VOV4.Êđê- Tlam bruê, ti anôk bruă ksiêm hriăm klei ruă tưp, aduôn Robyn Modie, pô bi ala Australia ti Việt Nam ba jao leh kơ k’iăng khua phŭn bruă mdrao mgŭn Trương Quốc Cường thiăm 300.000 hnơ̆ng Việt Nam AstraZeneca mkra mjing ti Australia mbĭt hŏng lu kdrăp bruă mdrao mgŭn. Truh kơ ară anei, Australia ba jao leh kơ Việt Nam êbeh 700.000 hnơ̆ng vaccine (hlăm ênoh 1,5 êklăk hnơ̆ng vaccine ƀuăn rơ̆ng mkăp brei kơ Việt Nam). Australia ăt lŏ bi klă mkăp brei thiăm 3,7 êklăk hnơ̆ng vaccine hlăm hruê mmông kơ anăp hlăm klei bi tŭ ư hŏng UNICEF leh anăn phŭn bruă mdrao mgŭn Việt Nam, mđĭ ênoh hnơ̆ng Australia mkăp brei kơ Việt Nam jing 5,2 êklăk hnơ̆ng, mâo ênoh hlăm brô 60 êklăk AUD. Australia ăt dôk bi mguôp hŏng UNICEF kñăm mlih mnơ̆ng yua kriê pioh vaccine, mtô mjuăt mnuih mă bruă mdrao mgŭn leh anăn mđĭ bruă tlŏ mgang vaccine dŭm krĭng taih kbưi ti Việt Nam. Ăt hruê mbruê, khua knŭk kna Phạm Minh Chính mâo leh hră lač jăk kơ knŭk kna Australia Scott Morrison kyua klei đru yuôm bhăn anei.

Pô mblang: Y-Ƀel Êban