VOV4.Êđê - Hŏng klei kreh kriăng, gĭr ktưn leh anăn thâo mbruă hlăm klei mă bruă leh anăn mnia mblei, Phạm Ngọc Thân ti alŭ 4, să Tân Hoà, kdriêk Ƀuôn Đon, čar Dak Lak dưi pah mni jing sa hlăm 63 čô ƀĭng ngă lŏ hma pla mjing mnia mblei kdlưn êdi hlăm ala čar thŭn 2021. Êngao kơ jing sa čô   kdlưn hĭn hlăm klei ngă bruă knuă, ñu lŏ mâo ai tiê thâo khăp, thâo pap đru kơ lu gŏ sang nao hgŭm hlăm êpul ƀĭng ngă lŏ hma thâo gĭr ktưn tlaih mơ̆ng klei ƀun ƀin leh anăn hur har đru hlăm bruă mkŏ mkra krĭng ƀuôn sang mrâo, đru mguôp hlăm bruă đru kơ phung mâo klei dleh dlan hlăm alŭ wăl.

Ayŏng Hoàng Đức Dũng ti alŭ 6, să Tân Hòa hdơr knga kơ Phạm Ngọc Thân, kyua dưi mŭt mă bruă ti anôk bruă mnia blei mnơ̆ng dhơ̆ng mkra mjing hŏng hnơ̆ng prăk mlan 6 êklăk prăk/mlan. Amâo djŏ knŏng dŭm năn ôh, Thân lŏ brei gŏ sang Dũng čan prăk amâo mă mnga čiăng rông bê pioh mđĭ kyar bruă duh mkra. Mă prăk čan mơ̆ng Thân ñu blei 8 hlâo bê mjeh pioh rông. Leh êbeh sa thŭn êpul bê dưi bi lar êbeh 50 brei, ñu čhĭ blei êmô mjeh. Tal anei, Dũng mâo klei tŭ dưn. Rông mnŏng mâo mnga, gŏ sang dưi tla prăk ana leh anăn mâo 1 boh sang prŏng 70m2, dưi rông dua čô anak hriăm hră mơar “Kâo mă bruă kơ ayŏng Thân mơ̆ng 5 thŭn êlâo. Leh anăn kâo čan prăk ñu 100 êklăk blei bê ba rông, leh bê mđai kâo čhĭ lŏ blei êmô rông. Prăk hrui wĭt ară anei man dưn djăp mơh. Êngao kơ prăk mlan êbeh 70 êklăk mơ̆ng Thân, snăn hrui wĭt mơ̆ng êmô, bê ăt mâo dŭm pluh êklăk prăk, kƀĭn mbĭt êbeh 100 êklăk. Gŏ sang mâo prăk mkra sang, rông anak čô hriăm hră.”

Tô Văn Liệu –  K’iăng Khua Êpul hgŭm ƀĭng ngă lŏ hma kdriêk lač, hlăm dŭm thŭn êgao Phạm Ngọc Thân amâo djŏ knŏng mkra mjing, mnia blei mbruă ôh, ƀiădah lŏ jing sa čô hgŭm hlăm lu bruă ngă, hdră bi lông ktưn mơ̆ng dŭm gưl Êpul hgŭm mnuih ƀuôn sang pŏk ngă, đru mguôp hlăm bruă knuă, anôk bruă nah gŭ mkŏ mkra krĭng ƀuôn sang mrâo ti alŭ wăl, mbĭt anăn, ñu ăt jih ai tiê, bi hriăm hdră mnêč rông mnơ̆ng, pla mjing kơ phung mkăn hlăm kdriêk Ƀuôn Đon, čhĭ brei đuôm nư hbâo pruê, êa drao krih kơ ana pla mjing amâo mă prăk mnga kơ gŏ êsei ƀun… Hŏng klei Phạm Ngọc Thân đru mâo lu mnuih ti să Tân Hoà leh anăn krĭng riêng gah tlaih ƀun, boh nik gĭr ktưn kpưn đĭ kơ mdrŏng. “Thân đru leh alŭ 4 să Tân Hoà ngă Sang bi kƀĭn ƀuôn, mkra mđĭ dŭm ktuê êlan krĭng ƀuôn sang. Mbĭt anăn đru kơ gŏ êsei dleh dlan mkăn ti să amâodah ti ƀuôn prŏng Ƀuôn Ama thuôt, mkŏ mjing sang tŭk knă klei khăp ti sang êa drao kdriêk Ƀuôn Đon čiăng mnuih ƀun mâo êsei huă, mđup brei hdruôm hră kơ hđeh ƀun dưi nao sang hră. Êpul hgŭm ƀĭng ngă lŏ hma kdriêk lŏ dơ̆ng bi lar gru hmô êdah kdlưn čiăng lar hlăm êpul êya, lu gŏ êsei ƀun lŏ dơ̆ng đru amâodah dưi đru.”

