Leh ksiêm dlăng kluôm dŭm anôk rông mnơ̆ng hŏng kdrăp mrâo mrang ti čar, čar Gia Lai mâo leh dŭm klei mkra mlih hlăm hdră êlan iêo mthưr klei duh bi liê, mđĭ hĭn bruă ksiêm dlăng dŭm hdră rông mnơ̆ng hlăm wưng kơ anăp, hluê si hdră tal êlâo dưn yua kdrăp mrâo mrang, hnơ̆ng prŏng leh anăn răng mgang wăl hdĭp mda. Hluê si Knơ̆ng bruă Hdră êlan leh anăn duh bi liê čar Gia Lai, alŭ wăl ksiêm dlăng leh anăn mkra mlih hdră êlan iêo mthưr duh bi liê kyua klei ksiêm dlăng 16 hdră rông mnơ̆ng dôk ngă bruă, knơ̆ng bruă hmao ƀuh lu hdră amâo mâo hnơ̆ng tŭ jăk.

Bruă sang čư êa čar Gia Lai mâo leh hră gĭt gai Knơ̆ng bruă hdră êlan leh anăn duh bi liê bi mguôp hŏng dŭm knơ̆ng, dhar bruă, alŭ wăl lŏ dơ̆ng mtô kơ phung duh bi liê bi leh hră mơar djŏ hŏng klei čuăn, hluê ngă djŏ klei čuăn răng mgang wăl hdĭp mda, ksiêm dlăng, ngă tal êlâo dŭm hdră rông mnơ̆ng dưn yua kdrăp mrâo. Tơdah hmao ƀuh klei ngă soh srăng ƀuah mkra ktang phĭt, mâo wăt bruă hưn mdah hŏng bruă sang čư êa čar brei mdei ngă bruă leh anăn mjưh ngă bruă hluê si klei čuăn mơ̆ng klei bhiăn ala čar.