VOV4.Êđê - Aguah hrue mbrue (20/10), ti sang bi kƀĭn Diên Hồng, mâo Khua bruă kƀĭn ala Vương Đình Huệ kiă kriê, Bruă kƀĭn ala pŏk leh klei bi kƀĭn tal dua Bruă kƀĭn ala gưl 15, hlue hŏng hdră online mơ̆ng anôk mkŏ hlăm sang bi kƀĭn Diên Hồng, Sang Bruă kƀĭn ala lehanăn hŏng 62 anôk mkŏ ti dŭm boh čar, ƀuôn prŏng. Tui si hdră mâo bi klă leh, hlăm klei bi kƀĭn anei, Bruă kƀĭn ala srăng ksiêm dlăng, bi klă kơ dua mta hdră bhiăn, 5 mta hdră mtrŭn, lehanăn mă klei blŭ kơ 5 hdră bhiăn.

Bruă kƀĭn ala ksiêm dlăng klei hâo mdah mơ̆ng knŭk kna kơ bruă ksiêm wĭt jih jang hdră mđĭ kyar bruă duh mkra ala ƀuôn lehanăn tĭng ngăn prăk bi liê kơ thŭn 2021, ksiêm dlăng hdră bi klă hdră mđĭ kyar bruă duh mkra ala ƀuôn thŭn 2022, tĭng kơ ngăn prăk knŭk kna bi liê thŭn 2022, lehanăn kơ hdră hlăm 3 thŭn 2022 – 2024, klei lŏ bi kdung êjai bruă mđĭ mlih prăk mlan hlue hdră mtrŭn mơ̆ng Gưl dlông lehanăn bruă kƀĭn ala, bruă mdrơ̆ng hŏng klei ruă tưp lehanăn bruă hlue ngă hdră mtrŭn mrô 30/2021/QH15 mơ̆ng klei bi kƀĭn tal 1, Bruă kƀĭn ala gưl 15 ksiêm dlăng bi mklă leh bruă duh mkra wưng thŭn 2022 – 2025, čuăl mkă hdră êlan djă yua lăn 5 thŭn  wưng 2021 – 2025, lehanăn dŭm bruă yuôm bhăn mkăn./.

Y Khem pô mblang