VOV4.Êđê- Ti gŭ klei kiă kriê mơ̆ng Khua bruă kƀĭn ala Vương Đình Huệ, aguah mbrue (10/11), klei êmuh, lehanăn wĭt lač klei êmuh tal êlâo jing hŏng bruă mdrao mgŭn. Blŭ pŏk klei bi kƀĭn anei, Khua bruă kƀĭn ala Vương Đình Huệ mñă: Bruă êmuh anei amâo mâo djŏ knŏng kơ hdră ksiêm dlăng, mđĭ hĭn bruă bruă, boh nik hŏng khua kiă kriê. Anei lŏ jing klei bi trông kơ bruă ksiêm dlăng, lehanăn ngă djŏ hŏng bruă hdră bhiăn čoh čuăn kơ dŭm mta bruă prŏng. Êmuh khua phŭn bruă mdrao mgŭn Nguyễn Thanh Long, lu jing êmuh kơ klei ênoh ênil mkă dlăng kman Covid 19, êa drao mdrao, kdrăp mdrao mgŭn, mnơ̆ng pioh mka dlăng kman. Kơ klei mtŭk mtŭl ênoh bi mkă dlăng kman ăt hlăk jing klei mjêč ti anôk bi kƀĭn. Khua phŭn bruă mdrao mgŭn lač, ênoh blei kdrăp mnơ̆ng yua, mta mnơ̆ng pioh mkă dlăng kman jing tui hlue mơ̆ng phŭn agha anôk čhĭ, lehanăn wưng blei. Lehanăn mñă klă bruă kklam mơ̆ng bruă mdrao mgŭn ƀuăn ngă hŏng klei kjăp hĭn ksiêm dlăng kơ klei ênoh ênil mkă dlăng kman hlăm wưng kơ anăp. Lu phung bi ala akâo bi mngač djăm mta klei ngă soh hlăm wưng leh êgao mơ̆ng phŭn bruă mdrao mgŭn. Khua bruă kƀĭn ala Vương Đình Huệ mtă: Thŭn 2022 mđing bi ksiêm dlăng bi nik bruă iêu mkrum, lehanăn kiă kriê ngăn prăk kơ bruă mdrơ̆ng hŏng klei ruă tưp, gang mkhư̆ klei ngă amâo mâo djŏ, bruă knŏng duah klei tŭ dưn kơ pô./.

Pô mblang: Y-Khem Niê