VOV4.Êđê- Hruê anei, 25/10, Anôk bruă kƀĭn ala bi trông leh online kơ klei čih mkra Hdră bhiăn mkra mlih, thiăm mbŏ dŭm mta klei hlăm Hdră bhiăn kčŭt hưn bruă ngă soh jhat; klei čih mkra Hdră bhiăn mkra mlih, thiăm mbŏ dŭm mta klei hlăm Hdră bhiăn Ksiêm yap lehanăn bi trông ti Êpul kơ klei čih mkra Hdră bhiăn bruă mnia mblei Ênua (mkra mlih). Hlăm hruê 24/10, anôk bruă kƀĭn ala bi trông leh online kơ bruă hưn mdah hdră ngă bruă mơ̆ng Khua hlăm Sang phat kđi yang ƀuôn gưl dlông, Khua knơ̆ng ksiêm dlăng yang ƀuôn gưl dlông; hdră gang mkhư̆ bi kdơ̆ng hŏng phung ngă soh lehanăn klei ngă soh hŏng hdră bhiăn; hdră hluê ngă klei phat mkra klei soh; hdră gang mkhư̆ klei ƀơ̆ng ngăn thŭn 2021; Klei čih mkra Hdră mtrŭn kơ bruă mkŏ mjing hdră phat mkra hluê hdră online. Mta phŭn mâo lu phung bi ala mđing dlăng anăn jing bruă mkŏ mjing klei phat mkra hluê hdră online lehanăn hdră gang mkhư̆ klei ƀơ̆ng ngăn. Lu phung bi ala lač, klei ƀơ̆ng ngăn ba lu klei amâo jăk, klei mđing uêñ hlăm mnuih ƀuôn sang, anôk bruă duh mkra krĭng ngă hră m’ar knŭk kna, boh nik bruă kahan ksiêm, lĭng kahan, mdrao mgŭn, mâo lu phung amâo djŏ ƀiă ôh dôk mâo klei ƀơ̆ng ngăn kjham, ba kčŭt hưn jing bruă ngă soh jhat./.

Pô mblang: H’Nêč Êñuôl