VOV4.Êđê- Kñăm rơ̆ng kjăp klei êđăp ênang kơ mnuih mă bruă ti anăp klei ruă Covid 19 dôk mâo dleh dưi ksiêm dlăng, Binh đoàn 15 mtrŭt mđĭ leh hdră gang mkhư̆ klei ruă tưp hŏng hdră “Gang mkhư̆ klei ruă tưp msĕ si bi kdơ̆ng hŏng phung roh”. Mbĭt anăn, êngao kơ bruă rơ̆ng kjăp hdră duh mkra pla mjing, blei mnia amâo gun kpăk, êpul êya lŏ mđing dlăng, hluê ngă lu hdră mtrŭn mđing kriê dlăng klei hdĭp kơ mnuih mă bruă.

Grăp hruê truh kơ 11 mmông, ti anôk bi mklih ktak ksu mơ̆ng êpul 2, knơ̆ng bruă 72, kdriêk Đức Cơ, čar Gia Lai. Binh đoàn 15 lŏ mâo lu klei blŭ tlao mơak mñai mơ̆ng phung mrâo wĭt riêk ksu. Diñu mâo klei hơ̆k mơar leh sa mlam mă bruă suăi êmăn, mâo lu ktak leh anăn mâo hnơ̆ng tŭ jăk. Êjai mmông mă bruă, grăp čô diñu thâo săng sơăi bruă truă čhiăm guôm ƀô̆, mkă hnơ̆ng hlơr asei leh anăn dôk bi kbưi djŏ hŏng klei bhiăn êjai nao mklin ktak ksu, anăn jing dŭm klei mưng kbiă mơ̆ng hruê klei ruă tưp Covid-19 bluh đĭ. Amai Siu H’Yien, sa čô mă bruă riêk ktăk ksu êpul 2, knơ̆ng bruă 72, kdriêk Đức Cơ, čar Gia Lai, Binh đoàn 15 lač:

“Tinei, jih jang phung ayŏng amai adei mă bruă ngă jăk sơăi bruă gang mkhư̆ klei ruă tưp, amâo đuê̆ hiu anôk mkăn leh anăn rơ̆ng dôk bi kbưi ƀiă êdi 2m, Bi kơ gŏ sang kâo mâo 6 čô nao mă bruă, ƀiădah hmei ngă jăk nanao bruă gang mkhư̆ klei ruă tưp wăt kơ dôk hlăm sang leh anăn nao mă bruă.”

Phung knuă druh, mnuih mă bruă hlăm Binh đoàn 15 hlue ngă jăk hdră gang mkhư̆ klei ruă tưp hlăm klei mă bruă

Hlăm dŭm anôk mkra mjing ktak ksu, Bình Đoàn 15 rơ̆ng nanao bruă mkra mjing mâo klei êđăp ênang. Hlăm dŭm anôk mkra mjing, yăng đar mâo mơ̆ng 25 truh kơ 30 čô, ƀiădah ară anei knŏng dôk mă 10 truh kơ 15 čô mă bruă bi mlih tuôr mă bruă čiăng gang mkhư̆ klei ruă tưp. Mnuih mă bruă huă ƀơ̆ng leh anăn mdei tinei dưi rơ̆ng dŭm klei jăk găl. Thượng tá Phan Văn Phú, k’iăng khua kiă kriê knơ̆ng bruă 72, Binh Đoàn 15 brei thâo:

“Hlăm dŭm hruê mmông leh êgao, hrăm mbĭt hŏng dŭm êpul êya hlăm alŭ wăl, rơ̆ng kjăp klei êđăp ênang kđi čar, yang ƀuôn, krĭng ƀuôn sang hlăm alŭ wăl. Hmei mâo klei bi klă jing gang mkhư̆ klei ruă tưp, mâo klei êđăp ênang hlăm anôk bruă, mprăp êpul ngă bruă, mnơ̆ng yua, đru kơ dŭm êpul, alŭ wăl mâo klei ruă tưp. Hmei bi klă hlăm hruê mmông kơ anăp srăng lŏ gĭr rơ̆ng kjăp, bi hơĭt anôk ngă bruă, alŭ wăl. Rơ̆ng ngă bruă mkra mjing, mnia blei mâo boh tŭ dưn leh anăn hnơ̆ng tŭ jăk.”

