VOV4.Êđê - Anôk bruă kphê 15 jing êpul êya lĭng kahan mâo bruă klam mđĭ kyar bruă duh mkra lehanăn rŏng kjăp klei êđăp ênang bruă lĭng kahan. Ảă anei êpul êya mkŏ mjing leh hdră pla êbeh 800 ha kphê, 300 ha ksu, mjing bruă mă kơ êbeh 1.200 ưô mnuih mă bruă, hlăm anăn mâo êbeh 170 čô mnuih mă bruă djuê ana ƀiă.

Hŏng hdră: “Pla mjing, mđĭ kyar lehanăn êđăp ênang” hlăm bruă hluê ngă “Mta kñăm mdua”, hlăm wưng êgao, Anôk bruă kphê 15 dôk mđĭ ktang lehanăn hluê ngă kjăp hdră gang mkhư̆ Covid 19 mbĭt anăn krơ̆ng kjăp hdră duh mkra pla mjing êđăp ênang. Êpul êya mđing kơ hdră ksiêm dlăng hnơ̆ng tưp lar. Knuă druh, lĭng kahan, mnuih mă bruă brei hluê ngă kjăp klei kvvah mtrŭn gang mkhư̆ klei ruă tưp, hluê ngă hdră ksiêm dlăng kman klei ruă Covid 19 hŏng hdră test pral amâo dah hŏng hdră RT-PCR. Jih kdrăp mnơ̆ng, mnơ̆ng dhơ̆ng mŭt kbiă hlăm êpul êya, sang maĭ dưi mdjiê kman rơ̆ng klei êđăp ênang. Kyua anăn, dŭm sang maĭ, dŭm êpul kriê dlăng kphê ăt dưi krơ̆ng kjăp hdră duh mkra pla mjing.

Amai H’Duân Niê, mnuih mă bruă ti Anôk bruă kphê 15 lač snei: Hmăi mơ̆ng klei ruă Covid 19 ngă leh gŏ sang amai tuôm hŏng lu klei dleh dlan, ƀiădah êpul bruă pral nao mtrŭt mđĭ ai, đru rơ̆ng kjăp klei hdĭp lehanăn ktrâo lač hluê ngă hdră gang mkhư̆ klei ruă anăn mnuih ƀuôn sang h’ĭt ai tiê bi leh dŭm mta kñăm mâo kčah mtrŭn. “Kơ hdră gang mkhư̆ kâo ăt hluê ngă djăp ênŭm 5 Asăp mtă. Tĭng kơ anôk bryă đru leh djăp ênŭm, dŭm mmông dleh dlan đru êa msĭn, hra lehanăn đru prăk grăp mlan čiăng mâo djăp prăk blei mnơ̆ng yua.

Ayŏng Ma Văn Tân, mnuih mă bruă phăn jao kphê ti Anôk bruă Kphê 15 lač anei: “Mâo anôk bruă mđing dlăng truh kơ mnuih mă bruă, hlăm yan bluh mâo klei ruă anei ăt dưi tlŏ vaccine čiăng kơ mnuih mă bruă h’ĭt ai tiê ngă bruă hlăm êpul êya lehanăn siă suôr hŏng anôk bruă.

Đại uý, quân nhân chuyên nghiệp Nguyễn Thị Thu Ngân, khua êpul mrô 3, brei thâo, truh ară anei 100% mnuih mă bruă hlăm êpul dưi tlŏ leh vaccine gang mkhư̆ Covid 19. Kyua hluê ngă jăk hdră mtô mblang; knuă druh, mnuih mă bruă mđĭ leh hdră gang mkhư̆ klei ruă tưp, gĭr mkhư̆ amâo lui klei ruă bluh mâo ti lu anôk hmăi truh kơ hdră duh mkra pla mjing, mnia mblei mơ̆ng Anôk bruă lehanăn bruă mă mnuih ngă bruă. “Hŏng êpul êya bruă hmei, mơ̆ng leh bluh mâo klei ruă snăn 100% ênoh mnuih mă bruă dưi rơ̆ng kjăp klei êđăp ênang. Boh tŭ hlăm hdră gang mkhư̆ klei ruă mâo anôk bruă tĭng dlăng, hluê ngă jăk, amâo lui klei truh amâo jăk bluh mâo wăt hlăm ênoh mnuih mă bruă ti ală wăl. Klei mdê mơ̆ng êpul êya jing kriê dlăng kphê”

Hluê Đại tá Phạm Xuân Thảnh, Khua anôk bruă kpjhê 15, kyua pŏk ngă mđrăm mbĭt dŭm hdră msir gang mkhư̆ klei ruă, boh nik hluê ngă kjăp 5 Asăp mtă mơ̆ng Phŭn bruă mdrao mgŭn, truh ară anei anôk bruă rơ̆ng kjăp leh hdră gang mkhư̆ klei ruă tưp, bi h’ĭt bruă duh mkra, mnia mblei mâo prăk mnga: “Dŭm êpul êya hlăm anôk bruă msĕ si Êpul bruă Duh mkra lĭng kahan, dŭm êpul bruă duh mkra pla mjing mâo s’aĭ êpul gang mkhư̆ Covid 19 grăp hruê thâo klă nanao klei mâo ti alŭ wăl kñăm gang mkhư̆ klei ruă tưp. Hŏng anôk bruă duh mkra amâo dôk guôn, jưh knang klei đru mơ̆ng gưl dlông. Hŏng anôk bruă duh mkra ăt krơ̆ng kjăp bruă duh mkra pla mjing, mnia mblei. Knŏng 9 mlan akŏ thŭn, hmăi mâo leh prăk mnga êbeh 3 êklai prăk, đĭ 1,5 blư̆ mkă hŏng hdră kčah thŭn 2021. Hlăk dôk hlăm wưng dleh dlan snei ƀiădah bruă Đảng, phung khua kiă kriê, êpul êya, mnuih mă bruă ăt gĭr krơ̆ng kjăp hdră duh mkra pla mjing”.

Anôk bruă Kphê 15, kahan krĭng 5 jing gru mngač hlăm bruă hluê ngă tŭ jing bruă klam mdua, gang mkhư̆ klei ruă tưp êđăp ênang êjai lehanăn ngă bruă duh mkra, mnie mblei êjai, mjing bruă mă h’ĭt kjăp kơ mnuih mă bruă./.