VOV4.Êđê - Aguah mbrue (14/10), Dhar bruă gĭt gai bruă kƀĭn ala bi ruĕ leh klei bi kƀĭn tal 4. Khua bruă kƀĭn ala Vương Đình Huệ brei thâo, hŏng klei mjêč, mâo bruă đua klam, Dhar bruă gĭt gai bruă kƀĭn ala mâo bi leh jih jang bruă kơ klei bi kƀĭn. Khua bruă kƀĭn ala mtă kơ jih jang anôk bruă djŏ tuôm pral bi klin djăp ênŭm klei blŭ mơ̆ng phung ƀuôn sang mơ̆ng dŭm anôk bi tuôm, ba ai tiê klei blŭ mơ̆ng phung ƀuôn sang kwưh akâo anăn truh kơ anôk bi kƀĭn tal 2 mơ̆ng bruă kƀĭn ala gưl 15.

Khua bruă kƀĭn ala mtă bi pral mâo klei bi klin ênŭm mơ̆ng klei bi kƀĭn dhar bruă gĭt gai bruă kƀĭn ala tal 4, mjing knơ̆ng kơ dŭm dhar bruă mơ̆ng Bruă kƀĭn ala, knŭk kna mơĭt truh kơ grăp čô phung bi ala bruă kƀĭn ala. Jih jang klei hâo mdah, boh nik hâo mdah kơ bruă ksiêm bi mklă klah čŭn, hŏng klei djŏ, ngă bi mngač jih jang bruă phung ƀuôn sang dôki mđing. Khua bruă kƀĭn ala Vương Đình Huệ mtă ngă bi leh jih jang djăp hdră, mâo klei găl kơ bruă mkŏ mjing klei bi kƀĭn tal dua dưi tŭ jing kluôm ênŭm./.

Y Khem pô mblang