bruă duh mkra kruh rai, đĭ 15,3% mkă hŏng wưng anei thŭn dih (kah knar mâo êbeh 10 êbâo anôk bruă duh mkra kbiă mơ̆ng bruă mnia blei). Ăt hlăm 9 mlan êgao, knŏng hlăm brô 85 êbâo anôk bruă duh mkra mkŏ mjing mrâo, hrŏ 13,5% mkă hŏng wưng anei thŭn dih. Mbĭt hŏng anăn, hnơ̆ng prăk duh bi liê čih anăn duh bi liê ăt hrŏ mkă hŏng wưng anei thŭn êlâo. Phạm Đình Thuý – Khua  Knơ̆ng bruă tuh tua mkra mjing leh anăn rŭ mdơ̆ng, Dhar bruă ksiêm yap, Phŭn bruă duh mkra leh anăn duh bi liê brei thâo:

“Covid mâo mơ̆ng akŏ thŭn 2020, truh ară anei giăm 2 thŭn. Ai ktang mơ̆ng anôk bruă mnia blei giăm jih leh. Ka mâo ôh ti thŭn ênoh mkŏ mjing mrâo ƀiă hĭn mkă hŏng wưng anôk bruă duh mkra mdei mkra mjing, ruh mgaih msĕ si thŭn anei.”

Nguyễn Quang Huân – Pô bi ala Bruă kƀĭn ala gưl 15, K’iăng Khua Êpul hgŭm phung duh mkra êngao knŭk kna Việt Nam snăn brei thâo:

“Wưng êgao bi ktlah hjăn ti lu alŭ wăl, boh nik ƀuôn prŏng Hồ Chí Minh, Hà Nội, dŭm čar mâo krĭng klei ruă tưp anăn ênoh bruă duh mkra kbiă mơ̆ng anôk bruă mnia blei jing klei pô thâo săng leh anăn tŭ ư kyua sa blư̆ brei ngă 2 hdră kñăm mkra mjing êjai mdrơ̆ng hŏng klei ruă tưp êjai jing dleh snăk, anăn brei mđing ya bruă brei ngă êlâo. Myun mơh, truh ară anei, Khua knŭk kna mâo klei mĭn gĭt gai klă mngač jing hdĭp êđăp ênang hŏng klei ruă tưp čiăng mđĭ kyar bruă duh mkra, kâo bi mĭn boh klei srăng dưi mkra mlih hlăm hruê mlan kơ anăp.”

Hdơ̆ng mđi dlăng ya hdră msir čiăng kơ anôk bruă duh mkra ngă leh, leh anăn hlăk dưi mđĭ lar mkra mjing mnia blei, ya hdră msir čiăng dŭm anôk bruă duh mkra hlăk hơĭt kjăp mkra mjing mnia blei dưi hnưm đĭ kyar hlăm wưng kơ anăp, Phí Thị Hương Nga –  K’iăng Khua Knơ̆ng bruă ksiêm yap tuh tia mkra mjing leh anăn rŭ mdơ̆ng, Knơ̆ng bruă ksiêm yap, Phŭn bruă hdră kčah leh anăn Duh bi liê mtă:

Ênoh anôk bruă mnia blei mdei ngă bruă 9 mlan akŏ thŭn lu jing anôk bruă duh mkra mâo hnơ̆ng ti gŭ 5 êklai prăk. Bruă đru bi hrŏ prăk bi liê kơ dŭm anôk bruă duh mkra jing čiăng êdi, si tô hmô dưi brei anôk duh mkra ksiêm mkă Covid leh anăn ba dŭm hdră kčah mkra mjing duh mkra djŏ guôp, ăt rơ̆ng dŭm hdră kčah kơ hdră gang mkhư̆ Covid-19 leh anăn dŭm alŭ wăl brei lăm lui dŭm hră mơar bi dleh anôk bruă duh mkra.”

 Klah čŭn klei bi kƀĭn Knŭk kna grăp gưl mlan 9 mrâo êgao, Khua knŭk kna Phạm Minh Chính mñă klă dŭm mta phŭn yuôm bhăn, hlăm anăn mđing kơ bruă ngă mơ̆ng anôk bruă duh mkra. Klă klơ̆ng pŏk ngă mtam dŭm hdră msir krŭ wĭt bruă ngă ti dŭm wăl tuh tia mkra mjing, wăl duh mkra, wăl kdrăp mrâo. Ruh mgaih dŭm klei dleh dlan đru anôk bruă duh mkra krơ̆ng hră akâo blei, mđĭ lar bruă mkăp mnơ̆ng dhơ̆ng, gĭr ktưn mkra mjing kơ yan lu pô akâo blei, boh nik dŭm ala čar prŏng ti Ơ Rôp, Mi, Ngŏ Dưr Asi. Mkŏ mjing klei ba yua klei găl mơ̆ng dŭm klei kuôl kă mnia blei êngiê bi kla leh. Ksiêm yap. Đaŏ knăl mkăp mnơ̆ng dhơ̆ng knhal jih thŭn čiăng amâo kƀah mnơ̆ng.

Pô mblang: H’Zawut Ƀuôn Yă