Knơ̆ng bruă sang čư̆ êa čar Gia Lai mrâo mkŏ mjing leh klei bi kƀĭn mghaih msir dŭm klei gun kpăk kơ bruă mkra êlan dơ̆ng pral Quy Nhơn – Pleiku hŏng boh taih 125 km. Kdrêč bruă mrô 1 dưi mâo jao leh truh 65% anôk ala. Čar mâo rŭ mdơ̆ng leh 13 anôk ala pla phŭn mrâo kơ êbeh 620 gŏ sang mnuih ƀuôn sang. Ƀiădah, ênoh čiu hnô dôk ƀiă đei, lehanăn dleh mbĕ anôk bruă nah gŭ hlăk jing klei kpăk kơ bruă knuă. K’iăng khua knơ̆ng bruă sang čư̆ êa čar Nguyễn Tự Công Hoàng čang hmăng:

Čiu hnô lăn lŏ hma jing bi ksiêm duah phŭn agha bi klă. Čiăng dưi ngă bruă anei, snăn mâo klei bi mguôp jih êpul bruă kđi čar mơ̆ng ƀuôn kơ dlông, bi hâo hưn, mtrŭt mjhar, bi êdah, klei akâo mơ̆ng mnuih ƀuôn sang, čiăng mghaih msir mtam mơ̆ng nah gŭ. Gĭr truh kơ kdrêč bruă tal dua dưi mă bruă hŏng klei pral, êjai anăn mbĭt hŏng kdrêč bruă tal 1 lehanăn 3 mă bruă mbĭt. Snăn klei čiu hnô lăn pla mjing truh ti hrue 30/4 srăng bi leh”.

Mbĭt hŏng anăn, Gia Lai kruak kdriêl klei mă bruă, bi leh kdrêč bruă duh mkra nah ngŏ hlăm mlan 6/2026; djăp kdrêč mkŏ hŏng dŭm kdriêk bi leh hlăm thŭn, ruh mgaih anôk ala pioh mkra êlan dơ̆ng pral bi leh hlăm mlan 4/2026. Lu mta bruă msĕ si knơ̆ng mbông êa, bruă sang êa drao gŭn, bruă dhar kreh, bruă nah gŭ hlăm ƀuôn sang ăt dơ̆ng kčưm rŭ mkra, lehanăn srăng bi leh djŏ tui si hrue kčah. Čar hlăk mâo mta kñăm dưi bi liê jih 100% ngăn prăk thŭn 2026, mtă kơ hdră êlan kiă kriê kjăp djŏ hŏng klei čoh čuăn “6 klei klă”, nao mbĭt hŏng bruă klam grăp čô mnuih./.