Hlăm anăn, boh tŭ yuôm đĭ lu ti dŭm mta mnơ̆ng, đru mguôp mđĭ ênoh prăk hdră ba čhĭ mnơ̆ng kơ ala tač êngao mơ̆ng kluôm čar, lŏ dơ̆ng mñă klă bruă klam hlăm hdră mkŏ dăp bruă duh mkra mơ̆ng čar. Thŭn 2024, ênoh čhĭ dŭm mta mnơ̆ng lŏ hma ti Dak Lak krơ̆ng ti hnơ̆ng yuôm.

Ênoh kphê, tiu đĭ lu êdi. Klei anei đru mđĭ hnư hrui wĭt kơ mnuih ƀuôn sang, anôk bruă duh mkra, mjing klei găl mđĭ boh tŭ yuôm mnơ̆ng dhơ̆ng. Boh tŭ bruă pla mjing ngă lŏ hma mơ̆ng čar hlăm jih thŭn rơ̆ng dưi maoa djăp hdră kčah mtrŭn. Bruă lŏ hma, dliê kmrơ̆ng lehanăn mnơ̆ng hlăm êa mâo êbeh 23.450 êklai prăk, đĭ êbeh 4% mkă hŏng wưng anei thŭn êlâo, êgao 0,65% hdră kčah. Mnơ̆ng lŏ hma Dak Lak ba čhĭ leh kơ êbeh 70 ala čar lehanăn krĭng lăn, mâo giăm 1,7 êklai USD. Nguyễn Hoài Dương, Khua knơ̆ng bruă Lŏ hma mđĭ kyar krĭng ƀuôn sang čar Dak Lak brei thâo, thŭn 2025, bruă lŏ hma gĭr mâo mnơ̆ng lŏ hma, dliê kmrơ̆ng, mnơ̆ng hlăm êa kluôm dhuôm êbeh 24.700 êklai prăk, đĭ êbeh 5% mkă hŏng thŭn 2024. Čiăng dưi mâo mta kñăm anei, čar srăng lŏ mđĭ boh tŭ yuôm mnơ̆ng dhơ̆ng mkăp djŏ hŏng hnơ̆ng čuăn ba čhĭ kơ ala tač êngao./.