VOV4.Êđê- Anôk ksiêm duah kơ klei ruă tưp gưl dlông mrâo mâo leh klei bi klă mbha truh 8 êklăk hnơ̆ng vaccine Vero Cell mơ̆ng knơ̆ng bruă Sinopharm Trung Quốc kơ 25 boh čar, ƀuôn prŏng hlăm kluôm ala. Anei jing gưl mkăp vaccine tal 43 mơ̆ng phŭn bruă mdrao mgŭn. Hà Nội jing alŭ wăl mâo mbha lu hĭn truh 1 êklăk 359 êbâo hnơ̆ng vaccine, hlăm ênoh jih jang 8 êklăk hnơ̆ng vaccine Vero Cell, dôk tal dua jing Quảng Ninh hŏng êboh 700 êbâo hnơ̆ng. Lạng Sơn, Hải Phòng, Yên Bái lehanăn ƀuôn prŏng Hồ Chí Minh, grăp boh čar, ƀuôn prŏng mâo 500 êbâo hnơ̆ng vaccine. Bắc Ninh 400 êbâo hnơ̆ng; Khánh Hòa, Kiên Giang grăp boh čar 300 êbâo hnơ̆ng vaccine, dŭm čar Bắc Giang; Nam Định; Thanh Hoá; nghệ An, Quảng Trị, Bình Định, Long An; Đồng Tháp Lâm Đồng, Tây Ninh... grăp boh čar 200 êbâo hnơ̆ng vaccine. Anôk bruă ksiêm duah kơ klei ruă tưp Gưl dlông mtă kơ Adŭ bruă tlŏ mgang ala čar mâo klei hgŭm mă bruă čiăng ba ênoh vaccine anăn bi djŏ truh kơ Adŭ bruă tlŏ mgang pŏk mlar tui si alŭ wăl. Anôk kiă kriê klei ruă dŭm čar, ƀuôn prŏng mkŏ mjing mtam bruă tlŏ vaccine Vero Cell Covid 19 leh mâo mbha anăn kơ aruăt tlŏ tal sa lehanăn tal dua./.

Pô mblang: Y-Khem Niê