Mnuih mă bruă dưi mkă hnơ̆ng hlơr asei mlei hlăm klei mă bruă

Leh mâo vaccine mkăp brei mơ̆ng phŭn bruă lĭng kahan, Binh Đoàn 15 ngă mtam bruă tlŏ mgang aruăt tal 1 kơ jih jang phung knuă druh, lĭng kahan, mnuih mă bruă. čiăng rơ̆ng bruă tlŏ mgang mâo klei êđăp ênang, Binh đoàn 15 leh anăn dŭm anôk bruă mkŏ mjing leh hdră, ngă klei mtô bi hriăm phung knuă druh, phung mă bruă mdrao mgŭn ngă bruă tlŏ mgang vaccine, ngă bruă ksiêm mkra hrŏng, ksiêm dlăng, dŏng mdrao tơdah êa drao ngă leh tlŏ mgang. Kyuanăn, bruă tlŏ mgang dưi ngă jăk, mâo klei kreh knhâo leh anăn êđăp ênang. Amai Lê Thị Liên, êpul 4, knơ̆ng bruă 72 (kdriêk Đức Cơ, čar Gia Lai), Lê Thị Liên brei thâo:

“Hlăm wưng klei ruă tưp dôk dleh dưi ksiêm dlăng msĕ ară anei, phung ayŏng amai adei hmei mă bruă tinei mâo klei huĭ hyưt. Msĕ hŏng kâo jing sa čô mă bruă riêk ktak ksu mơ̆ng knơ̆ng bruă 72, jing anôk bruă hlăm alŭ wăl krĭng knông lăn, krĭng taih kbưi, mâo phŭn bruă lĭng kahan, Binh Đoàn, knơ̆ng bruă ngă bi mâo klei găl kơ ayŏng amai adei hmei dưi tlŏ leh vaccine, hmei ƀuh klei mơak leh anăn mâo klei đăo knang. Dưi tlŏ mgang vaccine Covid hmei ƀuh mâo klei hơĭt leh anăn gĭr ktưn dưi bi leh jih bruă klam”.

Phung knuă druh, lĭng kahan, mnuih mă bruă dưi tlŏ vaccin gang mkhư̆ klei ruă tưp

Dua thŭn leh êgao, Binh Đoàn 15 mkŏ mjing leh hdră êlan mă bruă “4 sa anôk” čiăng dưi bi leh bruă klam mdua jing ngă jăk bruă mkra mjing mnia mblei nao mbĭt hŏng bruă lĭng kahan, klei êđăp ênang leh anăn gang mkhư̆ klei ruă tưp mâo boh tŭ dưn. Hlăm anăn Binh Đoàn bi klă bruă hâo hưn jing kđông mgang kjăp, đru mguôp mâo klei êđăp ênang kơ anôk bruă leh anăn alŭ wăl ti anăp klei ruă tưp Covid-19. Mơ̆ng năn, dưi rơ̆ng bruă mkra mjing, phung mă bruă mâo bruă mă leh anăn prak mlan hơĭt. Đại tá Lê Xuân Phương, k’iăng khua knơ̆ng gĭt gai lĭng kahan Binh Đoàn 15 brei thâo:

“Rơ̆ng kơ klei hdĭp, boh nik jing prăk mlan kơ mnuih mă bruă djŏ hruê hŏng prăk mlan kah knar jing 6 - 7 êklăk prăk. Mnuih mă bruă mâo klei hơĭt. Boh nik leh diñu mâo klei hơĭt, đăo knang kơ Binh Đoàn, bruă gang mkhư̆ klei ruă tưp jing jăk hĭn, hmei dlăng kơ êpul mă bruă jing kđông mgang, êpul mă bruă msĕ hŏng êpul êya yang ƀuôn điêt, ngă kjăp dŭm hdră êlan. Truh kơ ară anei, bruă gang mkhư̆ klei ruă tưp mơ̆ng Binh Đoàn jing jăk, êđăp ênang leh anăn mâo boh tŭ dưn. Bruă mkra mjing, mnia mblei thŭn anei hmei bi klă srăng mâo leh anăn srăng êgao hnơ̆ng čoh čuăn mơ̆ng phŭn bruă lĭng kahan jao kơ Binh Đoàn 15.”

Pô mblang: Y-Ƀel Êban