VOV4.Êđê - Tlam hruê 22/10 mbruê, anôk bruă kƀĭn ala hmư̆ leh klei hâo mdah lehanăn bi trông ti Êpul kơ bruă hluê ngă hdră mtrŭn, hdră ênua yang ƀuôn, kriê dlăng lehanăn ba yua Keh Ênua yang ƀuôn thŭn 2020; bruă kriê dlăng lehanăn ba yua Keh ênua bruă mdrao mgŭn thŭn 2020 lehanăn hluê ngă Hdră mtrŭn mrô 68 mơ̆ng anôk bruă kƀĭn ala gưl 13 kơ hdră mtrŭt mđĭ bruă hluê ngă hdră mtrŭn, hdră bhiăn kơ ênua yang ƀuôn, mđing truh kơ hdră ba yua ênua mdrao mgŭn jih jang mnuih ƀuôn sang hlăm 2 thŭn 2019 – 2020. Tĭng truh jih thŭn 2020, ênoh mnuih nao hgŭm hlăm hdră ênua yang ƀuôn êbeh 16 êklăk čô, bi knar 33,5% êpul mnuh mă bruă hlăm gưl thŭn. Ênoh hrui mâo mơ̆ng keh ênua mdrao mgŭn êbeh 110 êbâo êklai prăk, bi liê kơ ênua mdrao mgŭn thŭn 2020 êbeh 104 êbâo êklai prăk; ênoh hrui keh ênua yang ƀuôn mdrao mgŭn lu hĭn mkă hŏng ênoh bi liê mơ̆ng keh ênua mdrao mgŭn êbeh 5 êbâo êklai prăk. Klei hưn mdah mơ̆ng Dhar bruă yang ƀuôn akâo kơ knŭk kna ksiêm wĭt bruă hluê ngă Hdră mtrŭn mrô 68 mjing tur knơ̆ng čiăng ba mdah klei akâo, ba mdah hŏng anôk bruă kƀĭn ala čiăng dưi mâo Hdră mtrŭn djŏ guôp hŏng boh klei mrâo, ksiêm dlăng hdră mđĭ hnơ̆ng hrui prăk ênua mdrao mgŭn djŏ guôp mbĭt anăn gĭt gai dŭm phŭn, dhar bruă djŏ tuôm lehanăn alŭ wăl mđĭ hdră ksiêm dlăng bruă hluê ngă hdră mtrŭn, hdră bhiăn kơ bruă Ênua mdrao mgŭn, msir mghaih dŭm klei ngă soh./.

H Nêč pô mblang