VOV4.Êđê- Leh giăm 4 hrue mă bruă hŏng kle imjêč, aguah mbrue (7/10), ti anôk bruă Đảng Gưl dlông, ti gŭ klei kiă kriê mơ̆ng khua gĭt gai Đảng Nguyễn Phú Trọng, klei bi kƀĭn tal 4 Êpul khua kă kriê bruă Đảng gưl dlông  gưl 13 mâo kleh klei bi kƀĭn bi ruĕ. Êpul khua kiă kriê Gưl dlông mâo leh klei bi tŭ ư prŏng, 9 mlan êgao, bruă duh mkra kluôm ăt hơĭt, klei prăk luič ênoh ăt dưi mkhư̆, boh nik hmăr hmao mdrơ̆ng, lehanăn mâo mtam hră mghaih msir, đru mdul klei dleh dlan kơ phung duh mkra, lehanăn phung ƀuôn sang hmăi amâo mâo jăk mơ̆ng klei ruă tưp. Khua gĭt gai Đảng mñă, gưl dlông mđing hlak mblang dŭm klei gun kpăk prŏng, lu mta klei dleh dlan mơ̆ng klei ruă tưp lŏ bluh đĭ, bi trông kơ dŭm hdră êlan kjăp hĭng mdrơ̆ng hŏng klei ruă tưp, hdră lŏ kơrŭ wĭt bruă duh mkra hlăm wưng kơ anăp. Kơ klei mkŏ mjing Đảng, ti anôk blŭ hrăm Khua gĭt gai Đảng lač, Klei bi kƀĭn mâo leh klei bi tŭ ư prŏng mâo mtrŭn hdră êlan mrâo kơ klei đảng viên amâo mâo dưi ngă, yap anei jing knơ̆ng yuôm bhăn pioh ksiêm dlăng, mghaih msir klei phung knuă druh đảng viên ngă soh./.

 Pô mblang: Y-Ƀel Êban