Ƀuôn hgŭm Phú Thuỷ, čar Lâm Đồng dưi mkŏ mjing mơ̆ng tur knơ̆ng bi mŭt 3 ƀuôn hgŭm, mâo: Phú Thủy, Thanh Hải leh anăn Phú Hài hlăm čar Bình Thuận hđăp. Bi mklă bruă mlih mrô jing bruă klam phŭn, êdah kdlưn, leh ba yua bruă sang čư̆ êa alŭ wăl dua gưl, ƀuôn hgŭm Phú Thuỷ pral bi leh Êpul mkăp đru hdră bruă leh anăn bruă knuă đru msir mgaih hră mơar; mkŏ mjing 23 Êpul kdrăp mrâo êpul êya mâo 130 čô leh anăn mkŏ mjing gru hmô mnuih ƀuôn sang hriăm hdră mrô. Ayŏng Phan Anh Tiến,  Khua dlăng bruă êdam êra ƀuôn hgŭm Phú Thuỷ, brei thâo, mđĭ lar ai tiê ba anăp, čŏng ngă mơ̆ng phung mda asei, êbeh 4.400 čô êdam êra ti ƀuôn hgŭm mrâo ba anăp hlăm klei hriăm mjuăt, mđĭ klei thâo mrô leh anăn đru kơ mnuih ƀuôn sang “lăm lui klei amâo thâo yua kdrăp mrô”:

 “Êpul êdam êra ƀuôn hgŭm hâo hưn mtô mblang, hriăm mjuăt bi mlih mrô kơ phung êdam êra. Dŭm êpul êdam êra nao hlăm djăp ƀuôn êlan, boh sang đru kơ phung khua thŭn leh anăn phung amâo jăk asei mlei yua đĭng blŭ thâo mĭn, yua VNeID hnơ̆ng 2. Thâo kơ klei ngă hră mơar online hlăm hdră bruă knŭk kna. Tơdah ktrâo lač kơ phung khua thŭn ka thâo yua kdrăp mrô drei ktrâo lač lu hĭn, đru ƀrư̆ ƀrư̆ kơ digơ̆ thâo yua. Hlăm hruê kăm Êdam êra tiŏ nao phung hlăm Anôk bruă ngă hră mơar knŭk kna đru kơ mnuih ƀuôn sang mơĭt hră mơar”.

Giăm 10 mlan êgao hŏng klei hơĭt mkŏ mjing ba yua êpul mă bruă, Bruă đảng ƀuôn hgŭm Phú Thuỷ, čar Lâm Đồng bi klă klơ̆ng klei kñăm mlih mrô pral hĭn, tŭ dưn hĭn leh anăn giăm mnuih ƀuôn sang hĭn. Dŭm gru hmô, ngă bruă: “Ktuê êlan tĭng tla amâo yua prăk hla”, gưl ngă bruă ktang hĭn 60 hruê mlam mkăp anăn bi mklă điện tử mguôp hŏng pŏk ngă gru hmô “Grăp čô mnuih ƀuôn sang - Grăp anăn mrô”; gưl ngă bruă 90 hruê mlam  bi mbŏ ênoh mrô kơ lăn ala ti ƀuôn hgŭm; 90 hruê ngă ênoh mrô klei bi dôk ung mô̆; čih klei hâo hưn kơ ênoh mrô gang mkhư̆ kle pui ƀơ̆ng… đru mđĭ klei tŭ đưn kriê dlăng knŭk kna leh anăn klei sa ai mơ̆ng mnuih ƀuôn sang, anôk bruă duh mkra. Nguyễn Hữu Thông, Khua dlăng bruă đảng ƀuôn hgŭm Phú Thuỷ, bi mklă, bruă Đảng ƀuôn hgŭm bi mklă mlih mrô leh anăn yua kdrăp mrô hâo hưn hlăm klei ba yua  bruă sang čư̆ êa alŭ wăl jing hnơ̆ng kčah yuôm bhăn čiăng ksiêm dlăng klei thâo gĭt gai mơ̆ng bruă sang čư̆ êa  ăt msĕ mơh grăp čô knuă druh đảng viên:

 “Boh tŭ mlih mrô, ba yua kdrăp mrâo hâo hưn hlăm klei ba yua bruă sang čư̆ êa alŭ wăl dua gưl mơ̆ng Phú Thủy năng mđĭ ai. 100% knuă druh yua kdrăp kriê dlăng hră mơar điện tử, msir mgaih bruă knuă hlăm hdră mrô. Ênoh msir mgaih hră mơar online  mơ̆ng ƀuôn hgŭm êbeh 70%, dŭm mta bruă lŏ lu hĭn. Hlăm thŭn 2025 mkra mlih hră mơar ƀuôn hgŭm Phú Thuỷ dăp tal 3 hlăm 124 să, ƀuôn hgŭm, alŭ wăl knơ̆ng. Ƀuôn hgŭm grăp knhuang yua hdră mrô hlăm hră mơar leh anăn mkŏ mjing tur knơ̆ng mrô yua mbĭt, mđĭ hdră bruă knŭk kna online mjing klei găl kơ mnuih ƀuôn sang leh anăn anôk bruă duh mkra”.