Mrâo anei, Phạm Ngọc Nghị mă anăn knăl “Ƀĭng ngă lŏ hma mkra mjing mnia blei mbruă kluôm ala thŭn 2021”. Thân brei thâo, ñu ăt ngă bruă mơ̆ng 2 ƀĕ kngan hŏng, hiu mă bruă mưn, čan prăk, ăt kpưn đĭ hŏng ana kphê, tiu, rông êmô. Ƀiădah čiăng mâo klei bi mlih, ñu amâo huĭ lông ngă bruă. Mơ̆ng bruă mnia blei êa săng êa pui, mnơ̆ng dhơ̆ng mkra mjing pưk sang, hbâo pruê leh anăn êa drao krih kơ ana pla mjing, leh anăn pŏk anôk pla boh êrang, mkra sang rông čĭm iăt…

Klei tŭ, ară anei ñu mâo leh lu sang čhĭ mnơ̆ng leh anăn anôk pla mjing, prăk hrui wĭt êbeh 15 êklai prăk hlăm grăp thŭn. Ngă êjai, hrŏng ruah êjai, bi mĭn, Phạm Ngọc Thân dôk mâo sa hdră kčah prŏng hĭn. Ñu amâo srăng mdei ti bruă duh mkra gŏ sang ôh, ƀiădah srăng bi hgŭm hŏng lu ƀĭng ngă lŏ ba yua klei găl ti krĭng lăn Ƀuôn Đon “Hmei ăt srăng mđing hlăm bruă mđĭ lar đru kơ ƀĭng ngă lŏ hma. Kâo dôk bi mĭn tă hdră kơ gŏ sang leh anăn dŭm gŏ sang hlăm alŭ pŏk mlar bruă rông yến, mkŏ mjing mnơ̆ng dhơ̆ng yến doh djăp hnơ̆ng čuăn OCOP ba kơ tar rŏng lăn. Tal dua, kâo ăt hlăk mbĭt hŏng bruă lŏ hma kdriêk mkŏ mjing Êpul hgŭm bruă pla mjing boh êrang ti kdrăn lŏ să Tân Hoà. Kâo čang hmăng djăp bruă srăng găl ênưih leh anăn tŭ dưn.”

Hŏng klei tŭ hlăm bruă mkra mjing mnia blei ăt msĕ mơh hdră đru kơ mnuih knap mñai, lu thŭn êgao Phạm Ngọc Thân mâo dŭm gưl êpul hgŭm ti Dak Lak mđup brei anăn knăl, boh nik hlăm thŭn 2021 anei, ñu jing sa hlăm 63 čô ƀĭng ngă lŏ hma mkra mjing mnia blei mbruă kluôm ala mâo Khua bruă kƀĭn ala Vương Đình Huệ mđup brei hră pah mni. Ñu dưi čih yap amâo djŏ knŏng hdră hgao klei dleh dlan kpưn đĭ kơ mdrŏng năng mpŭ ôh, ƀiădah wăt kyua ai tiê thâo khăp đru kơ phung riêng gah, kyua hnơ̆ng trah dlăng leh anăn klei gĭr ktưn hŏng knŭk kna leh anăn ƀĭng ngă lŏ hma alŭ wăl, mjing klei lăn dleh pla mjing ti ƀuôn sang pô jing krĭng lŏ hma lu jơr leh anăn mdrŏng sah./.