VOV4.Êđê - Aguah mbruê, phung bi ala bruă kƀĭn ala mâo leh klei bi trông hlăm êpul kơ hdră mđĭ kyar bruă duh mkra ala ƀuôn thŭn 2022 leh anăn bruă gang mkhư̆ klei ruă tưp Covid-19. Phung bi ala yap yuôm bhăn dŭm hdră êlan djŏ leh anăn kluôm ênŭm dưi mkŏ mjing hlăm hruê mmông êgao, dưi đru mâo boh tŭ dưn yuôm bhăn msĕ si: Truh kơ ară anei, klei ruă tưp dơ̆ng dưi ksiêm dlăng leh hlăm kluôm ala, hdră kăp mdrơ̆ng hŏng dŭm gưl klei ruă tưp dưi ba mdah leh anăn kčưm hlăm wưng hdĭp êđăp ênang, mbruă, ksiêm dlăng mâo boh tŭ dưn klei ruă tưp hŏng bruă kñăm tal êlâo hĭn jing klei suaih pral, klei hdĭp mnuih ƀuôn sang. Mâo lu klei bi knăl jăk dưi ƀuh hlăm bruă kơrŭ wĭt, mđĭ kyar bruă duh mkra ala ƀuôn, ba ala čar wĭt kơ klei msĕ aguah tlam mrâo. Hluê si phung bi ala, mâo 3 mta kñăm jing boh kdrŭt mđĭ kyar bruă duh mkra ala ƀuôn thŭn 2022, anăn jing kơrŭ wĭt, mtrŭt mđĭ bruă mkra mjing, mnia mblei, mtrŭt mđĭ bruă ba čhĭ kơ ala tač êngao leh anăn bi hmar bruă brei čan duh bi liê bruă mbĭt čiăng iêo mthưr ai dưi yang ƀuôn hlăm bruă mkŏ mkra.

Y Ƀel pô mblang