VOV4.Êđê - Lu thŭn giăm anei dŭm pŏk hdruôm hră čih mơ̆ng hră hâo hưn “Hrăm mbĭt hŏng adei nao sang hră mơar” mơ̆ng keh răng mgang leh anăn mđĭ kyar dliê čar Kon Tum mkŏ mjing mơ̆ng akŏ thŭn hriăm mrâo dưi đru kơ phung hđeh sang hră, boh nik jing phung hđeh sang hră djuê ƀiă, krĭng taih kbưi mâo klei dleh dlan hlăm čar mâo hdruôm hră čih nao sang hră mơar. Êngao kơ anăn dŭm pŏk hdruôm hră anei lŏ mâo klei hưn mthâo mtah hlăm bruă ngă jăk hdră tla prăk kơ bruă răng mgang wăl dliê kmrơ̆ng čiăng mâo klei đĭ kyar kjăp leh anăn mlih hdră duh ƀơ̆ng kơ mnuih ƀuôn sang.

Sang hră gưl sa Nguyễn Văn Cừ, ti să dleh dlan Đăk Pxi, kdriêk Đăk Hà mâo 275 čô hđeh lehanăn păt čiăng jih jang mnuih djuê ana Sedang s’aĭ. Êlâo kơ thŭn hriăm mrâo 2021- 2022, khua sang hră kah mbha leh phung nai mtô nao truh ti grăp sang phung hđeh ti tlâo boh ƀuôn mâo: Đăk Kơ Đương, Đăk Rơ Wang lehanăn Đăk Wét ksiêm dlăng hdră mprăp kơ thŭn hriăm mrâo phung hđeh. Hdră ksiêm dlăng brei ƀuh mâo lu phung hđeh kƀah hdruôm hră čih, hdruôm hră dlăng lehanăn čhum ao nao sang hră. Klei m’ak truh leh hŏng phung nai lehanăn hđeh Sang hră gưl sa Nguyễn Văn Cừ hlăk mâo klei hưn mơ̆ng Keh răng mgang lehanăn mđĭ kyar dliê čar Kon Tum hluê ngă Hdră hâo hưn “Hrăm mbĭt hŏng phung hđeh nao sang hră” mkăp kơ grăp čô hđeh 7 hdruôm hră čih mâo kđăm asăp hưn mthâo kơ bruă răng mgang dliê lehanăn hluê ngă hdră tĭng tla bruă răng mgang dliê ti hră anei. Nai mtô Nguyễn Trung Dũng, Khua sang hră brei thâo: “Ênoh hră mkăp rơ̆ng djăp kơ phung hđeh mơ̆ng adŭ 1 truh kơ adŭ 5 hlăm sa thŭn hriăm. Kơ hnơ̆ng tŭ hră čih ăt msĕ mơh dŭm asăp hưn mthâo dưi kđăm mkra klă nik, đru mguôp mbĭt hŏng sang hră mtrŭt mđĭ hdră mtô bi hriăm čiăng kơ phung hđeh bi mlih bruă ngă, klei thâo săng. Mơ̆ng dŭm asăp hưn mthâo, dŭm mta phŭn mâo leh Keh răng mgang dliê hưn mdah klă tinăn ăt hrăm mbĭt hŏng sang hră mjuăt bi hriăm kơ phung hđeh thâo khăp kơ lăn dliê, thâo mpŭ, thâo klă klei yuôm bhăn mơ̆ng lăn dliê lehanăn thâo răng kriê wăl hdĭp mơ̆ng pô, klei anei srăng đru kơ êpul êya bi mlih klei thâo săng čiăng ngă jăk hĭn hdră răng mgang lehanăn mđĭ kyar dliê ti alŭ wăl.