Čih yap boh sĭt ti lu să, ƀuôn hgŭm čar Lâm Đồng brei ƀuh, klei bi mlih mrô dôk grăp knhuang bi mlih hdră gĭt gai. Boh nik, tơdah hnơ̆ng bruă knuă mâo lu hi’n kơ gưl nah gŭ, bi mlih mrô jing hdră đru yuôm  bhăn. Kyua ba yua hdră mrô hâo hưn, knuă druh, phung mă bruă gưl să msir mgaih pral bruă knuă, djŏ klă hĭn, mbĭt anăn mđĭ klei mkŏ, bi trông mrô hŏng gưl čar djŏ mmông. Čiăng kơ mnuih ƀuôn sang ti krĭng ƀuôn sang, krĭng taih kbưi, krĭng dleh dlan ti čar amâo lui ti tluôn hlăm wưng bi mlih mrô, êpul knuă druh nah gŭ ti čar Lâm Đồng srăng ngă bruă suăi hĭn. Đặng Thiện Viên,  K'iăng Khua Knơ̆ng bruă sang čư̆ êa să Liên Hương, čar Lâm Đồng, brei thâo:

“Alŭ wăl Liên Hương krĭng ƀuôn sang jing phŭn, mnuih ƀuôn sang ngă hră mơar hŏng mơar lu snăk. Ară anei knuă druh ti să tơdah msir mgaih hră mơar jing ngă hŏng mơar êjai leh anăn ktrâo lač kơ mrô êjai čiăng ba yua hdră mrô hlue si hdră mtrŭn gĭt gai mơ̆ng čar”.

Ksiêm dlăng kjăp Hdră mtrŭn 57 mơ̆ng Phŭn bruă kđi čar, Hdră mtrŭn mrô 71, mơ̆ng Knŭk kna kơ klei êdah kdlưn mđĭ kyar kreh knhâo, kdrăp mrâo, mlih mrâo mbruă leh anăn mlih mrô ala čar, čar Lâm Đồng dôk mđĭ ktang mlih mrô hlue si Hdră bruă wưng 2026-2030. Hlăm anăn bi mklă anôk bruă nah gŭ leh anăn ênoh mrô jing tur knơ̆ng phŭn; kƀĭn mđĭ kyar Anôk bruă ênoh mrô hlue si hdră mrâo mrang, hrăm mbĭt; mkŏ mjing dŭm ênoh mrô rơ̆ng “djŏ, djăp, doh, hdĭp, sa anăn, yua mbĭt” čiăng mkŏ, kah mbha tŭ dưn plah wah dŭm anôk bruă…Võ Thành Công, Khua Knơ̆ng bruă kreh knhâo leh anăn kdrăp mrâo čar Lâm Đồng, brei tthâo:

“ Knơ̆ng bruă pŏk ngă hdră bruă mrô wăl yua mbĭt. Hdră bruă anei hnơ̆ng prŏng djŏ tuôm kơ 11 knơ̆ng, dhar bruă. Leh hdră bruă bi leh srăng mkŏ mjing ênoh mrô jih čar, hlăm anăn srăng mâo kdrăp thơ̆ng mơ̆ng dŭm knơ̆ng, dhar bruă ba sa kdrăp yua mbĭt čiăng mblang duh kơ bruă gĭt gai”.

Hŏng klei gĭr hlăm klei bi mlih mrô, truh ară anei 100% hră mơar gưl čar leh anăn gưl să ti Lâm Đồng rơ̆ng bruă tŭ mă, msir mgaih, ba wĭt boh tŭ sa anăn hlăm kluôm čar. Ênoh yua mrô hră mơar, boh tŭ msir mhaih hră mơar mâo giăm 90%. Ênoh ba yua klei hâo hưn, ênoh mrô mâo giăm 93%. Lâm Đồng mâo êbeh 14.000 hră mơar mâo hră siñê mrô kơ bruă knŭk kna. Mđing kơ klei kñăm mkŏ mjing bruă sang čư̆ êa mrô, bruă duh mkra mrô leh anăn ala ƀuôn mrô, alŭ wăl dôk lŏ dơ̆ng bi liê, mđĭ anôk bruă mrô, mbĭt anăn mđĭ mtô bi hriăm klei thâo kơ phung knuă druh, phung mă bruă knŭk kna čiăng mđĭ hnơ̆ng jăk duh kơ mnuih ƀuôn sang, anôk bruă duh mkra./.