VOV4.Êđê- Lu anôk bruă duh mkra hiu čhưn ênguê ti Đà Lạt - Lâm Đồng ăt dôk ur kơ klei dleh dlan kyua ka djăp klei găl lŏ wĭt pŏk ƀăng drông tue. Mta phŭn jing lu phung mă bruă ka dưi tlŏ ênŭm 2 aruăt vaccin hluê si klei kčah mtrŭn.

Mơ̆ng hruê knŭk kna mdah hdră mtrŭn 128 kơ klei bhiăn êjai “hdĭp êđăp ênang, hŏng klei mbruă, ktuê dlăng mâo boh tŭ dưn klei ruă tưp Covid-19”, čar Lâm Đồng dôk bi hmar kơrŭ wĭt bruă mkra mjing, mnia mblei hlăm wưng klei aguah tlam mrâo, Lê Hồng Thanh, khua kiă kriê sa anôk bruă hiu čhưn ênguê ti ƀuôn prŏng Đà Lạt hơ̆k mơak kyua mâo leh mkrah thŭn sang jưh kđăl ƀăng kyua klei ruă tưp Covid-19, ară anei mâo leh klei găl dưi wĭt ngă bruă. Ƀiădah ară anei sang jưh ñu kăn dưi wĭt ngă bruă lei kyua dŭm čô mnuih mă bruă ka mâo ênŭm ôh 2 ruăt vaccine tui si klei bhiăn. Ñu ênguôt dhuôt yăl dliê:

Mơ̆ng mlan 6 thŭn 2021 truh kơ ară anei anôk bruă sang jưh mdei klei ngă bruă, khă mâo leh klei dưi lŏ wĭt ngă bruă ƀiădah amâo dưi drông tuê kyua hnơ̆ng čuăn mơ̆ng phung bruă mdrao mgŭn jing tlŏ ênŭm 2 aruăt vaccine kơ phung ngă bruă hlăm klei hiu čhưn ênguê, êjai anăn sang jưh hmei knŏng mâo mă aruăt tal 1. Tui si klei bhiăn, tơdah tlŏ aruăt tal 2 srăng lŏ guôn 6 hruê kăm, jing srăng truh kơ knhal jih mlam 11 kơh dưi tlŏ kơ hmei. Tơdah lŏ yua klei bhiăn thiăm 14 hruê dơ̆ng, jing srăng truh kơ krah mlan 12 kơh dưi drông tuê, anăn jing klei hmăi kơ bruă hiu čhưn ênguê ti Đà Lạt.

Ƀuôn prŏng Đà Lạt - anôk mâo klei ktang đĭ kyar hiu čhưn ênguê hlăm boh klei mrâo

Tui si Nguyễn Viết Vân, khua kiă kriê knơ̆ng bruă dhar kreh, mjuăt asei mlei leh anăn hiu čhưn ênguê čar Lâm Đồng, kluôm ênŭm bruă hiu čhưn ênguê mâo dŭm pluh êbâo mnuih mă bruă, bi kơ knŏng dŭm sang jưh mâo leh êbeh 18.500 čô mnuih mă bruă mâo klei čiăng tlŏ mgang vaccine. Khădah čar Lâm Đồng gĭr mkăp brei vaccine tal êlâo kơ bruă hiu čhưn ênguê, sa hlăm dŭm bruă duh mkra kdlưn hĭn hlăm čar, ƀiădah truh kơ ară anei knŏng mâo tlŏ mă aruăt tal 1. Kyuanăn ka mâo ôh klei găl dưi ngă bruă, drông tuê. Boh klei anei hmei mâo leh klei kâo kơ bruă sang čư̆ êa čar Lâm Đồng čiăng mâo êlan mgaih msir.

Hmei mâo leh klei nao ksiêm dlăng jih jang dŭm anôk bruă sang jưh, anôk bruă hiu čhưn ênguê leh anăn jih ai đru kơ dŭm anôk bruă hiu čhưn ênguê hlăm hruê mmông êgao. Boh nik ti ƀuôn prŏng Đà Lạt, êjai ênoh prăk ba wĭt mơ̆ng bruă hiu čhưn ênguê truh kơ 79% ƀiădah kđăl ƀăng giăm leh sa thŭn anei. Bi kơ bruă tlŏ mgang vaccine, ară anei êpul ngă bruă hiu čhưn ênguê mơ̆ng Đà Lạt truh kơ Cát Tiên knŏng mâo mă sa aruăt. Kâo mâo leh klei akâo hŏng êpul gĭt gai ăt msĕ hŏng bruă sang čư̆ êa čar čiăng hnưm dưi tlŏ mgang vaccine kơ bruă hiu čhưn ênguê kñăm mâo ênŭm klei găl, ruh mgaih dŭm klei dleh dlan, kpăk êgun kơ jih jang anôk bruă hiu čhưn ênguê hlăm hruê mmông kơ anăp.

Ƀiădah lu anôk bruă dôk jưh ti Đà Lạt ka djăp klei găl lŏ wĭt pŏk ƀăng drông tuê ôh

Mbĭt hŏng dŭm klei gĭr čiăng dưi tlŏ ênŭm 2 aruăt vaccine, rơ̆ng mâo ênŭm klei găl čiăng dưi drông tuê hiu čhưn ênguê, knơ̆ng bruă hiu čhưn ênguê čar Lâm Đồng dôk mtrŭt mđĭ bi leh hnơ̆ng čuăn klei êđăp ênang gang mkhư̆ klei ruă tưp hŏng bruă hiu čhưn ênguê hlăm alŭ wăl. Ngă sơ anăn kơh, ƀuôn prŏng Đà Lạt - čar Lâm Đồng jing anôk hiu čhưn ênguê êđăp ênang kơ phung tuê hiu čhưn ênguê hlăm wưng klei aguah tlam mrâo.

Pô mblang: Y-Ƀel Êban