Sang mâo lu ayŏng adei nao hriăm hră, dưi mbha hră čih mơ̆ng Hdră hâo hưn “Hrăm mbĭt hŏng phung hđeh nao sang hră”, adei Y Thị Thư, mnuih djuê ana Sedang, hđeh hriăm adŭ 4A brei thâo, kyua mâo hdră đru anei amĭ ama amâo lŏ blei hră kơ anak ôh, pioh prăk duh kơ bruă mkăn. Adei khăp čiăng êdi dlăng kơ dŭm hdruôm hră čih anei: “Kâo lehanăn ƀĭng găp mkăn mâo mkăp brei hră čih anei, kâo ƀuh m’ak êdi. Kâo dlăng ti hră anei, kâo ƀuh khăp êdi kơ lăn dliê.

Hluê ngă Hdră mtô mblang “Hrăm mbĭt hŏng phung hđeh nao sang hră”, êlâo kơ mŭt thŭn hriăm mrâo 2021- 2022, Keh răng mgang lehanăn mđĭ kyar dliê čar Kon Tum ba m’ĭt leh kơ 169 boh sang hră ti 76 să, wăl krah ti alŭ wăl 10 kdriêk, ƀuôn prŏng hlăm čar 600.000 hdruôm hră čih lehanăn 5.000 blah mu đua kơ phung hđeh. Ti pŏk m’ar tal êlâo hlăm hdruôm hră čih lehanăn mu đua mâo kđăm dŭm asăp hưn mthâo kơ hdră mtrŭn tĭng tla bruă kriê dlăng, răng mgang dliê lehanăn bruă kriê mgang dliê. Bruă ngă anei đru leh kơ phung hđeh dưi mâo hră čih mbĭt anăn mkăp kơ klei čiăng hâo hưn, mtô mblang truh kơ jih jang mnuih ƀuôn sang hlăm krĭng hlăm bruă răng mgang dliê. Phan Thế Vinh, Khua anôk bruă sang čư̆ êa să Hiếu, kdriêk Kon Plŏng brei thâo: “Akŏ dŭm thŭn hriăm mrâo Keh đru leh hdruôm hră čih kơ phung hđeh đru mjing klei găl kơ phung hđeh hlăm klei nao hriăm hră m’ar. Hră čih mơ̆ng Keh mđup brei kơ phung hđeh ti krĭng mnuih ƀuôn sang djuê ƀiă, krĭng dleh dlan mâo kđăm mkra asăp hưn mthâo. Hluê hŏng asăp hưn mthâo anăn, sang hră ăt mtô mblang, mtrŭt mjhar phung hđeh kơ bruă răng mgang dliê. Hluê hŏng phung hđeh, phung amĭ ama, gŏ sang ăt thâo kơ asăp hưn mthâo anei, mđĭ hĭn hdră răng mgang dliê ti alŭ wăl să.

Hluê si Hồ Thanh Hoàng, Khua keh răng mgang lehanăn mđĭ kyar dliê čar Kon Tum, dŭm thŭn êlâo, Keh bi hgŭm leh hŏng phung khua kiă kriê sang hră mkŏ mjing Knăm mđup brei Hră čih lehanăn mu đua bi mguôp hŏng bruă mtô mblang kơ hdră mtrŭn tĭng tla bruă kriê dlăng, răng mgang dliê kñăm mđĭ klei thâo săng kơ phung hđeh. Khă snăn, thŭn hriăm mrâo anei, kyua hmăi mơ̆ng klei ruă Covid 19, êpul êya amâo hluê ngă hdră kčah msĕ tal êlâo ƀiădah tiŏ nao mnuih lehanăn kdrăp mnơ̆ng mdiăng ba hră, mua đua truh kơ snag hră, jao kơ phung khua kiă kriê sang hră mbha kơ phung hđeh. Khădah hmăi mơ̆ng klei ruă COVID-19, Hdră mtô mblang “Hrăm mbĭt hŏng phung hđeh nao sang hră” mâo Keh răng mgang lehanăn mđĭ kyar dliê čar Kon Tum mkŏ mjing ăt dôk lar bra klei khăp čiăng hŏng asăp hưn mthâo, hluê ngă jăk hdră mtrŭn tĭng tla bruă kriê dlăng wăl dliê čiăng răng mgang, mđĭ kyar dliê h’ĭt kjăp lehanăn mkra mđĭ hdră duh ƀơ̆ng kơ mnuih ƀuôn sang./.